Esekiel
17 Siohwa ketin pwurehng mahsanihong ie: 2 “Nein-aramas, koasoia ehu kahk oh koasoia lepin kahs ehu duwen aramas en Israel kan.+ 3 Ke pahn nda, ‘Iet me Kaun Wasa Lapalahpie Siohwa ketin mahsanih: “Ikel lapala,+ me eh pehnpihr kan lapala, reirei, oh diren wune ni soangsoangen poh, ahpw kohdo Lepanon+ oh wahsang kadoken sidaro.+ 4 E katipwasang rah pwulopwul en kadoken sidaro oh wahdo nan sapwen sounnetinet kan* oh kihdiong nan kahnimw en sounnetinet kan.+ 5 Ih eri ale ekei werentuhkehn sahpwo+ oh kihdiong nan mwetuwel pwelmwahu ehu. E padokedi duwehte tuhke pwoat* me kin keirda limwahn pihl tohto. 6 Eri e wosada oh wiahla tuhkehn kreip karakarahk me rarahn,+ teh ko uhlongala oh kalewe kan kohkohpeseng pah. Eri e wiahla tuhkehn kreip pwoat oh kin kawosehda pons oh rah kan.+
7 “‘“Oh pil mie emen lapalahn ikel ahpw kohdo,+ me eh pehnpihr kan lapala oh wune kan mosul.+ Tuhkehn kreip wet ngoangki kareireila kalewe ko rehn ikelo, sang ni uluhl en mwetuwel kan me e poadidi ieo, oh e kadarieila teh ko rehn ikelo pwe ikelo en kanimpile.+ 8 E poadidier nan mwaht mwahu ehu limwahn pihl tohto, pwehn kawosehda rah kan, pwehn wa, oh wiahla tuhkehn kreip lapala ehu.”’+
9 “Nda, ‘Iet me Kaun Wasa Lapalahpie Siohwa ketin mahsanih: “Ia duwe, e pahn keirda? Sohte me pahn usada kalewe kan+ oh kauwehla wah kan oh kamengala pons kan?+ E uhdahn pahn mengila me kahrehda sohte pehn aramas kehlail men de pil aramas tohto pahn anahn pwehn usadahsang kalewe kan. 10 Mendahki e kosouda oh pwurehng poad, ia duwe, e pahn keirda? E sou pahn mengila douluhl ni kisinieng en palimese eh ipidohng powe? E pahn mengila pohn uluhl en mwetuwelo wasa me e wosada ieo.”’”
11 Oh Siohwa ketin pwurehng mahsanihong ie: 12 “Menlau ndaiong aramas uhwong kan, ‘Kumwail sohte wehwehki wehwehn mepwukat?’ Nda, ‘Kilang! Nanmwarkien Papilon kohdo Serusalem oh wahsang nanmwarkio* oh nah lapalap akan oh wairailda pwuralahng Papilon.+ 13 Oh e pil ale emen peneinei en nanmwarkio+ oh wiahda inou lap ehu reh oh wiahiong ih en kahukihla me e pahn loalopwoat.+ Ih eri wahsang ohl lapalap akan nan sahpwo,+ 14 pwe wehio en luwetala, sohla kak pwurehng kehlailla, ihte ma aramas ako kolokolete inou lapo me wehio pahn mihmihkihte.+ 15 Ahpw nanmwarkio pelianda ih+ ni eh kadarala nah meninkeder kan Isip pwe en ale oahs kan+ oh karis en sounpei kalaimwun ehu sang rehrail.+ Ia duwe, e pahn pweida? Aramas me wia mepwukat pahn pitsang kalokolok? E kak kauwehla inou lapo oh pitila?’+
16 “‘Kaun Wasa Lapalahpie Siohwa ketin mahsanih, “Nin duwen ei ieias, e pahn mehla nan Papilon, wasa me nanmwarki* me wiahiong ih* en wiahla nanmwarki mihmi ie, pwehki e mwamwahlikihla eh kahula oh kauwehla eh inou lapo.+ 17 Oh karis en sounpei kalaimwuno oh nein Parao pwihnen sounpei tohto kan sohte pahn sawas nan mahweno,+ ni ahnsou me koasoakoasoak kan kohda oh dihd en kapilpene kan kokouda pwehn kemehla aramas* tohto. 18 E mwamwahlkihla kahula ehu oh kauwehla inou lap ehu. Mendahki e wiadahr inou,* e wia mepwukat koaros, oh e sohte pahn pitila.”’
19 “‘Kahrehda iet me Kaun Wasa Lapalahpie Siohwa ketin mahsanih: “Nin duwen ei ieias, I pahn kihdiong pohn moange imwilahn eh mwamwahlikihla eh kahula ni mwarei+ oh kauwehla inou lap me e wiahda mwohi.* 20 I pahn kesepeseng ei uhko powe, oh e pahn lohdi nan ei uhko.+ I pahn wahla ih Papilon oh kadeikada ih wasao pwehki eh salelepek ong ie.+ 21 Koaros nah pwihnen sounpei kan me tang pahn mehkihla kedlahs, oh irail me luhwehdi pahn mwarahkpeseng wasa koaros.*+ Eri ke pahn anahne ese me ngehi, Siohwa me mahmahsen.”’+
22 “‘Iet me Kaun Wasa Lapalahpie Siohwa ketin mahsanih: “I pahn ale rah pwulopwul pwoat sang kadoken sidar ileo+ oh padokedi. Sang ni kadoken kisin rah ko I pahn katipwasang rah pwulopwul pwoat,+ oh I pahn padokedi pohn nahna ehu me uhdahn ileile.+ 23 I pahn padokedi pohn nahna ileile en Israel; oh rah kan pahn keirda, oh e pahn wa oh wiahla sidar lapala ehu. Oh soangen menpihr koaros pahn kousoan pah oh kin mi pahn mweteh kan. 24 Oh tuhkehn nansapw akan koaros pahn ese me ngehi, Siohwa, me karakarahkihala tuhke ileo oh wiahiong tuhke karakarahko en lapalapala;+ I kamengala tuhke losoloso oh wiahiong tuhke mengo en masalpeseng.+ Ngehi, Siohwa me mahmahsen oh kapwaiadahr met.”’”