Esekiel

16 Siohwa ketin pwurehng mahsanihong ie: 2 “Nein-aramas, kasalehiong Serusalem eh wiewia kasaut kan.+ 3 Ke pahn nda, ‘Iet me Kaun Wasa Lapalahpie Siohwa ketin mahsanihong Serusalem: “Wasa me ke kohsang ie oh ipwidi ie mi nan sapwen mehn Kenan kan. Omw pahpao mehn Amor,+ oh omw nohno mehn Id.+ 4 A ni omw ipwidi, ni rahn me ke ipwidi, omw sahl en pwuhso sohte lupsang, ke sohte wideuda nan pihl pwe ken mwakelekelda, ke sohte irihrki soahl, oh ke sohte kidikidkihla likou. 5 Sohte me poakeiukala pwehn wiahiong uhk mepwukat. Sohte me nsenohkin uhk. Ke lekdekla nan mohs pwehki re kin kailongkin uhk sangete rahn me ke ipwidi.

6 “‘“Ni ei keid wasao, I kilangada omw kingkikseli nan omw nta, oh ni omw wonohn wasao nan omw nta, I nda: ‘Ken wie momourte!’ Ei, I ndaiong uhk ni omw wonohn wasao nan omw nta: ‘Ken wie momourte!’ 7 I wiahiong uhk ken uhdahn ngederla, duwehte kisin tuhke kan ar tohtohla nan mwaht, oh ke kekeirda oh laudla oh doadoahngki mehn kapwat keieu kaselel kan. Omw dihdi kan laudla, oh pitenmoangomw reireila; ahpw ke uhdahn kilisou.”’

8 “‘Ni ei keid wasao oh kilanguhkada, I tehkada me ke lelehr ahnsoun ahneki mwohnlimpoak. Ngehi eri kihpeseng ei likowo pohmw+ oh pwaindi omw kilisou oh kahukihla inou lap ehu rehmw, oh ke wiahla ahi,’ Kaun Wasa Lapalahpie Siohwa me ketin mahmahsen. 9 Oh I pil widenkinuhkada pihl oh widensang omw ntao oh keiehkin uhk leh.+ 10 Ngehi eri kalikawihkinuhkada likou deiad oh kihong uhk suht kilin mahn* kaselel oh kidimkinuhkpene likou linen kaselel, oh kalikawihkinuhkada likou pweilaud kan. 11 I kapwatahkinuhkada mehn kapwat kan oh kihong luwou kan ni pehmw kan oh mwaramwar ni tepinweromw. 12 I pil kihong rihng pwoat ni tumwomw oh tiati kan ni salengomw kan oh nihn kaselel ehu pohn moangomw. 13 Ke kin usehlahte kapwatahkinuhkada kohl oh silper, oh omw likou kan linen kaselel, oh likou pweilaud, oh likou deiad. Ke kin kang pilawa amas mwahu, sukehn loangalap oh leh, oh ke uhdahn kaselella,+ oh ke pwungiong en wiahla lih nanmwarki men.’”*

14 “‘Omw ndand* tepida kohpeseng nan wehi kan+ pwehki omw kaselel. Omw kaselelen me unsek pwehki ei lingan me I kihdiong pohmw,’+ Kaun Wasa Lapalahpie Siohwa me ketin mahmahsen.”

15 “‘Ahpw ke tepida likih omw kaselel,+ oh ke wiahla lihen netiki paliwere men pwehki omw ndand.+ Ke kin netiki paliweromw rehn koaros me kin kohdo rehmw,+ oh ke kihiukala rehrail. 16 Ke ale ekei omw likou kan oh wiahda wasa ile ni soangsoangen poh kan, wasa me ke kin netiki paliweromw+—mepwukat sohte konehng en wiawi de pil pwurehng wiawi. 17 Ke pil ale omw mehn kapwat kaselel kan me wiawihkihda kohl oh silper me I kihong uhk oh wiadahng pein kowe sansal en ohl kan oh netiki paliweromw rehrail.+ 18 Oh ke ale omw likou deiad kan oh pwainkiniraildi,* oh ke meirongkihong irail ei leh oh ei warpwohmwahu.+ 19 Oh pilawa me I kihong uhk—me wiawihdahsang pilawa amas mwahu, leh oh sukehn loangalap me I kihong uhk ken tungoale—ke pil meirongkihong irail nin duwen pwoh kansenamwahu ehu.+ Ih met me uhdahn wiawi,’ Kaun Wasa Lapalahpie Siohwa me ketin mahmahsen.”

20 “‘Ke ale noumw pwutak kan oh serepein kan me ke naitikihong ie,+ oh meirongkinirailla rehn dikedik pwukat+—ia duwe, ke sohte itarki omw wiewiahn netiki paliweromw? 21 Ke kemehla nei seri kan, oh ke meirongkinirailla nan kisiniei.*+ 22 Ni omw wia omw wiewia kasaut kan oh wiewiahn netiki paliwar kan koaros, ke sohte tamataman rahnen omw pwulopwul ni omw kilisou, kingkikseli nan omw nta. 23 Meid suwed, meid suwediong uhk, mwurin omw wiadahr omw suwed koaros,’+ Kaun Wasa Lapalahpie Siohwa me ketin mahmahsen. 24 ‘Ke kauwada wasahn kaudokiong koht likamw kan oh wiahda wasa ile ehu ong pein kowe nan wasahn tuhpene kan koaros. 25 Ke kauwada omw wasa ile kan ni wasa keieu sansal kan ni ahl koaros, oh ke kawekiong omw kaselel ni mehkot kasaut ni omw kihla paliweromw* rehn koaros me kohdo rehmw,+ oh ke katohtohwehla omw wiewiahn netiki paliweromw.+ 26 Ke netiki paliweromw rehn mehn Isip kan,+ mehn mpomw ineng kehlail kan,* oh ke kansensuwedihkiniehla omw wiewiahn netiki paliweromw tohto kan. 27 Met I pahn kapahla limeiet oh katikitikihala mwenge kan me kin kohwong uhk+ oh kihiukala rehn lih akan me kin kailongkin uhk ren wiahiong uhk dahme re mwahuki,+ nein mehn Pilisdia kan serepein kan, me pwuriamweila pwehki omw wiewia samin.+

28 “‘Pwehki ke sohte itarki, ke uhd netiki paliweromw rehn mehn Asiria kan,+ ahpw mwurin omw netiki paliweromw rehrail, ke pil sohte itarkihte. 29 Eri ke kalaudehla omw netiki paliweromw ni sapwen sounnetinet kan* oh rehn mehn Kaldia kan,+ ahpw pil ahnsowo ke sohte itarki. 30 Ia uwen soumwahu* en omw mohngiong,* ni omw wiahda mepwukat koaros, duwehte lihen netiki paliwere men me sehse namenek!’+ Kaun Wasa Lapalahpie Siohwa me ketin mahmahsen. 31 ‘Ahpw ni omw wiahda wasahn kaudokiong koht likamw kan ni wasa keieu sansal kan ni ahl koaros, oh ni omw wiahda omw wasa ile nan wasahn tuhpene kan koaros, ke sohte duwehte lihen netiki paliwere men, pwehki ke kahng ale pweipwei kan. 32 Kowe lih pwopwoud me kin kamwahl me kin mwahuki mehn liki kan a kaidehn pein eh pwoud!+ 33 Aramas kin kisekise lihen netiki paliwararail kan koaros,+ ahpw kowe me kin kisekise koaros me kin inangihiuk,+ oh ke kin pwain irail ren kohdo rehmw sang wasa koaros pwe ren iang wia wiewiahn netiki paliwar.+ 34 Ke weksang lih teikan me kin netiki paliwararail kan. Sohte me kin netiki paliwere duwehte me ke kin wia! Ke kin pwain meteikan, oh re sohte kin pwain uhk. Dahme ke kin wia weksang lih teikan.’

35 “Kahrehda, kowe lihen netiki paliwere,+ rong mahsen en Siohwa. 36 Iet me Kaun Wasa Lapalahpie Siohwa ketin mahsanih: ‘Pwehki omw kasalehdahr omw ineng kehlail oh omw kilisou sansalda ni omw netiki paliweromw rehn omw mwohnlimpoak kan oh omw dikedik kasaut kan*+ koaros me ke pil meirongkihong ntahn noumw seri kan,+ 37 eri I pahn kihpene omw mwohnlimpoak koaros me ke kaperenda, koaros me ke poakohng iangahki koaros me ke kailongki. I pahn kihirailpene pwe ren uhwong uhk sang wasa koaros oh kasalehiong irail omw kilisou, oh re pahn kilang omw kilisouda douluhl.+

38 “‘Oh I pahn kalokehkin uhk kadeik kan me lihen kamwahl kan+ oh lih me kakerehdi nta+ warohng ale, oh omw nta pahn keredi ni engieng oh luwak.+ 39 I pahn kihiukala nan pehrail kan, oh re pahn kamwerehdi omw wasahn kaudokiong koht likamw kan, oh omw wasa ile kan pahn rengkidi;+ oh re pahn kapwuhrasang omw likou kan+ oh ale omw mehn kapwat kaselel kan+ oh kohkohsang uhk nan omw kilisou. 40 Re pahn wahdo pokon ehu pwehn uhwong uhk,+ oh re pahn kateiuk+ oh kemehkinuhkala neirail kedlahs kan.+ 41 Re pahn isikada imwomw kan+ oh kadeikuhkada mwohn mesen lih tohto; oh I pahn katokehdi omw kin netiki paliweromw,+ oh ke sohla pahn kihda pweipwei kan. 42 I pahn kameleileidi ei engieng pahmw,+ oh ei engieng pahn sohpeisang uhk;+ oh I pahn meleileidi oh sohla nsensuwed.’

43 “‘Pwehki ke sohte tamataman rahnen omw pwulopwul+ oh ke kahngiangihiehda ni omw wia mepwukat koaros, met I pahn kihdiong pohn moangomw imwilahn omw wiewia kan, oh ke sohla pahn wia omw wiewia samin oh omw wiewia kasaut kan koaros,’ Kaun Wasa Lapalahpie Siohwa me ketin mahmahsen.

44 “‘Kilang! Koaros me kin doadoahngki lepin kahs kan pahn ndahki lepin kahs wet duwen kowe: “Serepeino duwehtehte eh nohno!”+ 45 Ke duwehte omw nohno, me mwamwahliki eh pwoud oh nah seri kan. Oh ke duwehte riomw serepein kan, me mwamwahliki ar pwoud kan oh neirail seri kan. Omw nohno mehn Id, oh omw pahpa mehn Amor.’”+

46 “‘Riomw serepein laud iei Sameria,+ me kin koukousoan ni omw paliepeng* iangahki nah serepein kan,*+ oh riomw serepein tikitik, me kin koukousoan ni omw palieir,* iei Sodom+ iangahki nah serepein kan.+ 47 Ke sohte kin keidte nan ar ahl akan oh idawehnte ar wiewia kasaut kan, ahpw kisin ahnsou kis omw wiewia kan koaros suwedsang arail kan.+ 48 Nin duwen ei ieias, riomwo Sodom oh nah serepein kan sohte wia dahme kowe oh noumw serepein kan wiahda,’ Kaun Wasa Lapalahpie Siohwa me ketin mahmahsen. 49 ‘Kilang! Iet sapwung en riomwo Sodom: Ih oh nah serepein kan+ me aklapalap+ oh tohto kanarail mwenge+ oh re sohte kin pwunodki mehkot;+ ahpw re sohte sewese me lokolok kan oh me semwehmwe kan.+ 50 Re aklapalapte+ oh wiewiahte wiewia kasaut kan mwohn silangi,+ eri I diarada me I anahne kasohreirailla.+

51 “‘De pil Sameria+ sohte wiahda elep en dihp me ke wiahda. Ke kin usehlahte wia omw wiewia kasaut kan laudsang me re wiahda, lao lel me e mwomwen riomw serepeino pwung pwehki omw wiewia kasaut kan koaros.+ 52 Met ke pahn weuwa kanamenekpomw pwehki omw utung wiewiahn* riomw serepein kan. Pwehki dipomw kan kasaut sang diparail kan, irail pwung sang uhk. Eri, namenekla oh weuwa kanamenekpen omw wiahiong riomw serepein kan ren mwomwen pwung.’

53 “‘Oh I pahn kihpene neirail me selidi kan, me selidi kan en Sodom oh nah serepein kan oh me selidi kan en Sameria oh nah serepein kan; I pil pahn kihpene noumw me selidi kan iangahki irail,+ 54 pwe ken weuwa kanamenekpomw; oh ke pahn namenekla pwehki dahme ke wiahda ni omw kansenamwahwihirailla. 55 Riomw serepein kan, Sodom oh nah serepein kan, pahn pwuralahng arail irair en mahso, oh Sameria oh nah serepein kan pahn pwuralahng arail irair en mahso, oh kowe iangahki noumw serepein kan pahn pwuralahng amwail irair en mahso.+ 56 Ke sohte katapanki koasoia riomw serepein Sodom ni rahn me ke aklapalapala, 57 mwohn omw suwed eh sansalda.+ Met nein Siria serepein kan oh mehn mpe kan kin kauweiuk, oh nein mehn Pilisdia kan serepein kan,+ irail me kapiluhkpene, kin mwamwahlikin uhk. 58 Ke pahn weuwa imwilahn omw wiewia samin kan oh omw wiewia kasaut kan,’ Siohwa me ketin mahmahsen.”

59 “Pwe iet me Kaun Wasa Lapalahpie Siohwa ketin mahsanih: ‘Met I pahn wiahiong uhk duwehte dahme ke wiahdao,+ pwe ke mwamwahlikihla inou me ke kahukihlao ni omw kauwehla ei inou lapo.+ 60 Ahpw pein ngehi pahn tamataman inou lap me I wiahiong uhk ni rahnen omw pwulopwulo, oh I pahn wiahiong uhk inou lap poatopoat ehu.+ 61 Ke pahn tamataman omw wiewia oh namenekla+ ni omw pahn kasamwo riomw serepein kan, irail ako me laudsang uhk iangahki irail ako me tikitik sang uhk, oh I pahn kihong uhk irail nin duwen noumw serepein, ahpw kaidehn pwehki omw inou lapo.’

62 “‘Oh I pahn wiahda ei inou lap rehmw; oh ke pahn anahne ese me ngehi me Siohwa. 63 Eri ke pahn tamatamante oh namenengki sarapeseng pwehki omw namenek,+ ni ei mahkohng uhk* mendahki mehkoaros me ke wiadahr,’+ Kaun Wasa Lapalahpie Siohwa me ketin mahmahsen.”