Keieun Kronikel
10 Eri mehn Pilisdia kan wie mahmahweniong Israel. Oh ohlen Israel kan tangasang mehn Pilisdia kan, oh me tohto kamakamala pohn Nahna Kilpoa.+ 2 Mehn Pilisdia ko pwakipwakihete oh karakaranih Sohl oh nah pwutak ko, oh mehn Pilisdia ko kemehla nein Sohl pwutak ko Sonadan, Apinadap, oh Malkisuha.+ 3 Mahweno inenen ukla ong Sohl, oh sounkesik ketieu ko ahpw diarada ih, oh re kahrehiong eh ohla.+ 4 Sohl eri ndaiong nah sounwa tehtehn mahweno: “Usada noumw kedlahsen oh doakoahkiniehdi, pwe ohl soh sirkumsais pwukat en dehr kohdo oh wiakauwe+ ie.” Ahpw nah sounwa tehtehn mahweno sohte men wia met pwehki e uhdahn masak. Sohl eri ale nah kedlahso oh pein lukupoardiong powe.+ 5 Ni sounwa tehtehn mahweno eh kilang me Sohl melahr, e pil pein lukupoardiong pohn nah kedlahso oh mehla. 6 Eri Sohl oh nah pwutak silimeno mehla, oh tohn eh peneinei ko koaros* pil iang mehla.+ 7 Ni ahnsou me aramas en Israel koaros nan wahwo* esehda me koaros tangehrdoaui oh pil Sohl oh nah pwutak ko melahr, re ahpw tepida kohkohsang nan arail kahnimw kan oh tangdoaui; mehn Pilisdia ko eri kohdo oh kousoanla nan kahnimw ko.
8 Mandahn rahno, mehn Pilisdia kan ahpw kohla pwe ren kihsang dipwisou kan rehn me kamakamalahr ko, irail eri kilangada me Sohl oh nah pwutak ko kamakamalahr pohn Nahna Kilpoa.+ 9 Irail eri kulih oh lupukasang moangeo oh kihsang eh likoun mahweno oh re kadarpeseng rohng nan sapwen mehn Pilisdia kan ren pakairkiseli rohng wet ong arail dikedik kan+ oh aramas akan. 10 Irail eri kihdi eh likoun mahweno nan imwen kaudok en ar kohto oh langahda moangeo nan imwen Dakon.+
11 Eri ni tohn Sapes+ koaros nan Kilead ar rongada mehkoaros me mehn Pilisdia kan wiahiong Sohl,+ 12 sounpei kan koaros ahpw uhda oh wahsang paliweren Sohl oh nah pwutak ko. Re wairaildohng Sapes oh sarepedi tihrail kan pahn tuhke lapalao nan Sapes,+ oh re kaisihsolki erein rahn isuh.
13 Sohl eri mehkihla eh salelepekiong Siohwa pwehki eh sohte peikiong mahsen en Siohwa+ oh pil eh peksawas rehn sounwunahni men+ 14 a kaidehn rehn Siohwa. Eri E ketin kemehla ih oh ketikihong Depit nein Sehsi+ mwoalen nanmwarki.