Keieun Samuel
2 Ana eri kapakap, patohwan:
Eweiet sarapesengier pwehn sapeng ei imwintihti kan,
Pwe I kin perenkihda sapwellimomwi wiewiahn komour kan.
2 Sohte emen me sarawi duwehte Siohwa,
Sohte emen ahpw komwihte,+
Oh sohte paip ehu me duwehte at Koht.+
3 Kumwail tokedihsang amwail koasoi aklapalap;
Kumwail dehr mweidohng lokaia pohnmwahso kan en kohsang nan awamwail,
Pwe Siohwa iei Koht emen me mwahngih mehkoaros,+
Oh ih me kin ketin kadeikada ni pwung wiewia kan.
4 Nein ohl kehlail kan nair kesik ketieu kan timpesengier,
A irail kan me dipekelekel alehdier kehl.+
5 Irail me kin mwenge mwahu kan pahn pein koadoahkihada kanarail pilawa,
A me duhpek kan sohla pahn men mwenge.+
6 Siohwa kak ketin kemehla oh doarehla mour;
E kak ketkihdihlahng nan Sousou,* oh e kak ketin kapwourada.+
7 Siohwa kak ketin kasemwehmwehla ekei oh kakepwehpwehla ekei;+
E kak ketin kasapwildi oh kasapwilda.+
8 E kin ketin kasihnenihada me tikitik sang nan pwelpar;
E kin ketin pwekada me semwehmwe sang nan koasoakoasoak en pehs,*+
Pwehn kamwodahngiraildi rehn me lapalap akan,
Oh ketikihong irail dehu wahu kan.
Siohwa me ketin sapwellimanki uhr en sampah kan,+
Oh e ketikihdi sahpw pwelmwahu pohrail.
9 E kin ketin sinsile elen sapwellime aramas loalopwoat kan,+
A me suwed kan pahn kasohrala nan rotorot,+
Pwe sohte aramas emen kin pweida sang ni pein eh kehl.+
10 Siohwa pahn ketin kasohrehla irail akan me kin peiong ih;+
E pahn ketin ngirisekdiong pohrail sang nanleng.+
11 Elkana eri pwurala ni imweo nan Rama, ahpw kisin pwutako wiahla sapwellimen Siohwa sounpapah men+ pahn kaweid en samworo Ilai.
12 Nein Ilai pwutak ko wia ohl suwed kei;+ ira sohte mwahn kin nsenohki Siohwa. 13 Ih met me ira kin wiewia me pid pwaisen samworo kan sang aramas ako:+ Ahnsou koaros me aramas emen kin wiahda eh meirong, nein samworo sounpapah men kin wa kohdo pwohk me kasang siluh ni ahnsou me uduko kin pwoapwoail, 14 oh e kin doakoahlong nan peisino, de einpwoat me mehn kolokol riau, de einpwoat lapala, de einpwoat me mehn kolokol ehute. Sohte lipilipil dahme pwohko pahn doakoahsang, samworou pahn ale kene. Ih me re kin wiewia nan Sailo ong aramas koaros me kin kohla wasao. 15 Oh pil, mwohn aramas emen eh kin isikala wih en meirongo oh ediniei pwarada,+ nein samworo sounpapaho kin kohdo oh nda: “Kihdo kenen samworou uduk pwe I en inimada. E sohte pahn alehsang uhk uduk pwoail, pwe me amaste.” 16 Ni aramaso eh kin ndahng: “Mweidohng irail en isikala mahs wih en meirongo oh ediniei en pwarada,+ mwuri ke kak ale dahme ke mwahuki,” a e kin nda: “Soh, kihong ie met; ma soh, I pahn adihasang uhk!” 17 Eri dipen sounpapah ko inenen laudla mwohn silangin Siohwa,+ pwehki ohl ako mwamwahlkihla meirong kan ong Siohwa.
18 Met Samuel kin wie papah+ mwohn silangin Siohwa mendahki e wiahte kisin pwutak men, oh e kin likawih ihpod* linen ehu.+ 19 Oh pil, eh nohno kin wiahda kisin likou reirei me sohte peh, oh e kin wahdahla reh ni ahnsou me e kin iangih eh pwoudo kohdahla wia meirong en ehuehu sounpar.+ 20 Oh Ilai kapaiahda Elkana oh eh pwoudo oh nda: “Siohwa en ketikihong uhk seri men sang omw pwoudet pwehn wiliandi memenet me kumwa patohwanohngehr Siohwa.”+ Ira eri pwurala ni imwarao. 21 Siohwa eri ketin kupwuramwahwih Ana, pwe en kak liseianda;+ oh e naitikihada pwutak silimen oh serepein riemen. Oh kisin pwutak Samuel eri kin wie kekeirda mwohn silangin Siohwa.+
22 A met Ilai inenen likeilapalahr, ahpw e rongehr duwen soahng koaros me nah pwutak ko kin wiewiahiong+ Israel pwon oh duwen ara kin wendi rehn lih akan me kin papah ni wasahn pedolong en impwal en mihtingo.*+ 23 Ilai kin ndaiong ira: “Dah kumwa kin wiewiahki soahng pwukat? Pwe soahng kan me I kin rongasang aramas koaros duwen kumwa uhdahn suwed. 24 Ieremenehr samwa ko, rohng kan me I kin rong me sapwellimen Siohwa aramas akan kin koasoakoasoia sohte mwahu. 25 Ma aramas emen wiahda dihp ong emen, emen tohrohr pahn kak peki rehn Siohwa en ketin sewese ih;* ahpw ma aramas emen wiahda dihp ong Siohwa,+ ihs me kak kapakapki aramaso?” Ahpw ira kahng rong ara pahpao, pwehki Siohwa ketin koasoanedier en kemeirahla.+ 26 Erein ahnsowo, kisin pwutako Samuel ahpw wie kekeirda oh kenikenla rehn Siohwa oh pil aramas akan.+
27 Ohl emen me Koht ketin poaronehla rehn Ilai ahpw ndaiong ih: “Ih met me Siohwa ketin mahsanih: ‘I sou kasalehdahr duwen pein ngehi ong semomw mehn mahso oh eh peneinei ni arail mihmi nan Isip nin duwen lidu kei nan imwen Parao?+ 28 Oh ih me pilipilda nanpwungen keinek en Israel koaros+ pwehn papah ie nin duwen ei samworo oh en kin kohla ni ei pei sarawio+ pwehn wiahda meirong kan, pwehn isik warpwohmwahu,* oh likawih ihpod mwohn silangi; oh I kihong ih oh kadaudoke kan meirong koaros me mehn Israel kan* kin wiahda ni ar kin doadoahngki kisiniei.+ 29 Dahme kumwail ohl akan kin mwamwahliki meirong oh kisakis kan ong ie me I koasoanehdi en kin wiawi nan tehnpesei?+ Dahme ke kin waunekihki noumw pwutak kan laudsang ie ni amwail kin mworouroukihla pali me keieu mwahu en meirong koaros me nei aramas akan nan Israel kin kihda?+
30 “‘Ihme kahrehda iet mahsen en Siohwa, Koht en Israel: “Ei, I mahsanih me omw peneinei oh peneinei en semomw mehn mahso pahn kin kekeid mwohi ahnsou koaros.”+ Ahpw met Siohwa ketin mahsanih: “Met solahr pahn wiawi, pwehki I pahn wauneki irail kan me kin waunekin ie+ oh I pahn mwamwahliki irail kan me kin mwamwahlikin ie.” 31 Kilang! Rahn akan pahn kohdo ni ahnsou me I pahn kihsang omw kehl* oh kehl en peneinei en semomw mehn mahso, pwe sohte emen nan omw peneinei pahn momour lao e likeilapala.+ 32 Oh ke pahn kin kilang imwintihti men nan tehnpesei erein soahng mwahu kan koaros ar pahn kin wiawihong Israel,+ oh sohla douluhl pahn mie me mah nan omw peneinei. 33 Emen noumw ohl me I sohte pahn ketikihsang en papah ni ei pei sarawio pahn kahrehiong mesomw kan en luwetala oh wadohng uhk pahtou, ahpw me tohto nan omw peneinei pahn mehkihla nein aramas kedlahs.+ 34 Oh dahme pahn wiawihong noumw pwutak riemeno, Opni oh Pineas pahn wia kilel ehu ong uhk: Ira koaros pahn mehla ni rahnteieu.+ 35 I pahn idihada pein nei samworo lelepek men.+ Eh wiewia kan pahn kin pahrekiong dahme I kin kupwurki nan ei mohngiong; oh I pahn kauwada imwe* me pahn poatopoat, oh e pahn kin kekeid mwohn me I keiehdiero ahnsou koaros. 36 Koaros me luwehdi nan omw peneinei pahn kin kohdo oh poaridiong ih pwehn ale mwohni ong pweinen doadoahk oh lopwon en pilawa ehu, oh re pahn kin nda: “Menlau mweidohng ie I en wia ehu pwukoahn samworo kan pwe I en kak tungoale ekis pilawahn.”’”+