Pailimwon
1 Pohl, me sensel pwehki Krais Sises, oh riatail Timoty, ong Pailimwon iangat tohndoadoahk kompoake, 2 oh ong riat lih Appia, oh Arkipus iangat sounpei, oh ong mwomwohdiso me kin tuhpene nan imwomwo:
3 Samatail Koht oh Kaun Sises Krais en ketikihong kumwail kadek sapan oh popohl.
4 Ahnsou koaros I kin kalahngankihong ei Koht ni ei kin tamanuhkada nan ei kapakap kan, 5 ni ei kin rong duwen omw pwoson Kaun Sises oh limpoak me ke ahneki ong ih oh aramas sarawi kan koaros. 6 I kin kapakapki pwoson me kowe oh meteikan kin ehukihpene en kamwakid uhk en pohnese soahng mwahu koaros me kitail ahneki rehn Krais. 7 Pwe I uhdahn perenda oh nsenamwahula ni ei rong duwen omw limpoak. Riei, pwehki kowe, mohngiong* en aramas sarawi kan kin kehlailda.
8 Ong ni kahrepe wet, mendahki e mie ei saledek laud en koasoi ni mwaren Krais pwe I en ruweseiuk ken wia dahme konehng, 9 ahpw I pahn peki rehmw ni ei ese omw limpoak, pwehki ngehi Pohl, ohl mah men, oh pil ahnsou wet I wie sensel pwehki Krais Sises. 10 I kin pekipek rehmw pwehki nei seri Onesimus, me I wialahr seme ni ei mi nan imweteng.* 11 Mahso, e sohte wia katep ehu ong uhk, ahpw met e katapan ong uhk oh pil ong ie. 12 I pahn kapwurehwei ih rehmw, ei, ih me wia ei mohngiong.*
13 I men en mihmihte rehi met, pwe en wilianuhkedi sewese ie ni ei wie sensel pwehki rongamwahwo. 14 Ahpw I sohte men wia mehkot ma ke sohte pwungki, pwe omw wiewia mwahu en pweida, sang ni pein nsenomw, ahpw kaidehn ni idihd. 15 Mwein ih kahrepen eh sohla mihmi rehmw erein ahnsoukis,* pwe ken pwurehng nainekihla kohkohlahte, 16 kaidehn nin duwen lidu men, ahpw laudsang lidu, nin duwen riatail me kompoak. I poakohng ih laud, oh ke pahn poakohng ih laudsang, nin duwen lidu men oh pil nin duwen me pwoson men rehn Kauno. 17 Eri ma ke wiahkin ie kompoakepahmw, kasamwo ih ni kadek duwehte omw pahn wiahiong ie. 18 Patehng met, ma e wiahiong uhk mehkot sapwung de pweipwandkihong uhk mehkot, ntingihediong nan nei pwuhko. 19 Ngehi Pohl, me ntingihedi ni pein mengin pehiet: I pahn pwainwei—I sohte anahne ndawei me ke pweipwandkihong ie pein kowe. 20 Eri riei, I koapworopworki en ale sawas wet sang rehmw pwehki ata miniminiong Kauno; kakehlaka mohngiongi* sang ni omw kin miniminiong Krais.
21 I kamehlele me ke pahn wia met, kahrehda I ntingwei rehmw, pwe I ese me ke pahn wia laudsang dahme I nda. 22 Oh pil kaunopadahng ie ehu wasa me I en mi ie, pwe I koapworopworki me sang ni amwail kapakap kan, I pahn pwurowei rehmwail.*
23 Epapras, iengei me selidi pwehki Krais Sises, kadarewei eh rahnmwahu, 24 oh pil Mark, Aristarkus, Demas oh Luk, iengei tohndoadoahk kan.
25 Kadek sapan en Kaun Sises Krais en kin ieiang lamalam mwahu* me kumwail kin kasalehda.