Luk

8 Mwurinte mwo, e ketin seiloak sang ehu kahnimw lel ehu kahnimw oh sang ehu kousapw lel ehu kousapw oh kalokalohki rongamwahu en Wehin Koht. Oh me Ehk Riemeno ieiang ih, 2 oh pil lih kei me e ketin kamwahwihala sang ngehn suwed kan oh soumwahu kan: Mery me pil adaneki mehn Makdala me ngehn suwed isimen pedoisang; 3 Sohanna en Kusa eh pwoud, sounkohwahn imwen Erod; Susana; oh lih tohto teikan me kin papah irail sang ni ar doadoahngki ar dipwisou kan.

4 Eri ni ahnsou me lapalahn pokon ehu pokonpene iangahki irail ko me iangada ih sang ehuehu kahnimw, e ahpw ketin doadoahngki ehu karasaras oh mahsanih: 5 “Sounkamwarak emen kohieilahng kamwarak werentuhke. Ni eh kamwakamwarak, ekei pwupwudiong ni keilen ahlo oh tiatipeseng oh menpihr kei en pahnlahng kangala. 6 Ekei pwupwudiong pohn paip oh mwurin ar wosada, re mengila pwehki ar sohte lemwulemwur. 7 Ekei pwupwudiong nanpwungen dihpw tekatek ko oh dihpw tekatek ko me iang irail keirda kasokirailla. 8 Ahpw ekei pwupwudiong nan pwelmwahu oh mwurin ar wosada, re kapwarehda wah pak 100 laudsang mahs.” Mwurin eh mahsanih mepwukat, e ketin ngihl laudida, mahsanih: “Mehmen me mie salenge mehn rong, a en rong.”

9 Sapwellime tohnpadahk ko ahpw patohwan idek reh wehwehn karasaras wet. 10 E mahsanih: “E mweimweiong kumwail en wehwehki rir sarawi kan en Wehin Koht, ahpw ong meteikan, I kin padahkih irail ni karasaras pwe mehnda ma re kilikilang, re sohte pahn kilang, oh mehnda ma re rongorong, re sohte pahn wehwehki. 11 A iet wehwehn karasaraso: Werentuhkeo iei mahsen en Koht. 12 Me mi ni keilen ahlo iei irail ko me rong, Tepil ahpw kohdo oh kihsang mahseno nan mohngiongirail pwe re dehr kamehlele oh komourla. 13 A me mi pohn paipo iei irail me perenkihda mahseno ni ar rong, ahpw kalewarail sohte loal. Re kin kamehlele ahnsoukis, ahpw ni ahnsoun songosong, re kin pwupwuweisang. 14 A me pwupwudiong nanpwungen dihpw tekatek ko, irail pwukat iei me kin rong ahpw kedirepwkihla pwunod kan, kepwe kan oh peren en mour wet. Mepwukat kin kasokirailla douluhl oh re sohte kin kihda wah me mah. 15 A me mi pohn pwelmwahu, irail pwukat iei me ahneki mohngiong mehlel oh mwahu. Mwurin arail kin rong mahseno, re kin tengediong oh dadaurete ni arail kin wa.

16 “Sohte me kin pwainkihdi lamp ehu deupen mehkot de kihdi pahn peht ehu mwurin eh isikada, ahpw e kin kidahng pohn dewen lamp pwe irail ko me kin pedolong en kak kilang maraino. 17 Pwe sohte mehkot me rir me sohte pahn sansalda oh sohte mehkot me ekiekla mwahu me sohte pahn dierekda oh aramas sohte pahn esehda. 18 Ihme kahrehda, kumwail tehk mwahu mwomwen amwail kin rongorong, pwe mehmen me ahneki mehkot, kalaudpe pil pahn kohieng, ahpw mehmen me sohte ahneki mehkot, dahme e medewe me e ahneki pil pahn kohsang.”

19 Ine oh rie pwutak ko patohdo reh, ahpw re sohte kak keiong mpe pwehki pokono. 20 Aramas men ahpw kairehki, patohwan: “Inomwi oh riomwi ko uh likio oh men tuhwong komwi.” 21 E ahpw ketin sapeng irail mahsanih: “Inei oh riei kan iei irail me kin rong mahsen en Koht oh kapwaiada.”

22 Rahn ehu, ih oh sapwellime tohnpadahk ko ahpw ketidahng pohn pwoht ehu, e ahpw mahsanihong irail: “Kitail kohla palio leho.” Irail ahpw serek kohla. 23 Ahpw ni arail senserek kohla, e ketin meirla. A lapalahn melimel ehu pa pwarada nan leho oh wararail pwohto tepida direkihla pihl oh mihla nan keper. 24 Re ahpw patohlahng pangenda ih, patohwan: “Sounpadahk, Sounpadahk, kitail pahn melahr!” E ahpw ketida oh ketin lipwoarehda kisiniengo oh ilok sawao, e ahpw tokedi oh meleileidi. 25 Ih eri mahsanihong irail: “Ia amwail pwosonen?” Irail ahpw uhdahn masepwehkada oh pwuriamweikihla, ndindapene nanpwungarail: “Uhdahn ihs met? Pwe e ketin ruwese kisiniengo oh pihlo, a re pil kin peikiong.”

26 Oh re peidi ni oaroahr ni sapwen mehn Kerasa palio Kalili. 27 Eri ni Sises eh ketidahng pohn sahpwo, a ohl emen me ngehn suwed tiada powe sang nan kahnimwo tuhwong ih. Ahnsou reirei e sohte kin likou oh e sohte kin mihmi nan ihmw, ahpw nanpwungen sousou kan.* 28 Ni eh kilangada Sises, e ahpw werda oh kelepwikihdi mwowe oh nda ni ngihl laud: “Sises, Sapwellimen Koht Wasa Lapalahpie, dahme I pahn kak ehukihong komwi? I peki komwi en dehr ketin kaloke ie.” 29 (Pwe Sises kin ketin ruwese ngehn sauto en pedoisang ohlo. Pak tohto ngehno kin koledi ih.* E kin pwurepwurehng selikihdi selmete ni neh oh peh kan oh kin silasildi, ahpw e kin uhdahte kauwehla selipe ko oh ngehn suwedo kin tangahkilahng ih wasa me sohte aramas kin mi ie.) 30 Sises keinemwe reh: “Ia edomw?” E patohwan: “Karis,”* pwe ngehn suwed tohto pedolong reh. 31 Oh re ngidingidkihong ih en dehr ketin ruwese irail en kohdilahng nan pwoahr loal me soh kapi. 32 A lapalahn pelin pwihk ehu wie mwengemwenge pohn nahnao, irail ahpw peki reh en ketin mweidohng irail en pedolong nan pwihk ko, ih eri ketin mweidohng. 33 A ngehn suwed ko eri pedoisang rehn ohlo oh pedolong nan pwihk ko oh pelin pwihko ahpw tang oh pwupwudihla nan leho sang wasa ile oh duhla. 34 Ahpw ni silepen pwihk ko ar kilangada dahme wiawi, irail ahpw tangdoaui oh koasoiahda met nan kahnimwo oh nansapwo.

35 Eri, aramas ako kohieila pwe ren kilang dahme wiawi. Irail patohdo rehn Sises oh diarada ohl me ngehn suwed ko kohieisangehr, likoudahr, solahr sahliel oh mwomwohd ni aluweluwen Sises, re ahpw masepwehkada. 36 Irail ko me kilang met ahpw kairehki irail ko me kohdo duwen ohl me ngehn suwed tiada powe eh mwahula. 37 Eri aramas tohto sang wasa kan limwahn sapwen mehn Kerasa ahpw patohwan peki rehn Sises en ketilahsang rehrail pwe re inenen masepwehkada kowahlap. Ih eri ketidahng pohn pwohto pwe en ketin mwesel. 38 Ahpw, ohl me ngehn suwed ko kohieisangehr wie pekipeki reh ma e kak iang ih, ahpw e ketin kadarala ih oh mahsanih: 39 “Pwurowei ni imwomwo oh pousehlahte koasoiahda dahme Koht ketin wiahiong uhk.” Ih eri kohieila oh lohkiseli wasa koaros nan kahnimwo dahme Sises ketin wiahiong.

40 Ni Sises eh sapahlla, pokono ahpw kasamwo ni kadek pwehki irail koaros kin kasikasik ih. 41 A kilang! ohl emen me adaneki Sairus ahpw patohdo; ohl menet iei soumas en sinakokeo. E ahpw poaridiong ni aluweluwen Sises ko oh tepida patohwan peki reh en ketila ni imweo, 42 pwehki nah serepein tehmeno,* me mpen sounpar 12, kereniongehr mehla.

A ni Sises eh ketiket kohla, pokono ahpw koaitenla. 43 Eri mie lih emen me kohwahkier soumwahu en nta pwilipwil erein sounpar 12 oh sohte emen me kak kamwahwihala ih. 44 E ahpw keilahng mpe sang mwuri oh doahke pwungipen sapwellime likou puhp oh ni ahnsowohte eh nta pwilipwil pa uhdi. 45 Eri Sises mahsanih: “Ihs me doahke ie?” Ni ahnsou me irail koaros kahmahmki met, Piter ahpw patohwan: “Maing Sounpadahk, pokonet kapilkomwipenehr oh koaitenkomwilahr.” 46 Sises ahpw mahsanih: “Mie me doahke ie, pwe I ese me kehl kohsang rehi.” 47 Ni liho eh esehda me e solahr kak rirla, e ahpw rerrer patohdo oh kelepwikihdi mwowe oh wehkada mwohn aramas ako koaros kahrepen eh doahke ih oh duwen eh mwahula ni ahnsowohte. 48 E ahpw mahsanihong: “Nei serepein, omw pwoson me kamwahwihiukala. Kohkohwei ni popohl.”

49 Nindoken eh mahmahsente, emen wiliepen soumas en sinakokeo ahpw kohdo oh nda: “Noumw serepeino melahr; ke dehr kedirapwahki Sounpadahken.” 50 Ni eh karongehda met, Sises ketin sapeng ih: “Dehr pwunod, ihte pwoson, a e pahn komourla.” 51 Ni eh ketin lella ni ihmwo, e sohte ketin mweidohng emen en iang ih pedolong, ihte Piter, Sohn, Seims oh en serepeino eh pahpa oh nohno. 52 Ahpw aramas ako koaros wie sengiseng oh pikipikir nan mwaremwarerail pwehki ar pahtouki serepeino. Ih eri mahsanih: “Kumwail dehr sengiseng, pwe e sohte mehla, ahpw e wie memeir.” 53 Irail ahpw tepida kouruhr en kepitki pwehki ar ese me e melahr. 54 E ahpw ketin kolada peho oh mahsanihong: “Kisin seri, pwourda!” 55 Ih eri mourda* oh mwadangete pwourda, e ahpw ketin ruwese irail en kamwenge. 56 Eri, eh pahpa oh nohno ahpw inenen perenkihda kowahlap, ahpw e ketin kaweidkin ira en dehpa ndaiong emen dahme wiawi.