Esekiel
29 Ni kaeisek en sounpar, ni kaeisek en sounpwong, ni kaeisek riaun rahn en sounpwongo, Siohwa ketin mahsanihong ie: 2 “Nein-aramas, sohpeilahng Parao nanmwarkien Isip, oh wia kokohp ong ih oh Isip pwon.+ 3 Koasoia mahsen pwukat: ‘Iet me Kaun Wasa Lapalahpie Siohwa ketin mahsanih:
“Parao nanmwarkien Isip, I kin uhwong uhk,+
Mahn kalaimwun en nansed me wonohn nanpwungen dahu kan en eh Nail,*+
Me nda, ‘Ngehi me ahneki Pillap Nail.
I wiahda ong pein ngehi.’+
4 Ahpw I pahn kihong kehs kan nan ewomw oh wiahiong mwahmw kan en omw Nail en tengediong ni wunomw kan.
I pahn apihiukada sang nan omw Nail iangahki mwahmw koaros en Nail me tengediong ni wunomw kan.
5 I pahn keseiukala nan sapwtehn, kowe oh mwahmw koaros en omw Nail.
Ke pahn pwupwudi nan mohso, oh ke sohte pahn rikirikpene de pil kohpene.+
I pahn kihiukala nin duwen kenen mahn lawalo en sampah kan oh menpihr en pahnlahng kan.+
6 Eri tohn Isip koaros pahn anahne ese me ngehi me Siohwa,
Pwe re sohte mwahusang reh meng pwoat* ni ar utung wehin Israel.+
7 Ni ar koledi pehmwen, ke mwutpene,
Oh ke kahrehiong irail en tehrpeseng pwopwarail kan.
8 “‘Kahrehda iet me Kaun Wasa Lapalahpie Siohwa ketin mahsanih: “I pahn wadohng uhk kedlahs pwoat,+ oh I pahn kamwomwala aramas oh mahn akan sang rehmw. 9 Sapwen Isip pahn wiahla wasa ehu me tehnla oh mwomwla;+ oh re pahn anahne ese me ngehi me Siohwa, pwe ke* nda, ‘Ngehi me ahneki Pillap Nail; Ngehi me wiahda.’+ 10 Eri I kin uhwong uhk oh omw Nail, oh I pahn wiahiong sapwen Isip en mwomwla oh madada, wasa tehn ehu,+ sang Mikdol+ lel Saiini+ lel ni irepen Idiopia. 11 Sohte aramas de pil pelinmen pahn keid wasao,+ oh sohte me pahn kousoan wasao erein sounpar 40. 12 I pahn wiahiong sapwen Isip en wia sahpw ehu me keieu tehnla, oh eh kahnimw kan pahn wia kahnimw keieu tehnla kei erein sounpar 40;+ oh I pahn kamwarakpeseng mehn Isip kan nan wehi kan oh kihirailpeseng nan sahpw kan.”+
13 “‘Pwe iet me Kaun Wasa Lapalahpie Siohwa ketin mahsanih: “Mwurin sounpar 40 I pahn kapwurepene mehn Isip kan sang rehn aramas akan wasa me re mwarahkpeseng ie;+ 14 I pahn kapwurehdo mehn Isip me selidi kan nan sapwen Padros,+ sahpw me re kohsang ie, oh wasao re pahn wiahla wehi sohte wad ehu. 15 Isip pahn luwet sang wehi teikan oh sohla pahn kaunda wehi teikan,+ oh I pahn wiahiong irail en uhdahn tikitikla kahrehda re sohte pahn kak kalowehdi wehi teikan.+ 16 E solahr pahn pwurehng wia utupen koapworopwor ong wehin Israel,+ ahpw ihte e pahn katamankin irail ar sapwung ni ar sohpeiong mehn Isip kan pwehn peki sawas. Oh re pahn anahne ese me ngehi me Kaun Wasa Lapalahpie Siohwa.”’”
17 Eri ni kerieisek isuhwen sounpar, ni keieun sounpwong, ni keieun rahn en sounpwongo, Siohwa ketin mahsanihong ie: 18 “Nein-aramas, Nanmwarki Nepukadnesar*+ en Papilon wiahiong nah karis en sounpeio ren doadoahk laud pwehn mahweniong Dair.+ Moangarail kan koaros koimadla, oh pwopwarail kan koaros topwala. Ahpw ih oh nah karis en sounpeio sohte alehdi pweinen doadoahk me e wiahiong Dair.
19 “Eri, iet me Kaun Wasa Lapalahpie Siohwa ketin mahsanih, ‘I pahn kihla sapwen Isip rehn Nanmwarki Nepukadnesar* en Papilon,+ oh e pahn wahsang eh kepwe kan oh ale dipwisou lohdi tohto oh kulihasang; oh ih met me pahn wia pweinen doadoahk ong nah karis en sounpeio.’
20 “‘Me pid pweinen eh doadoahk ni eh mahweniong ih,* I pahn kihong ih sapwen Isip pwehki ar doadoahk ong ie,’+ Kaun Wasa Lapalahpie Siohwa me ketin mahmahsen.
21 “Rahno I pahn wiahiong apwoat kod en wosada ong wehin Israel,*+ oh I pahn kihong uhk ahnsou mwahu ehu ken koasoi nanpwungarail; oh irail pahn anahne ese me ngehi me Siohwa.”