Wiewia
25 Eri, rahn siluh mwurin Pestus eh leledo nan wehio oh tepida kakaun, e ahpw kohsang Sesaria oh kohdalahng Serusalem. 2 Oh kaunen samworo kan oh kaunen mehn Suhs akan ahpw kedipa Pohl reh. Irail eri tepida peki rehn Pestus 3 en kapwaiada arail pekipek oh kadarodohng Pohl Serusalem. Ahpw irail koasoakoasoane ren rukihedi Pohl oh kemehla ih nanialo. 4 Pestus ahpw sapengki me Pohl en mihmihte Sesaria oh me pein ih pahn pwuralahng wasao ni ahnsou keren. 5 E ahpw nda: “Eri mweidohng amwail kaun akan en iang ie kohdihla oh kedipa ih, ma mehlel ohlo wiadahr mehkot sapwung.”
6 Eri e mihmihkiher wasao sohte reireisang rahn waluh de eisek, e ahpw kohdihla Sesaria, oh mandahn rahno, e ahpw mwohndiong nan mwoalen kadeik oh ruwese Pohl en wisikdo. 7 Ni eh pedolong, mehn Suhs akan me kohdihdo sang Serusalem ahpw kapilpene oh kedipahki diren kedip toutou kei me re sohte kak kadehdehda duwe.
8 Pohl ahpw doare pein ih oh nda: “I sohte dipkihda mehkot me uhwong Kosonned en mehn Suhs akan, de pil tehnpas sarawio de pil Sihsar.” 9 Eri pwehki Pestus men kenikenla rehn mehn Suhs ako, e ahpw sapeng Pohl nda: “Ke men kohdahla Serusalem oh ale kadeik mwohi wasao me pid soahng pwukat?” 10 Pohl ahpw nda: “I kesikesihnen mwohn mwoalen kadeik en Sihsar, wasa me I uhdahn pahn pakadeikda ie. I sohte wiahda sapwung ehu ong mehn Suhs akan, me komwi pil mwahngiher. 11 Ma uhdahn ngehi aramas suwed men oh wiadahr mehkot me I warohng mehkihla, I sohte peki I en pitsang mehla; ahpw ma kedip kan me ohl pwukat wiahiong ie sohte mehlel, sohte emen ahneki pwuhng en pangielahng rehrail pwe ren peren. I peki kopwung sapahl rehn Sihsar!” 12 Eri, mwurin Pestus eh koasoiong pwihnen sounkaweid ko, e ahpw sapengki: “Ke peki kopwung sapahl rehn Sihsar; eri, ke pahn kohla rehn Sihsar.”
13 Mwurin rahn ekei dower powe, nanmwarki Akripa oh Pernis ahpw lella Sesaria pwe ira en rahnmwahwih Pestus. 14 Pwehki arail mihmi wasao erein rahn ekei, Pestus ahpw kasalehiong nanmwarkio ahn Pohl kopwungo oh nda:
“Mie ohl emen me Peliks kihdi me wie sensel, 15 oh ni ei mihmi nan Serusalem, kaunen samworo ko oh ohl mah kan en mehn Suhs ako ahpw kairehkin ie duwen ih, oh peki I en kadeikada ih. 16 Ahpw I sapengkin irail me kaidehn koasoandi en mehn Rom en pangala emen rehn irail me kedipa ih mwohn eh tuhwong irail oh ale ahnsoun koasoi pwe en doare pein ih sang kedipo. 17 Eri, ni arail leledo wasaht, I sohte kasohlapahla ahnsou, pwe mandahn rahno I mwohndiong nan mwoalen kadeik oh ruwese ohlo en wisikdo. 18 Ni arail uhda oh tepida kedipa ih, re sohte kedipahki soahng suwed kan me I medewe me e wiahda. 19 Eri, irail akamaikihongete duwen pein arail pelien lamalam* oh pil duwen ohl emen me ede Sises me melahr ahpw Pohl kin koasoakoasoia me e wie momour. 20 Pwehki I sehse ia duwen ei pahn koasoanehdi akupwung wet, I idek reh ma e men kohla Serusalem oh ale kadeik wasao duwen ire pwukat. 21 Ahpw ni Pohl eh peki en sensel oh awiawih dahme Nanmwarki Lapalapo* koasoanehdi, I ruwese en senselte I lao pahn kadaralahng rehn Sihsar.”
22 Akripa ahpw ndaiong Pestus: “Pein ngehi men rong ohlo.” E ahpw patohwan: “Lakapw, komw pahn karonge ih.” 23 Eri, mandahn rahno Akripa oh Pernis kohdo ni kapar lingan kowahlap oh pedolong nan wasahn kopwungo iangahki kaunen karis en sounpei kan oh pil ohl lapalap kan nan kahnimwo; oh ni Pestus eh ruwes, Pohl ahpw wisikdo. 24 Pestus eri nda: “Maing nanmwarki Akripa oh kumwail koaros me iang kiht mihmi wasaht, kumwail kilang ohl menet me mehn Suhs koaros nan Serusalem oh pil wasaht pekipeki rehi oh weriwerki en kamala. 25 Ahpw I diarada me e sohte wiahda mehkot me e warohng mehkihla. Eri ni pein ohl menet eh peki kopwung sapahl rehn Nanmwarki Lapalapo, I koasoanehdi en kadarala ih. 26 Ahpw sohte mehkot me I pahn ntingkilahng ei Kaun duwen ih. Eri, I wahdo ih mwohmwail koaros oh mehlel mwohmwi, Nanmwarki Akripa, pwe mwurin karongorong wet, I pahn kak ntingihedi mehkot. 27 Pwe me pahn sapwung ong ie I en kadarala aramas selidi men ahpw sohte kasalehda kedip kan me uhwong ih.”