Keieun Kronikel
14 Nanmwarki Airam+ en Dair ahpw kadarala meninkeder kei rehn Depit, iangahki tuhke sidar, sounwia takai* oh deiksang kan pwe ren kauwada tehnpas ehu ong ih.+ 2 Oh Depit ese me Siohwa ketin katengehdi ih teng nin duwen nanmwarkien Israel,+ oh E ketin wiahiong ih en wiahla nanmwarki lapalap men pwehki sapwellime aramas en Israel kan.+
3 Depit eri katohtowehla eh pwoud kan+ nan Serusalem oh Depit nainekihda pil ekei pwutak kan oh serepein kan.+ 4 Iet eden seri kan me ipwidiong ih nan Serusalem:+ Samua, Sohpap, Nadan,+ Solomon,+ 5 Ipar, Elisua, Elepelet, 6 Noka, Nepek, Sapia, 7 Elisama, Peeliada oh Elipelet.
8 Ni mehn Pilisdia kan ar rongada me Depit keidier nin duwen nanmwarkien Israel pwon,+ mehn Pilisdia kan koaros eri kohdahdo rapahki Depit.+ Ni Depit eh rongada duwen met, e ahpw kohla mahweniong irail. 9 Eri mehn Pilisdia ko ahpw kohdo oh tepida mahwen nan Wahun* Repaim.+ 10 Depit eri kalelapek rehn Koht, patohwan: “I en patohdahla rehn mehn Pilisdia ko? Komw pahn ketikihong irail nan pehiet?” Siohwa eri ketin mahsanihong ih: “Kohdahla, pwe I uhdahn pahn kihong irail nan pehmwen.”+ 11 Depit eri kohla Paal-perasim,+ oh e kaloweiraildi wasao. Depit eri nda: “Koht mehlelo ketin kauwehla ei imwintihti kan sang ni pehi kat rasehng dihd ehu me pihl kamwerehdi.” Ihme kahrehda re kahdaneki wasao Paal-perasim.* 12 Mehn Pilisdia ko kesehdi arail koht kan wasao, oh ni Depit eh ruwes, koht pwukat ahpw isihsla.+
13 Mwuhr mehn Pilisdia kan pil pwurehng pwurodo mahwen nan wahwo.*+ 14 Depit eri pwurehng kalelapek rehn Koht, ahpw Koht mehlelo ketin mahsanihong ih: “Ke dehr inendahla rehrail, ahpw pidekla mwurirail oh mahweniong irail mwohn tuhke peika kan.+ 15 Oh ni omw pahn rongada ngilen karis kohkohwei pohn tuhke peika ko, eri tepida mahwen, pwe Koht mehlelo pahn ketin tiengla mwohmw pwe en ketin kemehla karis en sounpei en mehn Pilisdia kan.”+ 16 Depit eri kapwaiada soahng koaros me Koht mehlelo ketin ruwesehki ih,+ oh re kemehla karis en mehn Pilisdia ko sang Kepa lel Keser.+ 17 Oh en Depit ndand ahpw kohpeseng nan sahpw akan koaros, oh Siohwa ketin kahrehiong wehi kan koaros ren masak Depit.+