Wiewia

17 Irail eri seiloakla oh kotehla Ampipolis oh Apolonia lella Deselonika, wasa me ahn mehn Suhs sinakoke ehu mi ie. 2 Eri nin duwen me Pohl kin epwehnki wia, e pedolongala rehrail nan sinakokeo, oh erein rahnen sapad siluh, e kin padahkih irail sang ni eh sewesehkin irail en medemedewe Nting Sarawi kan, 3 oh kin kawehwe oh kadehde sang ni dahme ntingdier me Krais anahne lokolok oh iasada sang rehn me melahr akan, e ahpw nda: “Sises menet me I kin lohkihong kumwail, iei ih Krais.” 4 Met kahrehda ekei irail pwosonlahr oh kin werekiong Pohl oh Sailas, oh pil mehn Krihs tohtohie me kin kaudokiong Koht, iangahki lih kesempwal tohto.

5 Ahpw mehn Suhs ako peirinkihda, irail eri kapokonepene ohl suwed kei me kin kohkohseli mwahl nan wasahn netinet kan oh wiahda pwihnen moromor ehu oh kamwoarongehda kahnimwo. Irail eri kohla kauwehla imwen Seisono, raparapahki Pohl oh Sailas pwe ren wadohng ira rehn aramas ako. 6 Ni arail sohte diarirahda, re ahpw wurahdekihla Seison oh ekei riatail ko rehn kaun akan en kahnimwo, oh weriwerki: “Ohl pwukat me kahredahr kahpwal wasa koaros pil iang mi wasaht, 7 oh Seison kasamwolong ira nan imweo. Ohl pwukat koaros uhwongada kosonned en Sihsar ni arail nda me pil mie emen nanmwarki, Sises.” 8 Ni pokono oh kaun akan en kahnimwo ar rongada mepwukat, irail ahpw perkihda; 9 oh mwurin Seison oh meteikan ar kihong irail uwen pweipwei ehu me konehng pwe ren lapwkihda, re ahpw kadarirailla.

10 Ni ahnsowohte, nipwongo, riatail ko ahpw kadaralahng Peria Pohl oh Sailas. Ni ara lella mwo, ira pedolong nan sinakoke en mehn Suhs akan. 11 Eri irail pwukat uhdahn men esehla laudsang irail nan Deselonika, pwehki arail ngoangki mehlel mahseno oh rahn koaros irail kin tehk kanahieng Nting Sarawi kan pwe irail en kilang ma soahng kan me irail rong me mehlel. 12 Eri, me tohto nanpwungarail pwosonlahr, iangahki lihen Krihs waun tohto oh pil ohl ekei. 13 Ahpw ni mehn Suhs ako sang Deselonika ar esehda me Pohl pil lohki mahsen en Koht nan Peria, irail eri kohdo wasao pwe en kamwoarongehda aramas ako ren uhwongada irail. 14 Riatail ko ahpw mwadangete kadarala Pohl lella ni oaroahro, ahpw Sailas oh Timoty mihmihte mwo. 15 Ahpw irail ko me iang Pohl iangala ih lel Adens, oh irail mweselda mwurin arail alehdier kaweid me Sailas oh Timoty anahne kohla rehn Pohl ni ahnsou karuwaru.

16 A ni Pohl eh awiawih ira nan Adens, e* ahpw lingeringerkihda eh kilangada diren dikedik nan kahnimwo. 17 Kahrehda e tepida padapadahk nan sinakokeo ong mehn Suhs oh meteikan me kin kaudokiong Koht, oh pil rahn koaros nan wasahn netineto ong irail me kin alialu wasao, sang ni eh kin sewese irail en medemedewe dahme e koasoakoasoia. 18 Ahpw ekei sounpadahk en pwihnen Epikurus oh Sdohik ahpw tepida akupwungiong, oh ekei irail nda: “Dahme ewenwedeien men nda?” A ekei nda: “Likamwete ih sounkalohki koht en sahpw teikan.” Irail nda met pwehki e kin lohki duwen rongamwahu en Sises oh duwen iasada. 19 Irail eri koledi oh kahrelahng ih ni Areopakus, oh nda: “Se kak iang esehla duwen padahk kapw wet me ke kin koasoia duwe? 20 Pwe ke kin koasoia soahng kei me se sohte kin rong oh se men ese ia wehwehn mepwukat.” 21 Ni mehlel, mehn Adens koaros oh tohnwehi teikan me mihmi* wasao, re kin doadoahngki arail ahnsoun kommoal ongete koasoakoasoia de rongorong soahng kapw kan. 22 Pohl eri kesihnenda nanpwungen Areopakuso oh nda:

“Mehn Adens kan, I kilang me ni soahng koaros kumwail kin lemmwiki koht akan laudsang* meteikan. 23 Karasepe, ni ei kin kohkohseli oh tetehk mwahu soahng kan me kumwail kin pwongih,* I diarada pei sarawi ehu me nting pwukat mi powe ‘Ong Koht Emen me Sohte me Ese.’ Eri, dahme kumwail kin kaudokiong ni amwail sohte kin ese, ih me I kin kalohkihong kumwail. 24 Koht me ketin wiahda sampah oh audepe kan koaros, ih me Kaunepen lahng oh sampah, sohte kin ketiket nan imwen kaudok kan me pehn aramas wiahda; 25 e pil sohte ketin anahne aramas en papah ih pwehki e anahne mehkot, pwe pein ih me ketikihong aramas koaros mour oh esingek oh pil soahng koaros. 26 Oh e ketin wiahda tohnwehi koaros sang aramas tehmen pwe ren kousoanla nan sampah pwon, oh e ketin koasoanedier ahnsou kan me kileldier oh wasa me aramas pahn kousoan ie, 27 pwe ren rapahki Koht. Ma re pahn nantihong rapahki ih re kak diarada ih. Pwe ni mehlel, e sohte ketin dohsang emenemen kitail. 28 Pwe kitail kin momour oh mwekimwekid oh mihmi pwehki ih, duwehte me ekei noumwail sounnting kan kin nda, ‘Pwe kitail pil sapwellime seri.’

29 “Eri, pwehki kitail sapwellimen Koht seri, kitail en dehr medewe me Koht duwehte mwomwen kohl de silper de takai, mehkot me aramas medewehda oh wiahda. 30 Mehlel me Koht ketin melielahr ahnsou me aramas akan sehse ih, ahpw met e kin ketin kalohkihong aramas akan wasa koaros me irail anahne koluhla. 31 Pwehki e ketin koasoanehdier rahn ehu me e pahn ketin kadeingkihda sampah pwon pwung, sang rehn ohl emen me e ketin pilada, oh e ketikihda mehn kamehlelpen met ong aramas koaros sang ni eh ketin kaiasada ih sang rehn me melahr akan.”

32 Eri ni ahnsou me irail rong duwen iasadahn me melahr akan, ekei irail ahpw kepitki, a ekei nda: “Se pahn pwurehng rongasang rehmw duwen met.” 33 Eri, Pohl ahpw mweselsang irail, 34 ahpw ekei aramas iangala ih oh pwosonla. Emen irail iei Daionisius me wia sounkopwung emen nan mwoalen kopwung en Areopakus, oh lih emen me ede Damaris, oh pil meh kei likin irail.