Luk

10 Mwurin mepwukat, Kauno ketin pilada meh 70 teikan oh poaroneirailpeseng mwowe wad riemen nan kahnimw oh wasa koaros me e pahn ketila ie. 2 Ih eri mahsanihong irail: “Ei, rahket me laud, ahpw tohndoadoahk kan me malaulau. Ihme kahrehda, kumwail peki rehn Soumas en rahket en ketin poaronehdo tohndoadoahk kan ong sapwellime rahk. 3 Kumwail kohla! Kilang! I pahn kadarkumwailwei rasehng sihmpwul kei me mi nanpwungen kidien wel kan. 4 Dehr wahda edin mwohni de edin mwenge de suht, oh pil dehr rahnmwahwih emen* nanial. 5 Sohte lipilipil wasa me kumwail pedolong nan ihmw ehu, kumwail pahn nda mahs: ‘Popohl ong ihmw wet.’ 6 Oh ma aramas popohl men mi mwo, amwail popohl pahn mihla reh. Ahpw ma soh, e pahn pwurodohng kumwail. 7 Eri kumwail mihmi nan ihmwo, kangkang oh niminim mehkan me re kaunopada, pwe tohndoadoahk men kin warohng ale pweine. Kumwail dehr kin kasausang ehu ihmw kasaulahng ehu ihmw.

8 “Eri, sohte lipilipil wasa me kumwail pedolong nan kahnimw ehu oh re kasamwo kumwail, kumwail kang dahme re kihdi mwohmwail 9 oh kamwahwihala me soumwahu kan me mi mwo oh ndaiong irail: ‘Wehin Koht kerendohngehr kumwail.’ 10 Ahpw sohte lipilipil wasa me kumwail pedolong nan kahnimw ehu oh re sohte kasamwo kumwail, kumwail kohieilahng ahllap en kahnimwo oh nda: 11 ‘Se sipedowohng kumwail pwelpar en amwail kahnimw me pasehngehr nin neht kat. Ahpw, kumwail en ese met, Wehin Koht kerendohr.’ 12 I ndaiong kumwail me ni rahno,* kalokolok ong Sodom pahn marahra sang kalokolok ong kahnimwo.

13 “Meid suwediong uhk, Korasin! Meid suwediong uhk, Pedsaida! pwe ma manaman kan me wiawihong kumwa wiawihong Dair oh Saidon, ira pahn koluhlahte mahsie ni ara pwuhriong nan likoun nsensuwed oh mwohndi nan pehs. 14 Eri, kalokolok ong Dair oh Saidon pahn marahra sang kalokolok ong kumwa ni Rahnen Kadeiko. 15 Oh kowe, Kapernaum, ke pahn sepwilida nanleng? Soh! Ke pahn sepwilidi nan Sousou!*

16 “Mehmen me kin rong kumwail kin rong ie. Oh mehmen me kin mwamwahliki kumwail pil kin mwamwahlikin ie. Oh mehmen me kin mwamwahlikin ie pil kin mwamwahliki Ih me ketin poaroneiehdo.”

17 Eri, meh 70 ko pwurodo ni peren, re ahpw patohwanohng: “Maing Kaun, ngehn suwed kan pil kin peikiong kiht ni at kin doadoahngki mwaromwi.” 18 Ih eri mahsanihong irail: “I kilang Sehdan eh pwupwudier sang nanleng duwehte lioal. 19 Kilang! I kihong kumwail manaman en tiakedi serpent oh skorpion kan oh manaman en powehdi ahn imwintihtio manaman koaros, oh sohte mehkot pahn kauweikumwailla. 20 Ahpw, kumwail dehr perenkihda ngehn akan ar kin peikiong kumwail, ahpw perenkihda adamwail kan eh ntingdier nanleng.” 21 Ni ahnsowohte e ketin direkihla peren oh sapwellimen Koht manaman,* ih eri mahsanih: “Maing Semei, Kaunen nanleng oh sampah, I kapinga komwi mwohn aramas koaros, pwehki omwi ketin ekihla mwahu mepwukat sang aramas koahiek oh loalokong kan ahpw ketin kasalehiong kisin seri kan. Ei maing Semei, pwehki iei met me komw ketin kupwurki. 22 Mehkoaros kohiengieier sang rehn Semei, oh sohte me ese ihs Sapwellimeo pwe Sahmohte, oh sohte me ese ihs Sahmo pwe Sapwellimeo oh mehmen me Sapwellimeo kupwurki en kasalehiong.”

23 Ih eri ketin sohpeiong tohnpadahk ko oh mahsanihong irail ni arail kelehpwla: “Meid pai irail me kilang mehkan me kumwail kilikilang. 24 Pwe I ndaiong kumwail, soukohp oh nanmwarki tohto kin inengieng kilang soahng kan me kumwail kin kilikilang ahpw re sohte kilang, oh kin inengieng rong soahng kan me kumwail kin rongorong ahpw re sohte rong.”

25 A iet! ohl emen me samanih Kosonnedo ahpw uhda pwe en kasonge ih oh patohwanohng: “Maing Sounpadahk, dahme I anahne wia pwe I en sohsohki mour soutuk?” 26 E ahpw mahsanihong: “Dahme ntingdi nan Kosonnedo? Ia duwen omw kin wadek?” 27 E sapeng patohwan: “‘Ke anahne poakohng Siohwa* omw Koht ni omw mohngiong unsek oh omw mour* unsek oh omw kehl unsek oh omw lamalam unsek’ oh ‘mehn mpomw duwen omw kin poakohng pein uhk.’” 28 E ahpw mahsanihong: “Ke sapeng ni pwung; pousehlahte wia met oh ke ahpw pahn ale mour.”

29 Ahpw ni ohlo eh men kadehdehda me ih me pwung, e patohwanohng Sises: “Ihs me uhdahn mehn mpei?” 30 Sises ketin sapeng mahsanih: “Ohl emen kohdihdo sang Serusalem kohdilahng Seriko oh lohdiong loallap suwed kan, me kulihasang eh likou, keme ih oh kohkohlahsang ni eh kereniong pahn mehla. 31 Samworo men ahpw keididihla nanialohte, oh ni eh kilangada ih, e ahpw douluhllahsang keidla pali teio. 32 Pil duwehte, mehn Lipai men, ni eh keidido wasao oh kilangada ih, e ahpw douluhllahsang keidla pali teio. 33 Ahpw mehn Sameria men me seiseiloak nanialo ahpw kasaingedi, oh ni eh kilangada ih, e uhdahn poakehla. 34 Ih eri keiong mpe oh wudekihdiong leh oh wain pohn eh ohla ko oh kidimpene. E ahpw kidahng ih pohn nah mahno oh wahlahng wasahn pweidi ehu oh apwahpwalih ih. 35 Mandahn rahno e kihong kaunen wasahn pweidio denari* riau oh nda: ‘Apwalih mahs ih, oh mehkot me ke doadoahngki likin met, I pahn kapwungohng uhk ni ei pwurodo.’ 36 Ihs me ke lemehiong rehn me silimen pwukat me wiahla mehn mpen ohlo me lohdiong loallap suwed ko?” 37 E patohwan: “Me kadek ong iho.” Sises eri mahsanihong: “Kohwei oh wia duwehte.”

38 Ni arail ketiket kohla, e ahpw ketilong nan kisin kahnimw ehu. Wasao, lih emen me ede Marda kasamwolong ih nan imwe. 39 Pil mie rie lih emen me ede Mery, me mwohndi ni aluweluwen Kauno oh wie rongorong dahme e mahsanih.* 40 Ahpw Marda kedirepwkihla wia doadoahk tohto. Ih eri patohdo reh oh patohwanohng: “Maing Kaun, komw sohte ketin nsenohki riei liho eh mweidala I en kelehpw wie doadoahk? Komw mahsanihong en sewese ie.” 41 Sises ketin sapeng, mahsanihong: “Marda, Marda, ke kin pwunodki oh kedirepwki soahng tohto. 42 Ahpw soahng malaulaute me anahn de pil ehute. Ong ih, Mery pilada mehkot mwahu,* oh sohte me pahn adihasang ih.”