Esekiel

20 Eri ni keisuhwen sounpar, ni kelimaun sounpwong, ni kaeisek en rahn en sounpwongo, ekei ohl mah en Israel ko ahpw kohdo oh mwohndi mwohi pwe ren kalelapak rehn Siohwa. 2 Siohwa ketin mahsanihong ie: 3 “Nein-aramas, koasoiong ohl mah kan en Israel oh ndaiong irail, ‘Iet me Kaun Wasa Lapalahpie Siohwa ketin mahsanih: “Kumwail kodohn kalelapak rehi? ‘Nin duwen ei ieias, I sohte pahn sapeng amwail iren kalelapak kan,’+ Kaun Wasa Lapalahpie Siohwa me ketin mahmahsen.”’

4 “Ke onopadahngehr kadeik irail?* Nein-aramas, ke onopadahngehr kadeik irail? Wiahiong irail en ese soahng kasaut kan me samarail mehn mahs ako wiahda.+ 5 Ndaiong irail, ‘Iet me Kaun Wasa Lapalahpie Siohwa ketin mahsanih: “Rahn me I pilada Israel,+ I pil kahula* ong kadaudok en nein Seikop seri kan, oh I wiahiong irail en ese ihs ngehi nan Isip.+ Ei, I kahukihong irail oh nda, ‘Ngehi me Siohwa amwail Koht.’ 6 Rahno I kahukihla me I pahn wairaildo sang nan sapwen Isip oh wairaillahng nan sahpw ehu me I rapahkihda* ong irail, sahpw ehu me inenen pwelmwahu.*+ Sahpwo me keieu kaselel nanpwungen sahpw kan koaros. 7 Ngehi eri ndaiong irail, ‘Emenemen kumwail anahne kesehla soahng kasaut kan me mi mwohn masamwail kan; kumwail dehr kasaminehkihla pein kumwail dikedik kasaut kan* en Isip.+ Ngehi me Siohwa amwail Koht.’+

8 “‘“Ahpw re uhwongiehda oh sohte men rong ie. Re sohte kesehla soahng kasaut kan me mi mwohrail, oh re sohte kesehla dikedik kasaut kan en Isip.+ Eri I inoukihda I en wudekihdi ei engieng pohrail oh uhdahn kadarohng irail ei engieng nan sapwen Isip. 9 Ahpw I sohte wia met pwehki mwarei en dehr saminla mwohn wehi kan me re mi nanpwungarail.+ Pwehki I wiahiong irail* en ese ihs ngehi mwohn wehi pwukat ni ei wairaildo* sang nan sapwen Isip.+ 10 Eri I wairaildo sang nan sapwen Isip oh kahluwairaillahng nan sapwtehno.+

11 “‘“Ngehi eri kihong irail ei koasoandi kan oh wiahiong irail en ese ei kosonned kan,+ pwe aramas me kin idawehn mepwukat en momourte.+ 12 I pil kihong irail ei sapad kan+ nin duwen kilel ehu nanpwungen ngehi oh irail,+ pwe irail en ese me ngehi, Siohwa, me kasarawihirailla.

13 “‘“Ahpw aramas en Israel kan uhwongiehda nan sapwtehno.+ Re sohte keid nan ei koasoandi kan, oh re soikala ei kosonned kan, me ma aramas emen pahn idawehn mepwukat e pahn momourte. Re uhdahn kasaminehla ei sapad kan. Eri I inoukihda I en wudekihdi ei engieng pohrail nan sapwtehno pwehn kasohreirailla.+ 14 Ahpw I sohte wia met pwehki mwarei en dehr saminla mwohn wehi kan. I wairaildo* mwohn masarail kan.+ 15 I pil kahukihong irail nan sapwtehno me I sohte pahn wairailla nan sahpw me I kilelehiong irail+—sahpw ehu me inenen pwelmwahu,*+ me keieu kaselel nanpwungen sahpw kan koaros— 16 pwehki re soikala ei kosonned kan, re sohte keid nan ei koasoandi kan, oh re kasaminehla ei sapad kan, pwe arail mohngiong ideidawehn ar dikedik kasaut kan.+

17 “‘“Ahpw I* poakeirailla, oh I sohte kamwomwirailla; I sohte kasohreirailla nan sapwtehno. 18 I ndaiong neirail seri kan nan sapwtehno,+ ‘Kumwail dehpa keid nan koasoandi en samamwail mehn mahs ako+ de kapwaiada ar pilipil kan de kasaminehkinkumwailla arail dikedik kasaut kan. 19 Ngehi me Siohwa amwail Koht. Kumwail keid nan ei koasoandi kan, oh kolokol ei kosonned kan, oh kapwaiada mepwukat.+ 20 Oh kumwail kasarawihala ei sapad kan,+ oh mepwukat pahn wia kilel ehu nanpwungen ngehi oh kumwail pwe kumwail en ese me ngehi me Siohwa amwail Koht.’+

21 “‘“Ahpw neirail seri ko tepida uhwongiehda.+ Re sohte keid nan ei koasoandi kan, oh re sohte peikiong oh kapwaiada ei kosonned kan, me ma aramas emen pahn idawehn mepwukat e pahn momourte. Re kasaminehla ei sapad kan. Eri I inoukihda I en wudekihdi ei engieng pohrail oh uhdahn kadarohng irail ei engieng nan sapwtehno.+ 22 Ahpw I sohte wia met+ oh I mwekid pwehki mwarei,+ pwe en dehr saminla mwohn wehi kan. I wairaildo* mwohn masarail kan. 23 I pil kahukihong irail nan sapwtehno me I pahn kamwarakirailpeseng nan wehi kan oh kihirailpeseng nan sahpw kan,+ 24 pwehki re sohte kapwaiada ei kosonned kan oh re soikala ei koasoandi kan,+ re kasaminehla ei sapad kan, oh re idawehn dikedik kasaut en samarail mehn mahs ako.+ 25 I pil mweidohng irail en idawehn koasoandi kan me sohte mwahu oh kosonned kan me sohte kak kihong irail mour.+ 26 I mweidohng irail en saminkihla ar meirong kan—ni ar meirongkihla mesenih koaros nan kisiniei*+—pwe I en kamwomwirailla, pwe ren ese me ngehi me Siohwa.”’

27 “Eri nein-aramas, koasoiong aramas en Israel kan oh ndaiong irail, ‘Iet me Kaun Wasa Lapalahpie Siohwa ketin mahsanih: “Pil ni ahl wet, samamwail mehn mahs ako lahlahwe ie ni ar wiahda mwekid salelepek ong ie. 28 I wairailla nan sahpw me I kahukihla en kihong irail.+ Ni ar kilangada dohl ile ko koaros oh tuhke losolos kan,+ re ahpw tepida wiahda ar meirong kan oh ar meirong kasaut kan. Re wiahda pwoh kansenamwahu en ar meirong kan oh wudekihdi ar meirong en wain kan wasao. 29 Eri I idek rehrail, ‘Ia kahrepen amwail kin kolahng wasa ile wet? (E kin adanekihte Wasa Ile leledo rahnwet.)’”’+

30 “Eri ndaiong aramas en Israel kan, ‘Iet me Kaun Wasa Lapalahpie Siohwa ketin mahsanih: “Kumwail kin kaskasaminehla pein kumwail duwehte me samamwail mehn mahs ako wia ni ar idawehn ar dikedik kasaut kan, pwe ren kaudokiong* dikedik kan?+ 31 Oh ia duwe, kumwail kin kasamineikumwailahte leledo rahnwet ni amwail wiahda meirong kan ong amwail dikedik kasaut kan, meirongkihla noumwail seri kan nan kisiniei?*+ Aramas en Israel kan, ia duwe, I pil pahn sapeng amwail iren kalelapak kan mendahki met?”’+

“‘Nin duwen ei ieias, I sohte pahn sapeng amwail iren kalelapak kan,’+ Kaun Wasa Lapalahpie Siohwa me ketin mahmahsen.” 32 Oh kumwail kin nda: “Nna kitail duwehla wehi kan, duwehte peneinei en sahpw teikan, me kin kaudokiong* tuhke oh takai,”+ ahpw dahme kumwail kin medemedewe sohte pahn wiawi.’”

33 “Kaun Wasa Lapalahpie Siohwa ketin mahsanih, ‘Nin duwen ei ieias, nin limei roson oh manaman lapalap, oh ni engieng laud, I pahn kaunkumwailda nin duwen nanmwarki.+ 34 Sang nin limei roson oh manaman lapalap oh engieng laud, I pahn waikumwailsang rehn aramas akan oh kihkumwailpene sang sahpw kan me kumwail mwarahkpeseng ie.+ 35 I pahn waikumwailla nan sapwtehn en aramas akan oh sohpeiong kumwail oh kadeingkumwailda wasao.+

36 “‘Duwehte ei kadeikada samamwail mehn mahs ako nan sapwtehn en sapwen Isip, eri I pahn kadeingkumwailda,’ Kaun Wasa Lapalahpie Siohwa me ketin mahmahsen. 37 ‘I pahn wiahiong kumwail en kin daulih pahn nein silepen sihpwo sokono+ oh wiahiong kumwail en pwukoahki kapwaiada* inou lapo. 38 Ahpw I pahn kihsang me kin uhwong kan rehmwail oh irail me kin kauwehla ei kosonned kan.+ Pwe I pahn wairaildo sang sahpw en liki me re kin koukousoan ie, ahpw re sohte pahn pedolong nan sapwen Israel;+ oh kumwail pahn anahne ese me ngehi me Siohwa.’

39 “A kumwail, aramas en Israel kan, iet me Kaun Wasa Lapalahpie Siohwa ketin mahsanih: ‘Emenemen kumwail en kohwei oh papah eh dikedik kasaut kan.+ Ahpw mwurin mwo, mehnda ma kumwail sohte rong ie, kumwail sohla pahn kak kasaminehla mwarei sarawi sang amwail meirong kan oh amwail dikedik kasaut kan.’+

40 “Kaun Wasa Lapalahpie Siohwa ketin mahsanih, ‘Pwe ni ei nahna sarawio, pohn nahna ile en Israel,+ iei wasa me aramas en Israel pwon, irail koaros, pahn papah ie nan sahpwo.+ I pahn kupwurperenki irail wasao, oh I pahn kupwurki kumwail en wahdo kisakis kan oh amwail meirong me keieu mwahu kan, amwail soahng sarawi kan koaros.+ 41 Pwehki pwoh kansenamwahu, I pahn kupwurperenkin kumwail ni ei waikumwailsang rehn aramas akan oh kihkumwailpene sang sahpw kan me kumwail mwarahkpeseng ie;+ oh I pahn sarawihla nanpwungamwail mwohn mesen wehi kan.’+

42 “‘Oh kumwail pahn anahne ese me ngehi me Siohwa+ ni ei waikumwailla nan sapwen Israel,+ nan sahpw me I kahukihla en kihong samamwail mehn mahs ako. 43 Oh wasao kumwail pahn tamataman amwail mwekid kan oh amwail wiewia kan koaros me kumwail kasaminehkinkumwailla,+ oh kumwail pahn pein kasautkin kumwail* pwehki soahng suwed koaros me kumwail wiahda.+ 44 Eri kumwail aramas en Israel kan, kumwail pahn anahne ese me ngehi me Siohwa ni ei wiahiong kumwail met pwehki mwarei+ oh ni ei sohte kaloke kumwail nin duwen amwail mwekid suwed de amwail wiewia mwersuwed kan,’ Kaun Wasa Lapalahpie Siohwa me ketin mahmahsen.”

45 Oh Siohwa ketin pwurehng mahsanihong ie: 46 “Nein-aramas, sohpeilahng wasa me mi palieir oh lohkohng palieir, oh wia kokohp ong nanwel en sapwen palieir. 47 Ndaiong nanwel en palieir, ‘Rong mahsen en Siohwa. Iet me Kaun Wasa Lapalahpie Siohwa ketin mahsanih: “I pahn wiahda kisiniei ehu me pahn uhwong uhk,+ oh e pahn kamwasikahla tuhke losolos koaros oh me meng koaros rehmw. Kisiniei lullulo sohte pahn kunla,+ oh mas koaros pahn mwasingkihla, sang palieir kohla paliepeng. 48 Oh aramas* koaros pahn kilang me ngehi, Siohwa, me isikada, oh e sohte pahn kunla.”’”+

49 Oh I nda: “Maing Kaun Wasa Lapalahpie Siohwa! Re kin ndindahkin ie, ‘E sou kin koasoakoasoia kahk kan?’”*