Luk

19 Ih eri ketilong oh ketiket kohla nan Seriko. 2 A ohl emen adaneki Sakies mihmi wasao; ih kaunen sounrik daksis men oh e kepwehpwe. 3 Eri, e songosong en kilang Sises, ahpw e sohte kak kilang pwehki pokono oh pwehki e mwotomwot. 4 Ih eri tangala mwowe oh douda pohn tuhke sikamor* pwoat pwe en kilang ih, pwe e pahn ketin keidla wasao. 5 A ni Sises eh ketin lel wasao, e ahpw mahsendalahng oh mahsanihong: “Sakies, mwadang doudihdo pwe rahnwet I uhdahn pahn mi ni imwomwo.” 6 Ih eri mwadang doudi oh perenki kasamwolong ih nan imweo. 7 Ni arail kilang met, irail koaros ahpw lipilipahnede, nda: “E ketila pwe en ketiket nan imwen ohl dipan emen.” 8 Sakies ahpw kesihnenda oh patohwanohng Kauno: “Kilang! Maing Kaun, elep en ei kepwe kan, I pahn kihong me semwehmwe kan oh sohte lipilipil dahme I kulihasang* emen, I pahn kapwurehiong ni uwe pak pahieu.” 9 Sises ahpw mahsanihong: “Rahnwet, komour lelohngehr ni ihmw wet pwehki e pil wia nein Eipraam. 10 Pwe Nein-aramas ketido pwe en rapahki oh komourala me salongalahr kan.”

11 Ni arail rongorong mepwukat, e mahsanihong irail pil apwoat karasaras, pwehki eh ketin kerenlahng Serusalem oh re medewe me Wehin Koht pahn mwadang pwarada. 12 Ih eri mahsanih: “Ohl soupeidi men seiloakla sahpw doh ehu pwe en ale manaman en nanmwarki oh pwurodo. 13 Ni eh ekerodo eh ladu ehk, e kihong irail mina* eisek oh ndaiong irail, ‘Wia pesineski mepwukat lao I pwurodo.’ 14 Ahpw tohn eh wehio kailongki ih oh kadarala pwihnen meninkeder kei mwuri pwe ren nda, ‘Se sohte men ohl menet en wiahla at nanmwarki.’

15 “Kedekedeo ni eh pwurodo mwurin eh alehdier manaman en nanmwarki,* e ahpw ekerodo eh ladu ko me e kihong mwohni* pwe en ese ia uwen mwohni me re wiahda nan arail doadoahk en pesines. 16 Me keieuo eri kohdo reh oh nda, ‘Maing Kaun, noumw minao wiadahr mina eisek.’ 17 E ahpw ndaiong, ‘Uhdahn mwahu, ladu mwahu men kowe! Pwehki omw kadehdehda omw lelepek ni mehkot me inenen tikitik, ke pahn ahneki manaman pohn kahnimw eisek.’ 18 A me keriemeno kohdo nda, ‘Maing Kaun, noumw minao wiadahr mina limau.’ 19 E pil ndaiong memenet, ‘Ke pil pahn ahneki manaman pohn kahnimw limau.’ 20 Ahpw pil emen kohdo nda, ‘Maing Kaun, iet noumw mina me I kin nekinekid nan likou ehu. 21 Ke ese, I kin masak uhk pwehki omw wia ohl limeidihd men; ke kin ale dahme ke sohte kin nekidala oh ke kin dolung dahme ke sohte kin kamwarak.’ 22 E ahpw ndaiong, ‘Ladu suwed men kowe, I pahn kadeingkinuhkada pein omw lokaia. Nahn ke ese me ngehi ohl limeidihd men oh kin ale dahme I sohte kin nekidala oh kin dolung dahme I sohte kin kamwarak? 23 Eri dahme ke sohte kihongki nei mwohnio* nan pangk? Pwe ni ei pwurodo I en ale iangahki wihni.’

24 “Eri, e ndaiong irail ko me kesikesihnen wasao, ‘Kihsang mina en reh oh kihong me naineki mina eiseko.’ 25 Re ahpw ndaiong, ‘Maing Kaun, mieier nah mina eisek!’​— 26 ‘I ndaiong kumwail, mehmen me ahneki mehkot, kalaudpe pil pahn kohieng, ahpw mehmen me sohte ahneki mehkot, dahme e ahneki pil pahn kohsang. 27 Pil wahdo ei imwintihti ko wasaht, irail ko me sohte men I en wiahla arail nanmwarki oh kemeirailla mwohi.’”

28 Mwurin eh mahsanih mepwukat, e ketin tiengla mwohrail ketiket kohdahla Serusalem. 29 Oh ni eh ketin kerenlahng Pedpeiti oh Pedani ni nahna me adaneki Nahnahn Olip, e ahpw poaronehla tohnpadahk riemen, 30 mahsanih: “Kumwa kohwei nan kisin kahnimw mwohnen oh mwurin amwa pedolong loale, kumwa pahn diar dongki pwul men me wie sensel me saikinte aramas dake. Kumwa lapwahda ih oh wahdo ih wasaht. 31 Ahpw ma mehmen idek rehmwa, ‘Dahme kumwa lapwalapwahki dongkien?’ kumwa pahn nda, ‘Kauno ketin anahne.’” 32 Me pekederla ko eri kohieila oh diarada nin duwen me e mahsanihong ira. 33 Ahpw ni ara lapwalapwa dongkio, me naineki ko ahpw ndaiong ira: “Dahme kumwa lapwalapwahki dongkien?” 34 Ira nda: “Kauno ketin anahne.” 35 Ira eri patohwando rehn Sises oh irail irepehkihdi arail likou puhp ko pohn dongkio, Sises ahpw ketidiong powe.

36 Ni eh ketiket kohla, irail ahpw irepehkihdi ar likou puhp ko nanialo. 37 Ni ahnsou me e ketin karanihalahr ahl me kohdi sang Nahnahn Olip, tohnpadahk tohto, irail koaros ahpw tepida perenda oh kapinga Koht ni ngihl laud pwehki manaman koaros me re kilangehr, 38 ndinda: “Meid pai me ketido nin duwen Nanmwarki ni mwaren Siohwa!* Popohl nanleng oh lingan wasa ileile!” 39 Ahpw ekei Parisi ko sang nan pokono patohwanohng: “Maing Sounpadahk, komw ketin lipwoare sapwellimomwi tohnpadahk kan.” 40 E ahpw ketin sapeng mahsanih: “I ndaiong kumwail, ma irail pwukat nennenla, takai kan pahn uhd werda.”

41 Ni eh ketin kerenlahng Serusalem, e mahsanihada kahnimwo oh tentenihrki, 42 mahsanih: “Ma pein kowe dehdehkier rahnwet soahng kan me pid popohl​—ahpw met mepwukat rirsang mesomwen. 43 Pwehki rahn akan pahn kohdohng uhk ni omw imwintihti kan pahn kelehkinuhkpene tuhke kengkeng oh pahn kapiluhkpene oh koaitenuhkala sang ni pali koaros. 44 Re pahn karangkeiukediong nanpwel iangahki noumw seri kan me mi rehmw oh re sohte mwahn pahn luhwehkihdi takai ehu pohn ehu takai rehmw, pwehki omw sohte dehdehki ahnsoun omw pahn ale keseu.”

45 Ih eri ketilong nan tehnpas sarawio oh tepida kasarehieisang irail me wie netinet, 46 oh mahsanihong irail: “E ntingdier, ‘Tehnpesei pahn wia tehnpesen kapakap,’ ahpw kumwail wiahkilahr dewen lipirap akan.”

47 E kin ketin padapadahk nan tehnpas sarawio rahn koaros. Ahpw kaunen samworo ko oh sounkawehwehn Kosonnedo ko oh kaunen aramas akan kin raparapahki pwe ren kemehla ih; 48 re ahpw sohte kak diarada duwen ar pahn wia met, pwe aramas akan koaros kin ieiang ih ahnsou koaros pwe ren rong ih.