2 Sohn

1 Ohl maho* ong lih me pilipildahr oh nah seri kan, me I kin poakohng mehlel, a kaidehn ngehite ahpw pil irail koaros me esehla me mehlelo, 2 pwehki me mehlelo kin mihmi loalatail oh pahn mihmi rehtail kohkohlahte. 3 Kadek sapan, kadek kalahngan, oh popohl sang rehn Samatail Koht oh Sises Krais, Sapwellimen Sahmo pahn mi rehtail, iangahki mehlel oh limpoak.

4 I uhdahn perenkihda ei diarada me ekei noumw seri kan kin weweid ni me mehlelo, nin duwen atail alehdi kehkehlik sang rehn Sahmo. 5 Eri lih, met I peki rehmw, kitail en poakohng emenemen. (I ntingkiwohng uhk, kaidehn kehkehlik kapw ehu, ahpw kehkehlik me kitail aleier sang nin tapio.) 6 Oh iet wehwehn limpoak, kitail en pousehlahte weweid nin duwen sapwellime kehkehlik kan. Duwehte amwail rongehr sang nin tapio, sapwellime kehkehlik me iei kumwail en pousehlahte weweidki limpoak. 7 Pwe sounwiding tohto pwaradahr nin sampah, irail kan me sohte kin pohnese me Sises Krais ketido nin duwen aramas emen.* Emen me kin wia met iei ih me sounwiding oh imwintihtien Krais.

8 Kumwail kanahieng pein kumwail pwe kumwail en dehr katihasang soahng kan me se koadoahkihadahr, ahpw kumwail en ale ketingpamwail ni unsek. 9 Mehmen me daulihala padahk en Krais oh sohte kin mi nan padahk wet, sohte kin miniminiong Koht. Mehmen me kin mi nan padahk wet, iei ih me kin miniminiong Sahmo oh pil Sapwellimeo. 10 Ma emen kohdo rehmwail oh sohte wahdo padahk wet, kumwail dehr kasamwolong ih nan imwamwail de pil rahnmwahwih. 11 Pwe emen me rahnmwahwih ih kin utung eh wiewia suwed kan.

12 Mie soahng tohto me I pahn ntingkiwohng kumwail, ahpw I sohte men ntingiheki doaropwe oh ingk, ahpw I koapworopworki me I pahn kohwei rehmwail oh koasoiaiong kumwail ni atail pahn tuhpene, pwe amwail peren en uhdahn laudla.

13 Nein riomw serepein seri kan, me pilipildahro, kadarewei arail rahnmwahu ong uhk.