Wiewia

3 Piter oh Sohn ahpw kohdalahng ni tehnpas sarawio ni awahn kapakap, awa keduwau,* 2 oh ohl emen me neh mwoator sang ni eh ipwidi ahpw wisikdo. Rahn koaros re kin kihdi ih limwahn wenihmw en tehnpas sarawio me adaneki Lingan, pwe en kak peki mwohni sang rehn irail kan me kin pedolong nan tehnpas sarawio. 3 Ni eh kilangada Piter oh Sohn ara pahn pedolong nan tehnpas sarawio, e ahpw tepida pekipeki mwohni. 4 A Piter oh Sohn ahpw kilikilang ih, Piter eri nda: “Kilangdohng kiht.” 5 Ih eri kilanglahng ira, kasikasik me e pahn ale mehkot sang rehra. 6 Piter ahpw nda: “Sohte nei silper oh kohl, ahpw I pahn kihong uhk dahme I ahneki. Ni mwaren Sises Krais mehn Nasaret, alu!” 7 Ih eri koledi palimaunen peho oh kasihnenihada. Ni ahnsowohte neh ko oh keimwen neh ko ahpw kehlailda; 8 e ahpw lusda, tepida alialu oh iangirahla nan tehnpas sarawio, e ahpw kin alialu oh lusulus kapikapinga Koht. 9 Oh aramas koaros kilang eh alialu oh kapikapinga Koht. 10 Irail ahpw tepida kasawihada me iei ih ohl me kin mwomwohd oh awiawih en ale mwohni ni Wenihmw Lingan en tehnpas sarawio, re ahpw uhdahn pwuriamweikihla oh perenkihda kowahlap dahme wiawihong ih.

11 Ni ohlo eh wie kolokolete Piter oh Sohn, aramas ako koaros ahpw uhdahn pwuriamweila oh tangodohng irail wasa me adaneki Palangk en Solomon. 12 Ni Piter eh kilangada met, e ahpw ndaiong aramas ako: “Kumwail mehn Israel kan, dahme kumwail nohn pwuriamweikihla met oh dahme kumwail kangkakilkin kiht likamwete pein at kehl de at poadidiong Koht me kahrehiong en alu? 13 Koht en Eipraam, Aisek oh Seikop, Koht en samatail mehn mahs ako kalinganahdahr sapwellime Ladu Sises, me kumwail pangalahr oh kahmahmkilahr mwohn Pailet mendahki eh koasoanedier en lapwahda ih. 14 Ei, kumwail kahmahmkilahr ih me sarawi oh pwung, oh kumwail peki ohl emen me wia sounkam aramas en lapwadohng kumwail, 15 ahpw kumwail kemehla Wiliepe Lapalap en mour. Ahpw Koht ketin kaiasada ih sang rehn me melahr akan, oh kiht me sounkadehdepen ire wet. 16 Oh pwehki mware oh pwehki at pwoson mware, ohl menet me kumwail kilang oh ese kehlaildahr. At pwoson ih me kahrehiong ohl menet en uhdahn mwahula mwohmwail koaros. 17 Eri met, riei ko, I ese me kumwail sehse dahme kumwail wiewia, pil duwehte amwail kaun akan. 18 Ahpw Koht ketin mweidohng mepwukat en wiawi pwe en kapwaiada mehkan me e ketin pakairkier mwowe sang ni ewen soukohp ako koaros, me sapwellime Krais pahn lokolok.

19 “Eri, koluhla oh wiliakapwala pwe dipamwail kan en lapwada,* pwe ahnsoun nsenamwahu pahn kohsang rehn Siohwa* 20 oh e pahn ketin poaronehdo Krais me e ketin idihada ong kumwail, me iei Sises. 21 E anahne ketikette nanleng lao ahnsoun onohnsapahl en mehkoaros me Koht ketin mahsanih sang ni ewen sapwellime soukohp sarawi en mahs ako. 22 Ni mehlel, Moses koasoia: ‘Siohwa* amwail Koht pahn ketin idihada sang rehn riamwail kan soukohp emen me duwehte ngehi ong kumwail. Kumwail anahne rong dahme e ndaiong kumwail. 23 Ni mehlel, mehmen* me sohte kin rong Soukohpo pahn mwomwla douluhl sang rehn aramas akan.’ 24 Oh soukohp ako koaros, sang Samuel oh pil irail ko me kohdo mwuri, re pil lohkidahr ni sansal duwen rahn pwukat. 25 Kumwail iei nein soukohp ako seri oh pil serien inou lap me Koht ketin wiahiong samamwail mehn mahs ako ni eh ketin mahsanihong Eipraam: ‘Oh pwehki kadaudokomw, peneinei koaros nin sampah pahn ale kapai kan.’ 26 Mwurin Koht eh ketin idihada sapwellime Laduwo, e ketin poaronehdo mahs rehmwail pwe en ketin kapaiakumwailda ni eh ketin kahrehiong emenemen kumwail en sohpeisang amwail wiewia suwed kan.”