Keieun Kronikel

11 Kedekedeo, mehn Israel koaros ahpw pokonpene rehn Depit nan Ipron+ oh nda: “Kilang! Kiht iei kisehn tihmw kan oh udukomw.*+ 2 Mahso ni ahnsou me Sohl wia nanmwarki, komwi me kin kahluwa Israel nan eh mahwen kan.*+ Oh Siohwa omw Koht ketin mahsanihong komwi: ‘Kowe me pahn apwalih nei aramas en Israel kan, oh kowe me pahn kaunda nei aramas en Israel kan.’”+ 3 Eri ohl mah en Israel koaros ahpw kohdo rehn nanmwarkio nan Ipron, oh Depit wiahda inou lap ehu rehrail nan Ipron mwohn silangin Siohwa. Irail eri keiehdi Depit nin duwen nanmwarkien Israel,+ duwehte mahsen en Siohwa sang Samuel.+

4 Mwuhr Depit oh mehn Israel kan koaros ahpw kolahng Serusalem me iei Sepus,+ wasa me mehn Sepus kan+ wie koukousoan ie nan sahpwo. 5 Tohn Sepus kan kin kepitki Depit, nda: “Ke sohte pahn kak kohdo wasaht!”+ Ahpw, Depit kalowehdi wasahn ruk kehlail en Saion,+ me ahnsou wet wialahr Kahnimw en Depit.+ 6 Depit eri nda: “Mehmen me tepin mahweniong mehn Sepus kan pahn wiahla kaunen karis en sounpei.” Oh Sohap+ nein Seruaia me tepin kohdahla oh ih me wiahla kaun. 7 Depit eri kousoanla nan wasahn ruk kehlailo. Ihme kahrehda re kahdanekihla wasao Kahnimw en Depit. 8 E tepida kauwada dihd kan oh ihmw teikan pidakihpene, sang pohn Dohlo* kohla lel wasa kan me mi limwah, oh Sohap onehda sapahl wasa kan me luhwe nan kahnimwo. 9 Depit eri kin wie kekehlailla,+ oh Siohwa kaunen karis en sounpei kin ketin ieiang ih.

10 Iet kaun akan en nein Depit sounpei kehlail kan, me iang mehn Israel kan koaros utungada ih nin duwen arail kaun. Irail koaros sewese ih en wiahla nanmwarki, duwehte me Siohwa ketin inoukihong Israel.+ 11 Iet eden nein Depit sounpei kehlail kan: Sasopeam+ emen kadaudok en Akmoni, kaunen meh silimeno.+ Ehu ahnsowo, e kemehkihla nah ketieuwo aramas daulih 300.+ 12 Mwurin ih iei Eliesar+ nein Dodo mehn Ahoio.+ Ih emen kisehn sounpei kehlail silimeno. 13 E mi rehn Depit nan Pas-dammim,+ wasa me mehn Pilisdia kan pokonpenehn mahwen. Mie pelien sahpw ehu me diren parli, oh sounpei ko tangdoauier pwehki mehn Pilisdia ko. 14 Ahpw e sokedi tengeteng nanwerengen mwahto oh kin doandoare, oh pil kemekemehla mehn Pilisdia ko, Siohwa eri ketin kahrehiong irail en uhdahn kana.*+

15 Meh silimen sang nanpwungen kaun 30 kohdihla ni takaio rehn Depit nan pwoaren paip en Adullam,+ nindoken karis en Pilisdia ehu ar kauwada imwarail impwal kan nan Wahun* Repaim.+ 16 Ni ahnsowo Depit mi nan wasahn ruk kehlailo, oh pwihnen sounpei en mehn Pilisdia ehu mihmi nan Pedleem. 17 Depit eri kasalehda dahme e mwahuki: “I mentehno nimala ekis pilen pwoaren nahk pihl me mi ni ewen kelen Pedleem!”+ 18 Meh silimeno eri nantihlong nan kahnimpwal en mehn Pilisdia ko oh idipada pihl sang nan pwoaren nahk pihl me mi ni ewen kelen Pedleem oh wadohng rehn Depit; ahpw Depit sohte men nim pihlo oh wudekihla mwohn silangin Siohwa. 19 E ahpw nda: “I sohte kak medewehda I en wia met, pwehki I lemmwiki Koht! Ia duwe, I pahn nim ntahn ohl pwukat me kihong arail mour* nan keper?+ Re pangala ar mour* pwe ren wahdo pihlet.” Ih eri sohte nim pihlo. Ih mepwukat me nah sounpei kehlail silimeno wia.

20 Apisai+ rien Sohap pwutako+ pil wiahla kaunen meh silimen; e kemehkihla nah ketieuwo aramas daulih 300, oh e ndandla duwehte meh silimeno.+ 21 Nanpwungen irail meh silimenet, e ndand sang meh riemeno, oh ih me arail kaun; ahpw e sohte pahrekiong tepin meh silimeno.

22 Penaia+ nein Sehoiada iei ohl kommwad men me wiadahr soangen wiewia kommwad kei nan Kapseel.+ E kemehla nein Ariel en Mohap nah pwutak riemen oh doudihla nan pwarer ehu ni ahnsoun sinoh oh kemehla laion emen.+ 23 E pil kemehla lapalahn ohlen Isip men—me reireiki kiupid* limau.+ Mendahki ohlen Isipo kolokol nah ketieuwo duwehte tuhke reirei me sounpahda likou kan kin doadoahngki,+ e peikihong ih lepin tuhke pwoat oh adihasang ketieuwo nan pehn mehn Isipo oh kemehkihla ketieuwo.+ 24 Ih soahng pwukat me Penaia nein Sehoiada wiahda, oh e ndand duwehte sounpei kehlail silimeno. 25 Mendahki e inenen ndand sang meh siliakano, e sohte pahrekiong meh silimeno.+ Ahpw Depit idihada ih en kin apwahpwalih silepe ko.

26 Sounpei kehlail kan en karis ko iei Asahel+ rien Sohap, Elanan nein Dodo sang Pedleem,+ 27 Sammod mehn Eiror, Eles mehn Pelon, 28 Aira+ nein Ikkes mehn Tekoa, Apieser+ mehn Anadod, 29 Sippekai+ mehn Usa, Ailai mehn Ahoi, 30 Maharai+ mehn Netopa, Eled+ nein Paanah mehn Netopa, 31 Idai nein Ripai mehn Pensamin+ sang Kipea, Penaia mehn Piradon, 32 Urai sang nan wahu en Kaas+ kan, Apiel mehn Arapa, 33 Asmaped mehn Pahurim, Eliapa mehn Saalpim, 34 nein Asem pwutak kan mehn Kison, Sonadan nein Sakee mehn Arar, 35 Aaiam nein Sakar mehn Arar, Elipal nein Ur, 36 Ehper mehn Mekera, Ahisa mehn Pelon, 37 Esro mehn Karmel, Naarai nein Espai, 38 Soel rien Nadan, Mipahr nein Akri, 39 Selek mehn Ammon, Naharai mehn Peerod, sounwa tehtehn mahwen ong Sohap nein Seruaia; 40 Aira mehn Idri, Karep mehn Idri, 41 Uraia+ mehn Id, Seipad nein Alai, 42 Adina nein Saissa mehn Reupen, kaunen mehn Reupen kan oh meh 30 iangih; 43 Ahnan nein Maaka, Sosapat mehn Midan, 44 Ussaia mehn Astarod, Sama oh Seiel nein Odam mehn Aroer; 45 Sediael nein Simrai, oh Soaa rie mehn Tis; 46 Eliel mehn Maapa, Seripai oh Sosapaia nein Elnaam pwutak, oh Idma mehn Mohap; 47 Eliel, Oped oh Saasiel mehn Mesopa.