Esekiel

1 Ni kesilihsek en sounpar,* ni kelimaun rahn en kapahieun sounpwong, ni ei mihmi nanpwungen aramas kalipilipala kan+ limwahn pillap Kihpar,+ nanleng pa ritpeseng oh I ahpw tepida kilangada kaudiahl en Koht kan. 2 Ni kelimaun rahn en sounpwongo—me iei, ni kelimaun sounpar en kalipiliplahn Nanmwarki Sehoiakin+— 3 Siohwa ketin mahseniong Esekiel* nein samworo Piusa limwahn pillap Kihpar nan sapwen mehn Kaldia kan.+ Limen Siohwa ahpw kohdiong powe wasao.+

4 Ni ei kilikilengla, I kilangada kisinieng kehlail ehu+ kohkohdo sang paliepeng, oh mie lapalahn pelien depwek ehu oh piripir en kisiniei*+ me marain lingaling ehu kapilpene, oh nanwerengen kisinieio mie mehkot ehu me duwehte mwomwen mete lingaling.*+ 5 Oh nanwerengeo mie mwohmw kei me duwehte menmour pahmen,+ oh mwomwen emenemen irail duwehte mwomwen aramas emen. 6 Emenemen irail mas pahieu oh pehnpihr pahieu.+ 7 Nehrail ko inen, oh patehn nehrail ko duwehte patehn nehn koupwul men, oh nehrail ko lingaling duwehte lingan en prons melengileng.+ 8 Mie pehn aramas rehrail me mi pahn ar pehnpihr kan ni pali pahieu ko koaros, oh irail meh pahmen pwukat mie masarail oh ar pehnpihr kan. 9 Ar pehnpihr kan doakpene. Re sohte kin wetseli ni ar kin mwekidwei; emenemen irail kin mwekid kohwei mwowe.+

10 Emenemen menmour pahmen ko mie mwohmw pwukat: Mesen aramas me mi mwowe, mesen laion+ me mi palimaun, mesen kouwol+ me mi palimeing oh mesen+ ikel+ me mi likinpaiki. 11 Ih mwomwen masarail kan met. Ar pehnpihr kan kohpeseng pohrail. Emenemen mie eh pehnpihr riau me doakpene oh pehnpihr riau me pwaindi paliwararail kan.+

12 Emenemen irail kin mwekid kohwei mwowe, kohla wasa sohte lipilipil me ngehn sarawi* kin kamwakid irail en kohla ie.+ Re sohte kin wetseli ni ar kin mwekidwei. 13 Oh mwomwen menmour ko duwehte mwoalus okohk, oh mehkot me duwehte mehnser en kisiniei marain kin mwekimwekid kohwei kohdo nanpwungen menmour ko, oh lioal kin piripirsang nan kisinieio.+ 14 Oh ni ahnsou me menmour ko kin mwekidwei oh pwurodo, ar mwekid kin rasehng lioal eh kin pir.

15 Ni ei kilikilang menmour ko, I kilangada daia ehu me leldiong pohn pwehl limwahn emenemen menmour mas pahieu ko.+ 16 Daia ko oh mwomwen ar wiawihdao lingaling duwehte krisolaid, oh meh pahieu ko duwepenehte. Mwomwen daia ko oh mwomwen ar wiawihdao duwehte daia ehu eh mi nan ehu daia.* 17 Ni ar kin mwekid, irail kak kohla sohte lipilipil ni keimw pahieu kan ahpw re sohte kin wetseli ni ar mwekidwei. 18 Rim ko uhdahn ile me kahrehda re kapwuriamwei, oh ni rim pahieu ko koaros pwoaren mas tohr me kapilpene.+ 19 Ahnsou koaros me menmour ko kin mwekid, daia ko kin iangirailte mwekid, oh ni ahnsou me menmour ko kin pwekipwekda sang pohn pwehl, daia ko pil kin pwekipwekda.+ 20 Re kin kohla wasa me ngehn sarawi* kin kamwakid irail en kohla ie, sohte lipilipil wasa me ngehn sarawi pahn kohla ie. Daia ko pahn iangirailte pwekipwekda, pwe ngehn sarawi me kin kamwakid menmour ko pil mi ni daia ko. 21 Ni ar kin mwekid, mepwukat pil kin mwekid; oh ni ar kin uhdi, mepwukat pil kin uhdi; oh ni ar kin pwekipwekda sang pohn pwehl, daia ko kin iangirailte pwekipwekda, pwe ngehn sarawi* me kin kamwakid menmour ko pil mi ni daia ko.

22 Pohnangin moangen menmour ko mie mehkot me duwehte mwomwen taht ehu me lingaling duwehte krisdal* kapwuriamwei, oh e kohpeseng pohnangin moangarail ko.+ 23 Pahn tahto ar pehnpihr ko inen,* inenlahng meteio. Emenemen irail mie ar pehnpihr riau ong pwaindi apali paliwararail oh meh riau ong pwaindi pali teio. 24 Ni ei rongada ngilen ar pehnpihr kan, e duwehte ngilen ngirisek en pihl, duwehte ngilen me Keieu Manamano.+ Ni ar kin mwekid, e duwehte ngilen karis en sounpei ehu. Ni ar kin uhdi, re kin kamwoatoahrehdi ar pehnpihr kan.

25 Mie ngihl ehu pohnangin tahto pohn moangarail kan. (Ni ar kin uhdi, re kin kamwoatoahrehdi ar pehnpihr kan.) 26 Pohnangin tahto me mi pohn moangarail ko mie mehkot me mwomwe duwehte takai sapair pwoat,+ oh e duwehte mwoahl ehu.+ Emen me mwomwe duwehte aramas ketiket pohn mwoahlo powe.+ 27 Sang ni lukopeo kohda,* I kilangada mehkot me wie linglingaling duwehte mete lingaling ehu,+ duwehte kisiniei ehu me wie linglingaling; oh sang ni lukopeo kohdi, I kilangada mehkot ehu me duwehte kisiniei.+ Marain lingaling ehu kapilpene ih wasa koaros 28 me duwehte ahia pwoat+ nan depwek ehu ni rahnen keteu. Ih mwomwen marain lingaling me kapilpeneo eh pwarada. E duwehte lingan en Siohwa.+ Ni ei kilangada met, I poaridiong nanpwelo oh tepida rong kapitien emen me mahmahsen.