Wiewia

9 Ahpw Sohl kin kamakamasakte oh kin uhdahn men kemehla tohnpadahk kan en Kauno, ahpw kohla rehn samworo lapalapo 2 oh peki reh kisinlikou ong sinakoke kan nan Damaskus, pwe e pahn salihedi irail ohl oh lih koaros me e diar me kisehn Ahlo oh wahdo Serusalem.

3 Eri ni eh seiseiloakla oh kerenlahng Damaskus, marain ehu sang nanleng pa pirte kapilpene ih, 4 e ahpw pwupwudiong nan pwehl oh rongada ngihl ehu me ndaiong ih: “Sohl, Sohl, dahme ke kalokalokehkin ie?” 5 E ahpw patohwan idek: “Ihs komwi, maing Kaun?” E ahpw mahsanih: “Ngehi Sises me ke kin kalokaloke. 6 Eri uhda oh kohla nan kahnimwo oh aramas emen pahn ndaiong uhk dahme ke pahn wia.” 7 Eri ohl ako me iang ih seiseiloak ahpw kesikesihnen oh nennenla. Ni mehlel, irail rongorong ngihlo ahpw sohte me re kilang. 8 Sohl eri uhda sang nan pwehlo oh mendahki poaren mese ko eh pehdpeseng, ahpw sohte mehkot e kak kilang. Irail eri koledi peh oh kahrelahng Damaskus. 9 Erein rahn siluh, e sohte kak kilang mehkot oh e sohte pil kang oh nim mehkot.

10 Nan Damaskus, mie emen tohnpadahk me ede Ananaias, oh Kauno mahsanihong ih nan kaudiahl ehu: “Ananaias!” E ahpw patohwan: “Iet ngehi, maing Kaun.” 11 Kauno eri mahsanihong: “Uhda, kohla nan ahl me adaneki Ahl Inen oh rapahki ohl emen me ede Sohl sang Tarsus, ni imwen Sudas. Pwe kilang! e wie kapakap, 12 oh nan kaudiahl ehu e kilangada ohl emen me ede Ananaias me kohdo oh pwil peh kan powe pwe en kak pwurehng kilangada wasa.” 13 Ananaias ahpw sapengki: “Maing Kaun, I rongasang me tohto duwen ohl menet, duwen kalokolok koaros me e wiahiong sapwellimomwi aramas akan* nan Serusalem. 14 Oh e kodohngehr wasaht ni eh aleier manaman sang rehn kaun en samworo ko pwe en parokedi* irail koaros me kin likweriong mwaromwi.” 15 Ahpw Kauno mahsanihong: “Kohla! pwehki I piladahr ohl menet pwe en walahng mehn liki kan oh nanmwarki kan oh pil mehn Israel kan edei. 16 Pwe I pahn kasalehiong ih lokolok koaros me e anahne lelohng pwehki edei.”

17 Ananaias eri kohla oh pedolong nan ihmwo oh pwil peh ko powe oh nda: “Riei Sohl, Kauno Sises me ketin pwarohng uhk pohn ahl me ke keid ie kohdo, me poaroneiehdo pwe ken kak pwurehng kilangada wasa oh direkihla sapwellimen Koht manaman.”* 18 A ni ahnsowohte, mehkot me duwehte wunen mwahmw ahpw pwupwudi sang ni pwoaren mese ko oh e pwurehng kilangada wasa. E ahpw uhda oh papidaisla, 19 oh e ekis mwenge oh kehlailda.

E mihmi rehn tohnpadahk ko nan Damaskus erein rahn ekei, 20 oh e mwadangete tepida kalohki duwen Sises nan sinakoke kan, me iei ih me Sapwellimen Koht. 21 Ahpw irail koaros me rong ih inenen pwuriamweikihla oh nda: “Kaidehn ohl menet me kin kauwehla irail ko nan Serusalem me kin likweriong mwar wet? E sou kodohng wasaht pwe en parokiraildi oh wairaillahng* kaunen samworo ko?” 22 Ahpw Sohl kekehlailla nan eh kalohk oh e kin kapingada mehn Suhs akan me kin kousoan nan Damaskus ni eh kin kasalehda ni sansal me met iei Krais.

23 Eri ni rahn tohto eh douwehr powe, mehn Suhs ako ahpw koasoanehdi ni rir pwe ren kemehla ih. 24 Ahpw Sohl esehda duwen arail koasoandio. Irail ahpw pil kin mwasamwasahnte ewen kehlo ni rahn oh ni pwong pwe irail en kemehla ih. 25 Eri pwohng ehu, nah tohnpadahk ko ale ih, kihdiong nan kopwou ehu oh kadaridi sang ni wenihmwtok en kehlo.

26 Ni eh lel Serusalem, e kin nantihong iang tohnpadahk ko, ahpw irail koaros masak ih pwehki arail sohte kamehlele me ih emen tohnpadahk. 27 Parnapas eri sewesehda oh kahrehla Sohl rehn wahnpoaron ko oh ndaiong irail ni oaritik duwen Sohl eh kilangada Kauno pohn ahlo oh me Kauno mahseniong ih, oh duwen Sohl eh eimah koasoi ni mwaren Sises nan Damaskus. 28 Ih eri mihmihte rehrail oh kin kohkohseli* nan Serusalem, koasoakoasoi ni eimah ni mwaren Kauno. 29 E kin koasoakoasoi oh akupwungiong mehn Suhs me kin lokaiahn Krihs, irail ahpw kin song ren kemehla. 30 Ni ahnsou me riatail ko diarada duwen met, irail ahpw wahdihla ih Sesaria oh kadaralahng Tarsus.

31 Eri, ni mehlel, erein ahnsou ehu, mwomwohdiso nan Sudia oh Kalili oh Sameria pwon ahpw meleileidi oh kekeirda; oh ni mwomwohdiso eh kin kekeidwei ni lemmwin Siohwa* oh pil kehl sang sapwellimen Koht manaman,* e kin wie tohtohla.

32 Eri ni Piter eh seiseiloakseli wasa koaros nan sahpwo, e pil kohdihla rehn tohnpadahk kan* me kin kousoan nan Lida. 33 E ahpw diarada ohl emen wasao me ede Enias me kin wonohnte nan eh peht erein sounpar waluh, pwehki e mwoator. 34 Piter ndaiong ih: “Enias, Sises Krais ketin kamwahwihiukala. Pwourda oh koasoanehdi omw pehten.” A ni ahnsowohte, e uhda. 35 Ni ahnsou me irail koaros me kin kousoan nan Lida oh Patapat en Saron kilangada ih, re pwosonla Kauno.

36 Eri mie tohnpadahk men nan Sopa me ede Dapida, me wehwehki “Dorkas.”* E me diren wiewia mwahu oh e kin sewese me semwehmwe kan. 37 Ahpw ni ahnsowo, e soumwahuda oh mehla. Irail eri kamwakelehda oh kihdiong ih nan pere ehu powe. 38 Pwehki Lida eh karanih Sopa, ni tohnpadahk ko ar rongada me Piter mihmi nan kahnimwo, re ahpw kadarala ohl riemen pwe ira en peki reh, nda: “Menlau mwadangodo reht.” 39 Eri, Piter ahpw uhda oh iangirahda. Ni eh lella wasao, ira ahpw kahredalahng nan perehn powe; liohdi ko koaros ahpw tuhwong oh wie sengiseng oh kasalehiong likou tohto oh pil likou reirei* tohto me Dorkas wiadahr ni eh mihmi rehrail. 40 Piter eri kihirailieila koaros likio, e ahpw kelepwikihdi oh kapakap. Ih eri sohpeiong paliwaro oh nda: “Dapida, pwourda!” E ahpw pehdpeseng, oh ni eh kilangada Piter, e ahpw mwohdada. 41 Ni Piter eh koledi peho, e ahpw kasihnenihada oh likwerih tohnpadahk ko* oh liohdi ko oh kasalehiong irail me Dapida momour. 42 Rohng wet ahpw lohkseli nan Sopa pwon, oh aramas tohto pwosonlahr Kauno. 43 E mihmi nan Sopa erein rahn tohto rehn sounwia kilin mahn men me ede Saimon.