Sud
1 Sud, ladun Sises Krais oh rien Seims, ong irail kan me Samatail Koht ketin malipeier oh ketin poakohng oh ketin nekinekid ong Sises Krais:
2 Kadek kalahngan oh popohl oh limpoak en laudla rehmwail.
3 Kompoakepahi ko, mendahki ei kin ngoangki kowahlap en ntingwohng kumwail duwen komour me kitail ahnekipene, I diarada me I anahne ntingwohng kumwail pwe I en kangoangei kumwail en pei kehlail pwehn pere pwoson me kohwongehr me sarawi kan pak ehute kohkohlahte. 4 Kahrepe iei pwehki aramas ekei wailong nanpwungamwail me kadeikparail koasoandier mahs nan Nting Sarawi kan; irail aramas dipan kan, me wekidala kadek sapan en atail Koht ong ni kahrepen arail kin wia me suwed ni ngidingid* oh kadehdehda arail sohte lelepek ong Sises Krais, ih kelehpw me atail soumas oh Kaun.
5 Mendahki amwail uhdahn eseier mepwukat koaros, I men katamankihong kumwail me Siohwa* ketin kapitala aramas ako sang sapwen Isip, mwuri e ahpw ketin kasohrehla irail ko me sohte kasalehda pwoson. 6 Oh tohnleng ko me sohte kolokol dewerail ahpw kesehla uhdahn arail wasa, e ketin salihiraildi nan rotorot mosul kohkohlahte ong kadeik en rahn lapalapo. 7 Pil duwehte Sodom oh Komora oh kahnimw kan me mi limwahra me pil kin wia tiahk me inenen samin me pid wia nsenen pwopwoud* oh kin kaitarala ineng suwed en uduk; re wia mehn kataman ehu ong kitail ni arail aleier kadeik en kalokolok en kisiniei soutuk.*
8 Mendahki met, aramas pwukat pil kin kalapw ouraman, wia tiahk samin, mwamwahliki irail kan me ahneki manaman pohrail oh kin kauwehki lokaia kamedek irail kan me Koht ketin kawauwihala. 9 Ahpw ni ahnsou me Maikel, tohnleng me keieu lapalap ketin uhkihong Tepil paliweren Moses, e sohte mwahn ketin kadeik de kauwehki ih lokaia kamedek, ahpw e mahsanih: “Siohwa* en ketin panawihiuk.” 10 Ahpw aramas pwukat kin kauwe soahng koaros me re sohte uhdahn wehwehki. Oh re kin kauwehkihla pein irail soahng koaros me re ese sang ni pein arail pepehm kan duwehte mahn kan me sohte ar madamadau.
11 Meid suwediong irail pwe re idawehn elen Kain oh mwadang idawehnla ahl suwed en Palaam pwe ren alehki keting oh re mwomwkihla en Kora eh lokaiahn uhwong! 12 Irail pwukat rasehng takai pahn pihl me sohte sansal nan amwail kamadipw en limpoak kan ni arail kin iang kumwail mwenge, silepen sihpw kan me sohte kin namenengki kamwekamwenge pein irail; depwek madekeng me ipipirengkiseli kisinieng; tuhke kan me sohte kin kapwarehda wah ni ahnsawi oh me uhdahn mehla* oh saretepda. 13 Re rasehng ilok kehlail en nansed me kin kihda pwudopwud en arail tiahk kanamenek kan; usu kan me kin moamoahlseli mwahl me nekinek ong rotorot mosul kohkohlahte.
14 Ei, Enok me keisuhwen dih sang Adam pil kohpada duwen irail ni eh koasoia: “Kilang! Siohwa* ketido iangahki sapwellime tohnleng sarawi ngedehrie* 15 pwe en ketin kadeikada koaros oh kedipa irail koaros me sohte kin wauneki Koht pwehki arail wiewia suwed kan koaros me re wiahda oh lokaia lemei koaros me irail me dipan akan wiahiong.”
16 Aramas pwukat kin lipahned, re kin kaulimki arail mour, kapwaiada pein arail ineng kan oh kin suweiki pein irail oh ahnsowohte kapinga meteikan ong pein kamwahuparail.
17 Ahpw ong kumwail kompoakepahi ko, kumwail tamanda dahme sapwellimen atail Kaun Sises Krais wahnpoaron ko koasoiaiong* kumwail mahso, 18 duwen arail kin ndaiong kumwail: “Ni imwin ahnsou, pahn mie sounkepit kan me kin idawehn pein arail ineng suwed kan.” 19 Irail pwukat me kin kahrehda liaktohrohr, re duwehte mahn oh re sohte kin mweidohng Koht* en ketin kaweid irail. 20 Ahpw kumwail kompoakepahi ko, kumwail kakehlakahda pein kumwail ni amwail pwoson me keieu sarawi oh kapakap ni ahl me sapwellimen Koht manaman* kin kaweidkin kumwail, 21 pwe kumwail en dadaurete ni limpoak en Koht, ni amwail kin awiawih kadek kalahngan en atail Kaun Sises Krais me kahluwalahng mour soutuk. 22 Pil pousehlahte kasalehda kadek kalahngan ong ekei irail me kin ahneki peikasal; 23 doareirailla ni amwail pahn serekiniraildo sang nan kisiniei. Pousehlahte kasalehiong meteikan kadek kalahngan, ahpw kumwail wia met ni masak, ni amwail kin kailongki arail likou me saminkilahr arail tiahk suwed.
24 A ong ih me kak ketin pere kumwail pwe kumwail de dipekelekel oh ketin wiahiong kumwail en kesihnenda ni sohte sapwung kis oh peren laud mwohn sapwellime lingan,* 25 lingan, lapalap, roson oh manaman en kaunda en kohwong Koht mehtehmeno atail Sounkomour pwehki Sises Krais atail Kaun, sang mwohn tepin kawa, ahnsou wet oh pil kohkohlahte. Amen.