Luk

18 Ih eri doula mahsanihong irail karasaras pwoat duwen arail anahne kapakap ahnsou koaros oh dehr nan kapehd tikitikla, 2 mahsanih: “Mie sounkopwung men nan kahnimw ehu me sohte kin lemmwiki Koht oh sohte wauneki aramas. 3 Pil mie liohdi men nan kahnimwo me kin pwurepwure ih oh ndinda, ‘Kilang pwe I en alehdi koasoandi pwung oh pahrek ni repenpwung ong pelieio.’ 4 Eri, erein ahnsou ehu e sohte men wia met, ahpw mwuhr e ndaiong pein ih, ‘Mendahki I sohte lemmwiki Koht de wauneki aramas, 5 a pwehki liohdi menet kin kedirepwe ie, I pahn sewese pwe en ale pwung pahrek pwe en dehr kin pwurepwure ie oh kapwangahkin ie eh pekipek.’” 6 Kauno eri mahsanih: “Kumwail rong dahme sounkopwungo nda mendahki aramas suwed men ih! 7 Eri, a Koht sou uhdahn pahn ketin wiahiong sapwellime kan me pilipildahr me kin likweriong ih ni rahn oh nipwong pwung pahrek, mehnda ma e kin ketin kanengamahiong irail? 8 I ndaiong kumwail, e pahn mwadang ketin kapwaiada pwung pahrek ong irail. Ahpw ni ahnsou me Nein-aramas pahn ketido, e uhdahn pahn ketin diar pwoson wet* nin sampah?”

9 E pil mahsanih karasaras pwoatet ong ekei me kin kamehlele me irail me pwung oh kin medewe me meteikan sohte katepe: 10 “Ohl riemen kohdalahng tehnpas sarawio pwe ira en kapakap, Parisi men oh sounrik daksis men. 11 Parisio kesihnen oh tepida kapakapki mepwukat nan kapehde, ‘Maing Koht, I kin kalahngankihong komwi ei sohte kin duwehte aramas teikan​—me kin loallap, me kin wia me suwed, me kin kamwahl​—de pil duwehte sounrik daksis menet. 12 I kin kaisihsol pak riau nan wihk ehu; I kin kihda eisek kis ehu en soahng koaros me I alehdi.’ 13 Ahpw sounrik daksiso uh ekis dohsang oh sohte pil kilengdalahng nanleng ahpw pikipikir nan mwaremware, ndinda, ‘Maing Koht, komw ketin kadek kalahngan ong ie,* ngehi me dipan men.’ 14 I ndaiong kumwail, ohl menet kasalehda me e pwung sang Parisio ni eh kohdihla ni imweo. Pwehki mehmen me kin kasapwilada pein ih pahn tikitikla, ahpw mehmen me kin aktikitingki pein ih pahn lapalapala.”

15 Aramas akan pil patohwandohng ih neirail kisin seri kan* pwe en ketin doahke irail, ahpw ni tohnpadahk ko ar kilang met, re tepida lipwoare irail. 16 Sises ahpw malipehdo kisin seri ko oh mahsanih: “Kumwail mweidohng kisin seri kan ren kohdo rehi oh dehr kapweiek irail, pwe Wehin Koht iei wehin soangen aramas pwukat. 17 I ndaiong kumwail ni mehlel, mehmen me sohte kin kasamwo Wehin Koht duwehte kisin seri men, e sohte mwahn pahn pedolong loale.”

18 Emen kaun ako ahpw idek reh patohwan: “Maing Sounpadahk mwahu, dahme I anahne wia pwe I en sohsohki mour soutuk?” 19 Sises ahpw mahsanihong ih: “Dahme kahrehda ke ekerkin ie mwahu? Sohte emen me mwahu, pwe Kohtete. 20 Ke ese kehkehlik kan: ‘Dehr kamwahl, dehr kemehla aramas, dehr pirap, dehr wiahda kadehde likamw, kahkahki semomw oh inomw.’” 21 Ih eri patohwan: “I kin kapwaiada mepwukat koaros sang ni ei pwulopwul.” 22 Mwurin Sises eh karonge met, e mahsanihong ih, “Mie mehkot me ke pil anahne wia: Netikihla omw dipwisou koaros oh nehkpeseng pweine kan ong aramas semwehmwe kan, ke ahpw pahn ahneki pai en nanleng; oh kohdo idawehniehla.” 23 Ni eh rongada met, e uhdahn pahtoula, pwe ih aramas kepwehpwe men.

24 Sises mahsenlahng ih oh mahsanih: “Ia uwen eh pahn apwal ong irail kan me naineki mwohni ren pedolong nan Wehin Koht! 25 Ni mehlel, e mengeiong kamel men en dil nan pwoaren dikek ehu sang aramas kepwehpwe men en pedolong nan Wehin Koht.” 26 Irail me rongada met ahpw patohwan: “Ihs me pahn kak komourla?” 27 E mahsanih: “Mehkan me sohte kak pweida rehn aramas kak pweida rehn Koht.” 28 Ahpw Piter patohwan: “Iet kiht me pwilikidier dahme se ahneki oh ideidawehn komwi.” 29 E mahsanihong irail: “I ndaiong kumwail ni mehlel, mehmen me pwilikihdi imwe de eh pwoud de rie kan de seme oh ine de nah seri kan pwehki Wehin Koht 30 pahn ale pak tohto nan ahnsou pwukat, a ni koasoandi en mwehi me kohkohdo,* mour soutuk.”

31 Ih eri ketin katohrehla me Ehk Riemeno oh mahsanihong irail: “Kilang! Kitail kohkohdalahng Serusalem oh soahng koaros me soukohp ako ntingihedi duwen Nein-aramas pahn pweida.* 32 Karasepe, e pahn pengpengla rehn mehn liki kan oh re pahn kapailoke oh wiakauwe oh kendipih. 33 Oh mwurin arail pahn wokih, re pahn kemehla ih, ahpw ni kesiluhwen rahn e pahn iasada.” 34 Ahpw re sohte wehwehki mepwukat pwehki wehwehn mahsen pwukat ekieklahr sang irail.

35 Eri ni Sises eh ketiket kohla karanih Seriko, ohl maskun men mwomwohd ni keilen ahlo oh wie pekipek. 36 Pwehki eh rongada pokon ehu me kekeid wasao, e ahpw tepida idihdek dahme wiawi. 37 Irail ahpw ndaiong ih: “Sises mehn Nasaret me ketiket kohla wasaht!” 38 E ahpw ngihl laudida patohwan: “Sises, Nein Depit, komw kupwure ie!” 39 Oh irail me mi mwowe ko ahpw tepida lipwoarehda ih oh ndaiong en nennenla, a e ahpwte kalaudehla eh weriwer, patopatohwan: “Maing Nein Depit, komw kupwure ie!” 40 Sises eri ketin uhdi oh ruwese ohlo en wisikdo reh. Mwurin eh keiong mpen Sises, e ahpw keinemwe reh: 41 “Dahme ke mwahuki I en wiahiong uhk?” E ahpw patohwan: “Maing Kaun, mweidohng ie I en pwurehng patohwan wasa.” 42 Sises eri mahsanihong: “Nna, pwurehng kilangada wasa; omw pwoson me kamwahwihiukala.” 43 Oh ni ahnsowohte e pwurehng kilangada wasa oh tepida idawehnla ih oh kalikalingana Koht. Oh ni arail kilangada met, aramas ako koaros ahpw kapinga Koht.