Keieun Kronikel

28 Depit eri kapokonepene lapalap koaros en Israel nan Serusalem: kaunen keinek kan, kaunen pwihn kan+ me kin papah nanmwarkio, kaunen meh kid kan oh kaunen meh epwiki kan,+ kaun akan me kin apwalih kepwe oh mahn koaros me nanmwarkio+ oh nah pwutak kan naineki,+ iangahki lapalap akan en tehnpaso oh aramas kehlail oh koahiek koaros.+ 2 Nanmwarki Depit eri kesihnenda oh nda:

“Riei ko oh nei aramas akan, kumwail rong ie. I kin inengieng nan ei mohngiong en kauwada tehnpas ehu nin duwen wasahn kommoal ong kohpwahn inou lap en Siohwa oh nin duwen utupen aluweluwen atail Koht,+ oh I kaunopadahr mehn kauwada.+ 3 Ahpw Koht mehlelo ketin mahsanihong ie, ‘Ke sohte pahn kauwada tehnpas ehu ong mwarei,+ pwe kowe sounpei men oh ke kakeredier nta.’+ 4 Ahpw, Siohwa, Koht en Israel ketin piliehda sang peneinei en semei pwon pwe I en wiahla nanmwarkien Israel kohkohlahte,+ pwe e ketin pilada Suda nin duwen kaun oh sang peneinei en Suda,+ e ketin pilada peneinei en semeio,+ oh nanpwungen nein semeio pwutak kan, ngehi me e ketin kupwurki en wiahkihla nanmwarkien Israel pwon.+ 5 Oh Siohwa ketikihongieier pwutak tohto,+ oh nanpwungen nei pwutak kan koaros, e ketin pilada nei pwutak Solomon+ en mwohd nan mwoalen Siohwa oh kaunda Israel.+

6 “E ketin mahsanihong ie, ‘Noumw pwutak Solomon me pahn kauwada tehnpesei oh ei wasa kelpene kan, pwe I piladahr ih en wia nei pwutak oh I pahn wiahla seme.+ 7 I pahn katengehdi eh manaman en nanmwarki kohkohlahte+ ma e koasoanehdi teng en peikiong ei kehkehlik kan oh ei kosonned kan,+ duwehte me e kin wiewia ahnsou wet.’ 8 Eri I pahn nda mwohn mesen Israel pwon, sapwellimen Siohwa mwomwohdiso oh mwohn silangin atail Koht: Kumwail kapwaiada oh rapahki ni keneinei kehkehlik kan koaros en Siohwa amwail Koht, pwe kumwail en sapwenikihla sahpw mwahwo+ oh kadakadaur ong noumwail pwutak kan nin duwen sohso poatopoat ehu.

9 “A kowe, nei pwutak Solomon, esehla Koht en semomwo oh papah ih ni mohngiong unsek*+ oh mohngiong* peren, pwe Siohwa kin ketin tetehk mohngiong koaros,+ oh e kin ketin dehdehki ineng en madamadau koaros.+ Ma ke pahn rapahki ih, ke pahn diar ih,+ ahpw ma ke pahn kohkohsang ih, e pahn ketin soikuhkala kohkohlahte.+ 10 Eri, kilang pwe Siohwa ketin piluhkadahr ken kauwada tehnpas ehu nin duwen wasa sarawi ehu. Kommwad oh tepida doadoahk.”

11 Depit eri kihong nah pwutako Solomon pilahn en kauwada+ palangko+ oh pere kan, wasahn nahk kan, perehn powe kan, perehn masloale kan oh ihmw* en tomwo.+ 12 E kihong ih pilahn en kauwada soahng koaros me kasansalohng ih sang ngehn sarawi,* ong wasa kelpene kan+ en tehnpesen Siohwa, ong perehn mwenge kan koaros me kapilpene, ong wasahn nahk dipwisou kesempwal kan en tehnpesen Koht mehlelo oh ong wasahn nahk dipwisou kan me kasarawihla.*+ 13 Oh Depit pil kihong ih kaweid me pid pwihnen samworo kan+ oh mehn Lipai kan, ong pwukoa koaros me pid doadoahk en tehnpesen Siohwa oh ong dipwisou koaros me kin kadoadoahk ong papah nan tehnpesen Siohwa; 14 E koasoanehdi uwen toutoun kohl kan, kohl ong dipwisou koaros ong soangsoangen doadoahk kan, uwen toutoun dipwisou silper koaros ong soangsoangen doadoahk kan; 15 oh pil uwen toutoun soangsoangen dewen lamp kohl kan+ oh lamp kan oh uwen toutoun soangsoangen dewen lamp silper kan oh lamp kan; 16 oh pil uwen toutoun kohl ong tehpel en pilawa koasoakoasoak* kan,+ ong ehuehu tehpel oh pil uwen toutoun silper ong tehpel silper kan, 17 oh pil kohl tohr ong pwohk kan, pwohl kan oh sah kan, oh uwen toutoun ehuehu pwohl kohl tikitik,+ oh uwen toutoun ehuehu pwohl silper tikitik. 18 E pil koasoanehdi uwen toutoun kohl mwakelekel ong pei sarawi en isik warpwohmwahu+ oh ong kurumahn karasaraso,+ me iei, kerup+ kohl ko me kapapeseng ara pehnpihr kan oh pwaindi kohpwahn inou lap en Siohwa. 19 Depit nda: “Limen Siohwa mi pohi, oh e ketikihong ie dehde mwahu pwe I en ntingihedi+ oaritik koaros duwen pilahn en kauwada tehnpaso.”+

20 Depit eri ndaiong nah pwutak Solomon: “Kommwad oh kehlail oh tepida doadoahk. Ke dehr perki de masak, pwe Siohwa Koht, ei Koht, ketin ieiang uhk.+ E sohte pahn ketin mweisang uhk de keseiukala,+ ahpw e pahn ketin ieiang uhk lao doadoahk koaros ong tehnpesen Siohwa imwisekla. 21 Iet pwihnen samworo kan+ oh mehn Lipai kan+ ong doadoahk koaros en tehnpesen Koht mehlelo. Mie noumw tohndoadoahk koahiek kan me men seweseiuk nan doadoahk koaros,+ oh pil lapalap akan+ oh aramas koaros me pahn kapwaiada omw kaweid kan koaros.”