Eklesiasdes

7 Adamwahu* mwahusang leh kaselel,+ oh rahnen mehla mwahusang rahnen ipwidi. 2 En kohla ni ihmw ehu me nsensuwed en mehla mi ie mwahusang kohla ni ihmw ehu me mie kamadipw,+ pwe met iei imwilahn aramas koaros, oh me momour kan anahne katengehdiong met nan ar mohngiong. 3 Nsensuwed mwahusang kouruhr,+ pwe mesen pahtou kin kamwahwihala mohngiong.+ 4 Aramas loalokong me mi nan ihmw ehu me nsensuwed en mehla mi ie kin medemedewe duwen mour oh mehla, ahpw aramas pweipwei kin medemedewe duwen eh peren ahnsou koaros.+

5 Rongorong en aramas loalokong men lipwoar+ mwahusang rongorong en aramas pweipwei men koul. 6 Pwe en aramas pweipwei men kouruhr kin rasehng posopos en rahntuhke tekatek me lullul pahn ainpwoat,+ oh met pil sohte katepe. 7 Ahpw lokolok kak kasahlielihala me loalokong men, oh kisakis kak kahrehiong mohngiong en suwedla.+

8 Imwilahn mehkot ehu kin mwahusang nin tapio. Kanengamah kin mwahusang madamadau* en aklapalap.+ 9 Ke dehr mwadang lingeringerda,+ pwe lingeringer kin mi pahnadin me pweipwei kan.*+

10 Ke dehr nda, “Dahme ahnsou samwalahr ako mwahukihsang rahn pwukat?” pwe e sohte wia elen loalokong ken nda met.+

11 Erpit iangahki sohso kin wia mehkot mwahu oh met kin wia kamwahupen irail akan me kin kilang marain en rahn.* 12 Pwe erpit kin wia mehn perehre+ duwehte mwohni eh kin wia mehn perehre,+ ahpw kamwahupen loalokong iei met: Erpit kin doare mouren aramas.+

13 Medemedewe dahme Koht mehlelo ketin wiahda, pwe ihs me kak kainenehla dahme e ketin kapirekelahr?+ 14 Ni rahn me mwahu, kasalehda dahme mwahu,+ ahpw ni rahn me apwal, medewehla me Koht ketin wiahda rahn me mwahu oh pil apwal,+ pwe aramas akan en sohte kak ese* dahme pahn wiawihong irail ni ahnsou kohkohdo.+

15 Erein ei mour soh katepe+ I kilangehr mehkoaros—aramas pwung men mehla mendahki e pwung+ oh aramas suwed men kin momour werei mendahki e suwed.+

16 Ke dehr nohn wiahla aramas pwung+ de kasalehda me ke nohn loalokong.+ Dahme kahrehda ken kauweiukala?+ 17 Ke dehr nohn suwed, de pweipwei.+ Dahme kahrehda ken mehla mwohn omw ahnsou?+ 18 Me keieu mwahu iei ale ehu kaweid oh sohte kesehla kaweid teio;+ pwe aramas me kin lemmwiki Koht pahn peikiong kaweid ko koaros.

19 Erpit kin kahrehiong aramas loalokong men en kehlailsang ohl kehlail ehk nan kahnimw ehu.+ 20 Pwe sohte aramas pwung men nin sampah me kin wia me pwung ahnsou koaros oh sohte mwahn kin wiahda dihp.+

21 Oh pil, ke dehr loalehdi koasoi koaros me aramas kin nda;+ pwe ma soh ke pahn rong omw ladu eh keriaiuk;* 22 pwe ke uhdahn ese nan omw mohngiong, me pak tohto pein kowe pil kin keriahla meteikan.+

23 I song mepwukat koaros ni ei doadoahngki erpit oh I nda: “I pahn loalokongla.” Ahpw met nohn apwal ong ie. 24 Dahme miehier uhdahn doh oh nohn loal. Ihs me kak wehwehki met?+ 25 I koasoanehdi nan ei mohngiong pwe I en ese oh kasawih oh rapahki erpit oh kahrepen soahng kan eh kin wiawi, oh I en wehwehki suwed en mwekid soaloalokong oh pweipwei en mwekid sahliel kan.+ 26 Ngehi eri diarada met: Me katiksang mehla iei lih emen me rasehng en sounpwek mahn men uhk, me eh mohngiong rasehng uhk oh peh kan rasehng selmete. Mehmen me kin kaperenda kupwuren Koht mehlelo pahn pitsang liho,+ ahpw liho pahn poarokedi me dipan.+

27 Sounkaweido*+ nda: “Kilang, iet me I diaradahn, I kasawiher ehu mehkot, mwuri pil ehu pwe I en diarada ei madamadau duwen met, 28 ahpw I sohte diarada dahme I kin raparapahki. I diarada ohl* emen sang nanpwungen aramas kid, ahpw I sohte diarada lih emen nanpwungarail. 29 Ihte met me I diarada: Koht mehlelo ketin wiahda aramas akan en pwung,+ ahpw re kin pein wiahda koasoandi tohto.”+