Esekiel

14 Oh ekei ohl mah en Israel kan ahpw kohdo oh mwohndi mwohi.+ 2 Siohwa ketin mahsanihong ie: 3 “Nein-aramas, ohl pwukat koasoanedier ren idawehn ar dikedik kasaut kan,* oh re kauwadahr mehn kadipekelekel ehu me kin kahrehiong aramas akan ren dipada. Ia duwe, I en sapeng ar peideko?+ 4 Eri koasoiong irail oh ndaiong irail, ‘Iet me Kaun Wasa Lapalahpie Siohwa ketin mahsanih: “Ma mehn Israel men koasoanehdi en idawehn eh dikedik kasaut kan oh kauwada mehn kadipekelekel ehu me kahrehiong aramas akan ren dipada oh mwuri e kohdo idek soukohp men, ngehi, Siohwa pahn sapeng ih ni uwen me konehng eh dikedik kasaut ngeder kan. 5 Pwe I pahn kahrehda masak nan mohngiong en aramas en Israel kan* pwehki irail koaros kohkohsang ie oh idawehnla ar dikedik kasaut kan.”’+

6 “Eri ndaiong aramas en Israel kan, ‘Iet me Kaun Wasa Lapalahpie Siohwa ketin mahsanih: “Kumwail pwurodo oh sohpeisang amwail dikedik kasaut kan oh sohpeisang amwail wiewia kasaut kan koaros.+ 7 Pwe ma mehn Israel men de mehn liki men me kin kousoan nan Israel katohrehsang ie pein ih oh koasoanehdi en idawehn eh dikedik kasaut kan oh kauwada mehn kadipekelekel ehu me kahrehiong aramas akan ren dipada oh mwuri kohdo idek nei soukohp,+ ngehi, Siohwa, me pahn pein sapeng ih. 8 I pahn sohpeiong aramaso oh wiahkihla ih mehn karasepe ehu oh lepin kahs ehu, oh I pahn kemehla ih;+ oh kumwail pahn anahne ese me ngehi me Siohwa.”’

9 “‘Ahpw ma mie me pitihedi soukohpo oh e kihda pasapeng ehu, iei ngehi, Siohwa me pitihedi soukohpo.+ Eri I pahn kapahla limeiet oh kamwomwala ih sang rehn nei aramas en Israel kan. 10 Irail pahn anahne pwukoahki diparail; dipen aramas me ideko pahn duwehte dipen soukohpo, 11 pwe aramas en Israel kan en dehier kohkohsang ie oh dehier kasaminekinirailla arail kauwehla kosonned kan koaros. Oh irail pahn wiahla nei aramas, oh I pahn wiahla ar Koht,’+ Kaun Wasa Lapalahpie Siohwa me ketin mahmahsen.”

12 Oh Siohwa ketin pwurehng mahsanihong ie: 13 “Nein-aramas, ma sahpw ehu dipada ong ie ni eh wiahda mwekid salelepek, I pahn kapahla limeiet ong sahpwo oh kauwehla mwenge kan me kin kohda* nan sahpwo,+ oh I pahn kadarala lehk lapalap powe+ oh kemehla aramas akan oh mahn akan sang sahpwo.”+ 14 “‘Mehnda ma ohl silimen pwukat—Noha,+ Daniel+ oh Sohp+—mi nan sahpwo, re pahn kak doarehlahte pein irail pwehki arail pwung,’+ Kaun Wasa Lapalahpie Siohwa me ketin mahmahsen.”

15 “‘De ma I pahn kahrehiong mahn lawalo keper kan ren keidwei nan sahpwo oh kamalaulauwihala tohn sahpwo* oh wiahkihla met wasa tehn ehu me sohte emen pahn keidla loale pwehki mahn lawalo kan,+ 16 nin duwen ei ieias,’ Kaun Wasa Lapalahpie Siohwa me ketin mahmahsen, ‘mehnda ma ohl silimen pwukat mi nan sahpwo, re sohte pahn kak doarehla nair pwutak kan de pil nair serepein kan; re pahn doarehlahte pein irail, oh sahpwo pahn tehnla.’”

17 “‘De ma I pahn wahdo kedlahs pwoat ong sahpwo+ oh mahsanih: “Kedlahs pwoat en keidwei nan sahpwo,” oh kemehla aramas oh mahn akan nan sahpwo,+ 18 mehnda ma ohl silimen pwukat mi nan sahpwo, nin duwen ei ieias,’ Kaun Wasa Lapalahpie Siohwa me ketin mahmahsen, ‘Re sohte pahn kak doarehla nair pwutak kan de pil nair serepein kan; re pahn doarehlahte pein irail.’”

19 “‘De ma I pahn kadarodo soumwahu lusulus ehu nan sahpwo+ oh wudekihdiong ei engieng powe sang ni kakerkerdien nta pwehn kemehla aramas oh mahn akan nan sahpwo, 20 mehnda ma Noha,+ Daniel+ oh Sohp+ mi nan sahpwo, nin duwen ei ieias,’ Kaun Wasa Lapalahpie Siohwa me ketin mahmahsen, ‘re sohte pahn kak doarehla nair pwutak kan de pil nair serepein kan; re pahn doarehlahte pein irail pwehki arail pwung.’”+

21 “Pwe iet me Kaun Wasa Lapalahpie Siohwa ketin mahsanih: ‘Eri met pahn wiawi ni ei pahn kadarala ei kalokolok pahieu ko*+—kedlahs, lehk lapalap, mahn lawalo keper kan oh soumwahu lusulus+—ong Serusalem pwehn kemehla aramas oh mahn akan nan kahnimwo.+ 22 Ahpw, ekei me luhwehdi loale pahn pitila oh wisikieido,+ pwutak kan oh serepein kan. Re pahn kohdo rehmwail, oh ni amwail pahn kilang elen ar mour oh ar wiewia kan, kumwail uhdahn pahn nsenamwahukihla kahpwal me I wadohng pohn Serusalem, soahng koaros me I wiahiong kahnimwo.’”

23 “‘Kumwail pahn nsenamwahukihla ni amwail pahn kilang elen ar mour oh ar wiewia kan, oh kumwail pahn esehda me mie kahrepen ei wia dahme I anahne wiahiong kahnimwo,’+ Kaun Wasa Lapalahpie Siohwa me ketin mahmahsen.”