Madiu

26 Ni Sises eh ketin kaimwisekala mahsanih mepwukat koaros, e ahpw mahsanihong sapwellime tohnpadahk ko: 2 “Kumwail ese me rahn riau sang met, Pahsohpa pahn wiawi oh Nein-aramas pahn pengpengla rehn meteikan pwe ren kemehla nin tuhke pwoat.”

3 Kaunen samworo kan oh ohl mah kan en tohnwehio ahpw pokonpene nan wasa me imwen samworo lapalap me ede Kaiapas kelepene, 4 oh re kapwungada oh pwungkipene pwe ren salihedi* Sises ni ar pahn kinehda likamw* oh kemehla. 5 Ahpw re kin nda: “Ieremen ni ahnsoun kasarawio pwe aramas akan en dehr mwoarongkihda.”

6 Ni Sises eh ketiket ni imwen Saimon me tokutoko nan Pedani, 7 lih emen patohdo reh wa pwoatol alapaster en leh pwohmwahu me pweilaud oh tepida wudekihdiong leho pohn tapwio ni eh konokonot.* 8 Ni tohnpadahk ko ar kilangada met, irail lingeringerkihda oh nda: “Dahme met wiakaukilahr? 9 Pwe met kak netila ni mwohni laud oh kohieng me semwehmwe kan.” 10 Ni Sises eh mwahngihada duwen met, e ahpw mahsanihong irail: “Dahme kumwail songosong kedirapwahki lih menet? E wiahiong ie mehkot mwahu. 11 Pwe me semwehmwe kan kin mihmi rehmwail ahnsou koaros, a I sohte pahn mi rehmwail ahnsou koaros. 12 Pwe ni eh wudekihdiong leh pwohmwahu wet ni paliwereiet, e wia met pwe en kaunopiehda ong ei pahn seridi. 13 I ndaiong kumwail ni mehlel, wasa koaros me rongamwahu wet pahn lohkseli ie nin sampah pwon, dahme lih menet wia pahn pil lohkseli pwe en wia katamanpe.”

14 Emen me Ehk Riemeno, me adaneki Sudas Iskariot, ahpw kohla rehn kaunen samworo ko 15 oh nda: “Dahme kumwail pahn kihong ie pwe I en pangohng kumwail ih?” Re ahpw pwungkipene ren kihong ih silper 30. 16 Eri sang ahnsowo kohla, e kin raparapahki ahnsou mwahu pwe en pangala ih.

17 Ni keieun rahn en Pilawa me Sohte Doal Ihs, tohnpadahk ko patohdo rehn Sises, patohwan: “Ia wasa komw kupwurki sen kaunopadahng komwi en konote Pahsohpao ie?” 18 E mahsanih: “Kohla nan kahnimwo rehn ohl emen oh ndaiong, ‘Sounpadahko mahsanih: “Ei ahnsou leledohr; I pahn kasarawi Pahsohpa nan imwomw rehn nei tohnpadahk kan.”’” 19 Tohnpadahk ko eri wiahda dahme Sises ketin padahkihong irail oh kaunopada Pahsohpao.

20 Nin soutikpene, e ahpw ketidiong nin tehpelo rehn tohnpadahk 12. 21 Ni arail konokonot, e mahsanihong irail: “I ndaiong kumwail ni mehlel, emen kumwail pahn pangiehla.” 22 Irail eri nsensuwedkihla kowahlap duwen met, irail ahpw wademen, tepida patohwanohng: “Maing Kaun, ia duwe, kaidehn ngehi men?” 23 A e ketin sapeng mahsanih: “Mehmeno me iang ie kaduh kene pilawa nan pwohl wet iei me pahn pangiehla. 24 Mehlel, Nein-aramas pahn kohkohla duwehte me ntingdier duwen ih, ahpw meid suwediong aramaso me pahn pangala Nein-aramas! E pahn mwahu ong aramaso ma e sohte ipwidi.” 25 Sudas me pahn pangala ih, sapeng: “Rapai, kaidehn ngehi met?” A Sises mahsanihong: “Pein kowe me ndahda.”

26 Nindoken ar wie konokonot, Sises ahpw ketikihda lopwon en pilawa ehu oh mwurin eh ketin kapingkalahnganki, e pilitikihpeseng oh ketikihong tohnpadahk ko, mahsanih: “Kumwail ale oh tungoale. Met wehwehki paliwereiet.” 27 E ahpw ketin ale kep ehu, ketin kalahngankihong Koht oh ketikihong irail, mahsanih: “Kumwail koaros tungoale, 28 pwe met wehwehki ntahi me iei ‘ntahn inou lapo,’ me pahn kepwilipwildi pwe en mahkohng dipen aramas tohto. 29 Ahpw I pahn ndaiong kumwail: I solahr pahn pwurehng nim wain wet lao lel rahn me I pahn iang kumwail nim wain kapw nan Wehin Semei.” 30 Eri, mwurin arail melkahkahki melkahka en kaping kei,* re ahpw ketilahng ni Nahnahn Olip.

31 Sises ahpw mahsanihong irail: “Kumwail koaros pahn dipekelekel pwehki dahme pahn wiawihong ie pwongpwong wet, pwe e ntingdier: ‘I pahn kemehla silepen sihpwo, a pelin sihpwo pahn tangpeseng.’ 32 Ahpw mwurin ei pahn iasada, I pahn tiengla mwohmwail kohla Kalili.” 33 Ahpw Piter sapeng oh patohwanohng: “Mehnda ma meteikan koaros dipekelekel pwehki dahme wiawihong komwi, a I sohte mwahn pahn dipekelekel!” 34 Sises ahpw mahsanihong ih: “I ndaiong uhk ni mehlel, pwongpwong wet, mwohn malek eh pahn kakorot, ke pahn kahmahmkin ie pahn pak silipak.” 35 Piter ahpw patohwanohng: “Mehnda ma I pil anahne iang komwi pwoula, I soh mwahn pahn kahmahmkin komwi.” Tohnpadahk teiko koaros pil nda soahngohte.

36 Sises ahpw iang irail ketila wasa me adaneki Ketsemeni, oh e mahsanihong tohnpadahk ko: “Kumwail mwohndi wasaht erein ei pahn kolahng mwo oh kapakap.” 37 Oh e ketin kahrehda Piter oh nein Sepedi pwutak riemeno. E ahpw ketin pahtoula oh kupwure uhdahn ohla. 38 Ih eri mahsanihong irail: “I* uhdahn pahtoula mehlel, I kakete mehkihla. Kumwail mihmi met oh iang ie mwasamwasahn.” 39 E ahpw ekis ketilahsang wasao, poarikidiong silangi nanpwel, loulou mahsanih, “Ipa, ma kak, mweidohng kep wet en douluhlweisang ie. Ahpw kaidehn nsenei pwe kupwuromwihte.”

40 Ih eri sapahlla rehn tohnpadahk ko oh mahsanihada ar wie memeir, e ahpw mahsanihong Piter: “Kumwail sohte kak iang ie mwasamwasahnki awateieu? 41 Kumwail pousehlahte mwasamwasahn oh poadidiong kapakap pwe kumwail en dehr lohdiong nan songosong. Mehlel, mohngiong* me ngoang,* ahpw paliwar me luwet.” 42 E pil ketila keriapak oh loulou, mahsanih: “Ipa, ma e kak, mweidohng kep wet en douluhlwei ni ei sohte nim. Ahpw ma soh, eri kupwuromwihte en pweida.” 43 A e pil sapahlla oh mahsanihada ar wie memeir pwe meserail ko toutoukilahr ar men meir. 44 E ahpw ketilahsang irail, pwurehng ketieila oh loulou kesilipak, pwurehng mahsanih soahngohte. 45 Mwuri, e ahpw sapahlla rehn tohnpadahk ko oh mahsanihong irail: “Ni ahnsou duwehte met, a kumwail memeir oh komkommoal! Kilang! Awao kerendohr ong Nein-aramas eh pahn pengpengla rehn me dipan akan. 46 Kumwail uhda, kitail kohkohla. Kilang! Me pahn pangiehlao kerendohr.” 47 Ni eh mahmahsente, a kilang! Sudas, emen me Ehk Riemeno iangahki pokon laud ehu me wa kedlahs oh mehn wowoki pa leledo. Re kohdo sang rehn kaunen samworo ko oh me mah kan en tohnwehio.

48 Eri me pangala iho kihongehr irail kilel ehu ni eh nda: “Mehmen me I pahn metik, iei ih, kumwail ale oh salihedi.” 49 E inenlahngete Sises oh patohwan: “Kaselehlie maing Rapai!” e ahpw metik. 50 Sises ahpw mahsanihong: “Nahn, ia kahrepen omw mi me?” Irail ahpw kohieido oh poarehng Sises oh salihedi. 51 A kilang! emen iengen Sises ko usadahte nah kedlahso oh pelehte nein samworo lapalap laduwo, kihsang salengeo. 52 Sises eri mahsanihong: “Kapwurehiong noumw kedlahs en nan dewe, pwe koaros me kin doadoahngki kedlahs pahn mehkihla kedlahs. 53 Ia duwe, ke medewe me I sohte kak peki rehn Semei en ketikihong ie ahnsou wet, karis en tohnleng kan me tohtohsang karis* 12? 54 Ahpw ma I wia met, a ia duwen Nting Sarawi kan eh kak pweida me mahsanih me met anahne wiawi?” 55 Sises ahpw mahsanihong pokono: “Ia duwe, kumwail wisik kedlahs oh mehn wowoki kodohng salihiehdi duwehte amwail kin uhwong lipirap men? Ehuehu rahn I kin mwomwohd nan tehnpas sarawio padapadahk, kumwail ahpw sohte salihiehdi. 56 Ahpw mepwukat koaros wiawiher pwe nting kan* en soukohp ako en pweida.” Tohnpadahk ko koaros ahpw kesehla ih oh tangdoaui.

57 Irail ko me salihedi Sises kahrehla ih rehn samworo lapalapo Kaiapas, wasa me sounkawehwehn Kosonnedo oh ohl mah ko pokopokon ie. 58 Ahpw Piter ideidawehnte ih, ahpw ekis dohlahsang, e lao lel nan wasa me imwen samworo lapalapo kelepene. Mwurin eh pedolong, e mwohndi rehn ladu kan en ihmwo pwe e men kilang imwilahn met.

59 Ni ahnsowo, kaunen samworo ko oh tohn Sanedrin* pwon raparapahki mehn kadehde likamw ong Sises pwe re en kak kemehla. 60 Ahpw re sohte diarada mendahki sounkadehde likamw tohto pwarada. Mwuri, me riemen pwarada 61 oh nda: “Ohl menet nda, ‘I kak kamwerehdi tehnpas sarawi en Koht oh uhd kauwada erein rahn siluh.’” 62 Samworo lapalapo eri kesihnenda oh ndaiong ih: “Sohte omw pasapeng? Dahme ke pahn sapengki arail kedikedipahkin uhk?” 63 Ahpw Sises ketin nennenlahte. Samworo lapalapo eri ndaiong: “Kahukihong kiht ni manaman en Koht ieias, ma iei kowe me Krais, Sapwellimen Kohto!” 64 Sises mahsanihong ih: “Kowe me nda men. Ahpw I pahn ndaiong kumwail: Sang met kohla, kumwail pahn kilang Nein-aramas eh pahn ketidiong ni palimaun en manaman oh ketiket kohdo pohn depwek kan en nanleng.” 65 Samworo lapalapo ahpw tehrpeseng eh likou puhpo oh nda: “E lahlahwe! Mehnda rehtail pil ekei sounkadehde? Kilang! Kumwail rongehr eh lahlahwe. 66 Dahme kumwail lemeleme?” Irail sapeng, nda: “E warohng kamakamala.” 67 Irail ahpw kendipiong ni silangi oh pakereseli. A ekei pohr silangi, 68 ndinda: “Kowe, Krais, kohpadahng kiht. Ihs me poakih uhko?”

69 A Piter wie mwomwohd likio wasa me ihmwo kelepene, a lidu serepein men ahpw keiong mpe oh nda: “Kowe me pil iang Sises mehn Kalilio!” 70 Ahpw e kahmahmki mwohrail koaros oh nda: “I sehse dahme ke ndindahn.” 71 Ni eh kohieila wasa me karanih ewen kehlo, pil emen serepein kilangada ih oh ndaiong irail me mi wasao: “Ohl menet kin iang Sises mehn Nasareto.” 72 E pil pwurehng kahmahmkihla met oh kahula nda: “I sehse ihs ohlen!” 73 Mwurin ahnsou kis, irail me kesikesihnen wasao ahpw keilahng mpen Piter oh ndaiong: “Uhdahn kowe pil emen irail, pwe ni mehlel, ngoromwen kasalehda.” 74 E ahpw tepida keria pein ih oh kahula, nda: “I sehse ihs ohlen!” Ni ahnsowohte malek emen ahpw kakorot. 75 Oh Piter tamanda dahme Sises mahsaniho: “Mwohn malek eh pahn kakorot, ke pahn kahmahmkin ie pahn pak silipak.” E ahpw kohieila likio oh sengiseng kowahlap.