Sohp
2 Mwurin mwo, rahno ahpw leledo me sapwellimen Koht mehlelo ohl akan*+ kohlongodo pwe ren uh mwohn silangin Siohwa,+ oh Sehdan pil iang kohlongodo nanpwungarail pwehn uh mwohn silangin Siohwa.+
2 Siohwa eri ketin mahsanihong Sehdan: “Ke kohsang ia?” Sehdan ahpw sapeng Siohwa, patohwan: “I kakahnseli nin sampah oh kohkohseli wasa kan.”+ 3 Siohwa eri ketin mahsanihong Sehdan: “Ke kasawiher Sohp, ei laduwo? Sohte emen nin sampah me duwehte ih. Ih ohl pwung oh loalopwoat men,*+ e kin lemmwiki Koht oh soikala dahme suwed. E kin tengedihongete eh loalopwoat,+ mendahki omw song en kamwakid ie+ I en kauwehla* ih ni soh kahrepe.” 4 Ahpw Sehdan sapeng Siohwa, patohwan: “Aramas koaros kin nsenohki pein irail.* Aramas emen pahn mweidala mehkoaros me e ahneki pwehn doarehla eh mour.* 5 Ahpw, komw ketin kapahwei limomwi oh kauwehla tih oh uduke. E ahpw uhdahn pahn lahlahwei komwi mwohn silangomwi.”+
6 Siohwa eri ketin mahsanihong Sehdan: “Kilang! E mihla nan pehmwen!* Ihte ke dehpa kihsang eh mour!”* 7 Sehdan eri kohkohieila sang mwohn silangin Siohwa oh kalokehki Sohp mpwos kamedek kei*+ sang ni patehn neh leldahla pohn moange. 8 Oh Sohp eri ale diperen sah ohla ehu pwehn korehdki kilio, oh e mwomwohd nan pehs.+
9 En Sohp pwoudo eri ndaiong ih: “Ia duwe, ke tengedihongete omw loalopwoat? Lahlahwe Koht oh mehla!” 10 Ahpw e ndaiong ih: “Ke lokolokaiahn lih salamalam. Dah, kitail pahn alehte dahme mwahu sang Koht mehlelo oh sohte pil ale dahme suwed?”+ Ni mehkoaros me wiawiher, Sohp sohte dipada ni eh lokaia kan.*+
11 Kompoakepahn* Sohp meh silimen ahpw rongada duwen kahpwal koaros me lelohngehr ih, oh emenemen kohsang nan eh wasa—Elipas+ mehn Deman, Pildad+ mehn Suhah+ oh Sopahr+ mehn Naama. Irail eri pwungkihda ren tuhpene pwe ren kohla kansenamwahwih Sohp oh kasalehda ar poakehla ih. 12 Ni ar kilangada Sohp sang wasa doh, re sohte kak kasawihada me iei ih mwo. Re ahpw tepida sengiseng ni ngihl laud oh tehrpeseng ar likou kan, oh re sipedadahng pwelpar nan wehwe oh pohn moangarail kan.+ 13 Irail eri mwohndi reh nanpwelo erein rahn isuh oh pwohng isuh. Sohte me ndaiong ih lepin lokaia ehu, pwe re kilang me eh medeko uhdahn laud.+