Eklesiasdes

11 Kesehwei* konomw pilawa pohn pihl,+ pwe mwurin rahn tohto ke pahn pwurehng diar.+ 2 Ehukihong meh isimen de pil welimen dahme ke ahneki,+ pwe ke sehse soangen kahpwal dah me pahn wiawi nin sampah.

3 Ma depwek kan direkihla pihl, re pahn kamwerediong keteu pohn sampah; oh ma tuhke pwoat raukdi palieir de paliepeng, tuhkeo pahn wonohn wasa me e raukdiong ieo.

4 Mehmen me kin mwasamwasahnte kisinieng sohte pahn kamwarak werentuhke, oh mehmen me kin kilikilangete depwek kan sohte pahn dolung mehkot.+

5 Ke sehse ia duwen kehl en mour* eh kin doadoahk nan tihn seri me mi nan kapehden* lih liseian men,+ ih pil duwen omw sehse doadoahk en Koht mehlelo, me ketin wiahda mehkoaros.+

6 Kamwarak werentuhke nimenseng oh ke dehr mweidohng pehmwen en kommoal lao lel nin soutik;+ pwe ke sehse mehnia me pahn pweida, ma me de mwo, de ma koaros pahn pweida.

7 Marain kin kansenamwahu, oh e mwahuwong pwoaren mas en kin kilang ketipin. 8 Ma aramas emen pahn momourki sounpar tohto, a en pereperenki mepwukat koaros.+ Ahpw en tamataman me rahn rotorot kan pahn kakete tohto; mehkoaros me pahn kohdo sohte katepe.+

9 Mwahnakapw, pereperen erein omw pwulopwul, oh omw mohngiong en pereperen nindoken omw pwulopwul. Wia dahme omw mohngiong kin perenki oh kohla wasa me mesomw kan kin kahluwaiukalahng; ahpw ken ese me Koht mehlelo pahn ketin kadeingkin* uhk mepwukat koaros.+ 10 Eri kihsang nan omw mohngiong soahng kapwunod kan, oh pere paliweromw* sang soahng keper kan, pwe pwulopwul oh kehlail en pwulopwul kin sohte katepe.+