Keieun Kronikel

29 Nanmwarki Depit eri ndaiong mwomwohdiso pwon: “Nei pwutak Solomon, me Koht ketin piladahr,+ me pwulopwul oh soakoahiek,*+ oh doadoahk wet me laud, pwe met kaidehn tehnpas sarawi ong aramas ahpw ong Siohwa Koht.+ 2 I wiadahr uwen me I kak pwe I en kaunopada tehnpesen ei Koht, I kaunopada kohl ong soahng kan me kin wiawihkihda kohl, silper ong soahng kan me kin wiawihkihda silper, prons ong soahng kan me kin wiawihkihda prons, mete ong soahng kan me kin wiawihkihda mete,+ tuhke+ ong soahng kan me kin wiawihkihda tuhke, takai oniks kan oh takai mehn kapwat, kisin takai me soangsoangen poh ong kapwat, soangsoangen takai kesempwal kan oh takai alapaster tohto. 3 Oh pil, pwehki ei perenkihda tehnpesen ei Koht,+ pil mie pein nei+ kohl oh silper me I pahn kihda ong tehnpesen ei Koht, patehng mehkoaros me I kaunopadahr ong tehnpas sarawio, 4 iangahki kohl dalend* 3,000 sang Opir+ oh silper mwakelekel dalend 7,000, mehn kidimala dihd en ihmw kan, 5 kohl ong soahng kan me kin wiawihkihda kohl oh silper ong soahng kan me kin wiawihkihda silper, oh ong doadoahk koaros me tohndoadoahk saman kan pahn wia. Eri ihs me inengieng patohwanohng Siohwa kisakis rahnwet?”+

6 Kaunen peneinei kan, kaunen keinek en Israel kan, kaunen meh kid kan oh kaunen meh epwiki kan+ oh kaunen doadoahk kan en nanmwarkio+ ahpw inengieng kohla mwowe. 7 Oh re kihda kohl dalend 5,000, darik* 10,000, silper dalend 10,000, prons dalend 18,000 oh mete dalend 100,000 ong doadoahk en tehnpesen Koht mehlelo. 8 Koaros me naineki takai kesempwal kan ahpw kihla nan wasahn nahk dipwisou kesempwal en tehnpesen Siohwa, wasa me Seheiel+ mehn Kerson+ kin apwalih. 9 Aramas ako ahpw perenkihda ar wiahda meirong pwukat me re nsenki kihda, pwe re patohwanohng Siohwa meirong pwukat ni mohngiong unsek,+ oh nanmwarki Depit pil perenkihda kowahlap.

10 Depit eri kapinga Siohwa mwohn mesen mwomwohdiso pwon. Depit eri patohwan: “Maing Siohwa, Koht en at pahpa Israel, kaping en kohwong komwi kohkohlahte. 11 Maing Siohwa, komwi me lapalahpie+ oh roson+ oh kaselel oh lingan oh wahu,+ pwe mehkoaros nanleng oh nin sampah iei sapwellimomwi.+ Maing Siohwa, komwi me sapwellimanki wehio.+ Komwi me ketin kasapwilkomwihda pohn mehkoaros. 12 Kepwe kan oh lingan kin pwilisang rehmwi,+ oh komwi kin ketin kaunda mehkoaros,+ oh nin limomwi mie manaman+ oh kehl,+ oh limomwi kak kahrehiong koaros en lapalapala+ oh kehlailla.+ 13 Eri, Maing at Koht, met se kapingkalahngan ong komwi oh kapinga mwaromwi lingan.

14 “Ahpw, ihs ngehi oh ihs nei aramas akan pwe sen wia meirong pwukat me se nsenki wiahda? Pwehki mehkoaros pwilisang rehmwi, oh se patohwanohng komwi dahme kohsang nin limomwi. 15 Pwe mwohn silangomwi kiht mehn liki kei me kousoanla sahpwet oh aramas ekei me keseudo sahpwet, duwehte samat mehn mahs ako koaros.+ Pwe at rahn akan nin sampah rasehng mwete ehu+—sohte koapworopwor. 16 Maing Siohwa at Koht, kepwe pwukat koaros me se kaunopada pwe sen kauwada tehnpas ehu ong mwaromwi sarawi pwilisang nin limomwi, oh komwi me sapwellimanki mepwukat koaros. 17 Maing at Koht, I patohwan ese me komw kin ketin kasawih mohngiong+ oh kin kupwurperenki loalopwoat.*+ I pein nsenki patohwanda mepwukat koaros sang mehlel* en ei mohngiong, oh I uhdahn perenkihda kilang sapwellimomwi aramas akan me mi wasaht ar patohwanohng komwi meirong kan sang ni pein nsenarail. 18 Maing Siohwa, Koht en samat mehn mahs ako, Eipraam, Aisek oh Israel, komw ketin sewese aramas pwukat ren kolokolete soangen madamadau oh ineng wet oh ren papah komwi ni mohngiong unsek.+ 19 Oh komw ketikihong nei pwutak Solomon mohngiong unsek,*+ pwe en kak kapwaiada sapwellimomwi kehkehlik kan,+ mehn kataman kan oh koasoandi kan oh wiahda mepwukat koaros oh kaukihda tehnpas sarawio dipwisou kan me I kaunopadahr.”+

20 Depit eri ndaiong mwomwohdiso pwon: “Kumwail kapinga Siohwa amwail Koht.” Mwomwohdiso pwon eri kapinga Siohwa Koht en samarail mehn mahs ako oh kelepwikihdi oh lukupoardiong Siohwa oh nanmwarkio. 21 Oh mandahn rahno, re pousehlahte patohwanohng Siohwa meirong kan oh patohwanohng Siohwa meirong isihs kan,+ koupwul wol 1,000, sihpw wol 1,000, sihmpwul wol 1,000 oh arail meirong en wain kan;+ irail wiahda meirong tohto ong Israel pwon.+ 22 Rahno re pousehlahte mwengemwenge oh niminim ni peren laud mwohn silangin Siohwa,+ oh keriapak en ar kalohkihda Solomon nein Depit eh wiahla nanmwarki oh keiehdi ih mwohn silangin Siohwa nin duwen kaun+ oh pil Sadok nin duwen samworo.+ 23 Solomon eri wiliandi seme Depit oh mwohndi nan mwoalen Siohwa+ nin duwen nanmwarki, oh e kin pweida oh mehn Israel koaros kin peikiong ih. 24 Lapalap koaros,+ sounpei kehlail kan,+ oh pil nein Nanmwarki Depit pwutak kan koaros+ ahpw uhpahiong nanmwarki Solomon. 25 Oh Siohwa ketin kahrehiong Israel pwon en wauneki mehlel Solomon oh kasapwilada ih en lapalapasang nanmwarkien Israel teikan me momour mwowe.+

26 Depit nein Sehsi kaunda Israel pwon, 27 oh uwen reirei* me e kakaunki Israel iei sounpar 40. Nan Ipron e kakaunki sounpar 7+ oh nan Serusalem e kakaunki sounpar 33.+ 28 Oh e mehla mwurin eh momour werei,+ oh e nsenamwahuki mour werei,* kepwe oh lingan; oh nah pwutak Solomon wiliandi ih wiahla nanmwarki.+ 29 A duwen poadopoad en Nanmwarki Depit, sang ni tapi lel ni imwi, e dierek nan nting kan me Samuel sounkilang kaudiahlo, soukohp Nadan+ oh Kahd+ sounkilang kaudiahlo ntingihedi. 30 Nting pwukat koasoia duwen eh kaunda, eh kehlail oh soahng kan me wiawihong ih oh Israel oh wehi koaros me kapilpene.