Eksodus
15 Ni ahnsowo Moses oh mehn Israel ko eri koulkihong Siohwa koul pwoatet:+
“I pahn kouliong Siohwa, pwe sapwellime lingan lapalapala.+
E ketin kakihrala oahso oh soundakepeo nansedo.+
2 Ei kehl oh ei roson iei Iah,* pwehki e ketin wialahr sounkomourpei.+
Ih me ei Koht, oh I pahn kapinga ih;+ Koht en semeio,+ oh I pahn kawauwih.+
3 Siohwa iei sounpei kehlail men.+ Siohwa iei mware.+
4 E ketin kesehdi weren Parao kuruma kan oh nah karis en sounpei kan nansedo,+
Oh nah sounpei me keieu kehlail kan kihrla nan Sehd Weitahtao.+
5 Ilok en sehd kan koaduhpwaliraildi; irail kihrla wasa loal rasehng takai.+
6 Maing Siohwa, palimaun en nin limomwi iei me roson lapalap;+
Maing Siohwa, palimaun en nin limomwi kak kamwutepene imwintihti men.
7 Nan sapwellimomwi roson lapalap komw kak ketin kesepwekehdi irail akan me kin pelian komwi;+
Komw ketin kadariei mpwulen sapwellimomwi engieng, e kin karoangeirailla rasehng diperen dihpw kan.*
8 Sang angin esingek en omwi keinuhnu pihl akan kin kohpene;
Re kin uhda duwehte dihd, koledi lapake kan;
Ilok en sehd kan kin tenpene nanwerengen* sehdo.
9 Imwintihtio nda: ‘I pahn pwakih! I pahn koanohdi!
I pahn nehkpeseng dipwisou lohdi kan lao I nsenamwahula!
I pahn usada nei kedlahs! Pehiet pahn kaloweiraildi!’+
10 Komw ketin peukki omwi esingek, sehdo koaduhpwaliraildi;+
Re kihrla nansed kehlail rasehng leht.
11 Maing Siohwa, ihs nanpwungen koht akan me duwei komwi?+
Ihs me duwei komwi, me kin kasalehda sarawihe kowahlap?+
Me warohng ale lemmwin ni koulen kaping kan, me kin ketin wiewia soahng kapwuriamwei kan.+
12 Komw ketin kapahwei palimaun en nin limomwi, a sampah ahpw kadalleirailla.+
13 Sang ni sapwellimomwi limpoak loalopwoat komw ketin kahluwa aramas ako me komw ketin kapitalahr;*+
Sang ni sapwellimomwi kehl komw pahn ketin kahluwairaillahng nan sapwellimomwi wasahn kousoan sarawi.
15 Ni ahnsowo kaunen keinek en Edom kan pahn masepwehkada,
Oh kaun lapalap en Mohap kan pahn rerrer.+
Tohn Kenan kan koaros pahn nan kapehd tikitikla.+
16 Re pahn masepwehkada oh rerrer.+
Pwehki lapalap en nin limomwi irail sohte pahn mwekid duwehte takai ehu
Lao sapwellimomwi aramas akan douluhlwei, Maing Siohwa,
17 Komw pahn ketin wairaildo oh ketin koasoaneiraildiong* pohn sapwellimomwi nahna,*+
Wasa koasoansoandiero me komw ketin kaunopadahr pwe komwi en kousoanla ie, Maing Siohwa,
Wasa sarawi ehu, Maing Siohwa, me limomwi kan ketin koasoanedier.
18 Siohwa pahn ketin kaun nin duwen nanmwarki kohkohlahte.+
19 Ni weren Parao oahs ko iangahki kurumahn mahwen ko oh nah sountangahki ko ar keidla nansedo,+
Siohwa ketin kapwurepene pilen sehdo pohrail,+
Ahpw aramas en Israel ko alu pohn ngalangal kohla nanwerengen sehdo.”+
20 Miriam lih soukohpo, rien Aaron liho, ahpw ale dampwurin ehu, oh lih koaros idawehnla ih wa dampwurin kei oh kahkahlek. 21 Miriam ahpw sapengala ohl ako ni eh koulki koul pwoatet:
“Kumwail kouliong Siohwa, pwe sapwellime lingan lapalapala.+
E ketin kakihrala oahso oh soundakepeo nansedo.”+
22 Mwuhr Moses ahpw kahrehsang mehn Israel ko sang ni Sehd Weitahtao, oh irail kohieila nan sapwtehn en Sur oh karis kohla erein rahn siluh nan sapwtehno, ahpw irail sohte diar pihl. 23 Irail eri leledo Marah,*+ ahpw irail sohte kak nim pilen Marah pwehki eh katik. Ihme kahrehda e kahdaneki Marah. 24 Aramas ako ahpw tepida lipahnede Moses,+ nda: “Dahme se pahn nim?” 25 Ih eri likweriong Siohwa,+ oh Siohwa ketin kasalehiong ih tuhke pwoat. Ni eh kesehdiong tuhkeo nan pihlo, pihlo pa ioula.
Wasao E ketin wiahiong irail koasoandi ehu oh poahsoanpen kadeik ehu, oh wasao E ketin kasawih irail.+ 26 E ketin mahsanih: “Ma ke uhdahn pahn rong kapitien Siohwa omw Koht oh wia dahme pwung mwohn silangi oh pahn peikiong sapwellime kehkehlik kan oh kapwaiada sapwellime koasoandi kan,+ I sohte pahn kihong uhk ehu soangen soumwahu ko me I kihong mehn Isip ko,+ pwe ngehi, Siohwa me kamwakamwawihiukla.”+
27 Mwurin mwo irail ahpw kohdo Elim, wasa me mie utuhnpihl 12 oh tuhke pahm* 70. Irail eri kauwada imwarail impwal kan wasao limwahn pihlo.