Melkahka kan
Ong sounpihtih keseng; me pid duwen Kidid.* En kadaudok en Kora kan melkahka.+
84 Maing Siohwa kaunen karis en sounpei,
Ia uwen ei uhdahn poakohng* sapwellimomwi impwal sarawi lapo!+
2 I ngoangkilahr ni mohngiong unsek,
Ei, I lipwongmaskilahr ei ngoangki
Mi nan wasa kelpene kan ni tehnpesen Siohwa.+
Mohngiongiet oh paliwereiet kin weriwerki peren ong Koht ieias.
3 Menpihr pil kin diar dewe wasao
Oh kisin menpihr* kin wiahda pese,
Wasa me e pahn apwalih nah kan ie
Limwahn sapwellimomwi pei sarawi lapo, Maing Siohwa kaunen karis en sounpei,
Ei Nanmwarki oh ei Koht!
4 Meid peren irail akan me kin kousoan nan tehnpasomwi!+
Re kin pousehlahte kapikapinga komwi.+ (Selah)
5 Meid peren aramas akan me kin ale kehlparail sang rehmwi,+
Me mohngiongirail kin inengieng ahl me kolahng tehnpasomwi.
6 Ni ar kotehla Wahun Peika,*
Re wiahkihla wasao wasahn utuhnpihl akan;
Oh tepin keteu audehkihla wasao* soahng mwahu kan koaros.
7 Ni ar pahn alialu kohwei, ar kehlail pahn lalaudla;+
Emenemen irail pahn pwarala mwohn silangin Koht nan Saion.
8 Maing Siohwa, Koht kaunen karis en sounpei, komw ketin karonge ei kapakap;
Komw ketin karonge ie, Maing Koht en Seikop. (Selah)
9 Komw ketin mahsanih, at mehn sansar+ oh at Koht,*
Komw ketin kupwuramwahwih sapwellimomwi me keidio.+
10 Pwe rahnteieu nan sapwellimomwi wasa kelpene kan kin mwahusang rahn kid wasa teikan!+
I pilada I en uh ni taht en wenihmw en tehnpesen ei Koht
A kaidehn I en kousoan nan impwal en me suwed kan.
11 Pwe Siohwa Koht ketin rasehng ketipin ehu+ oh mehn sansar ehu;+
E kin ketikihda kupwuramwahu oh lingan.
Siohwa sohte pahn ketin irehdihsang mehkot mwahu
Irail akan me kin weweid ni loalopwoat.+
12 Maing Siohwa kaunen karis en sounpei,
Meid peren aramas emen me kin likih komwi.+