Wiewia
22 “Riei ko oh semei ko, kumwail rong mahs ei pahn kawehwehiong kumwail dahme wiawi.” 2 Eri ni arail rongada me e lokolokaia ong irail ni lokaiahn Ipru, re ahpw uhdahn nennenla, e ahpw nda: 3 “Ngehi mehn Suhs men me ipwidi nan Tarsus en Silisia, ahpw pein Kamaliel me kasukuhliehda nan kahnimw wet oh kin kaweidkin ie I en kapwaiada ni unsek oaritikpen Kosonned en samatail mehn mahs ako, oh I kin ngoangki sapwellimen Koht doadoahk duwehte kumwail koaros rahnwet. 4 I kin kaloke irail akan me kin idawehn Ahl pwoatet lao re mehla, oh salihedi ohl akan oh pil lih akan oh kihirailong nan imweteng, 5 duwehte samworo lapalap oh pwihnen ohl mah kan ar kak kadehde. I pil alehsang irail kisinlikou kei ong riatail ko nan Damaskus, oh I kohla pwe I en salihedi irail ko me mi wasao oh wadohng nan Serusalem pwe ren kalokolok.
6 “Ahpw ni ei seiseiloak oh kerenlahng Damaskus, mwein ni souwas, marain lapala ehu sang nanleng pa dakeriehda oh kapiliepene, 7 I ahpw pwupwudiong nan pwehlo oh rongada ngihl ehu me mahsanihong ie: ‘Sohl, Sohl, dahme ke kin kalokalokehkin ie?’ 8 I ahpw sapengki: ‘Ihs komwi, maing Kaun?’ Oh e mahsanihong ie: ‘Ngehi Sises mehn Nasaret me ke kin kalokaloke.’ 9 Eri ohl ako me iang ie pil kilang maraino, ahpw re sohte rong* kapitien me mahmahseniong ieo. 10 I ahpw patohwan: ‘A dahme I pahn wia, maing Kaun?’ Kauno ahpw mahsanihong ie: ‘Uhda oh kohla Damaskus, oh emen ahpw pahn ndaiong uhk mwo duwen soahng koaros me koasoandiong uhk ken wia.’ 11 Ahpw pwehki ei sohte kak kilang mehkot pwehki lingan en maraino, I ahpw lellahng Damaskus ni iengei ko ar kol pehiet oh kahreiehla mwo.
12 “Eri, ohl emen me ede Ananaias, ohl poadidi men nin duwen Kosonnedo oh adamwahu rehn mehn Suhs koaros me kin kousoan wasao, 13 ahpw kohdo rehi. Ih eri kesihnenda limwahi oh ndaiong ie: ‘Riei Sohl, pwurehng kilangada wasa!’ Oh ni ahnsowohte I sarada oh kilangada ih. 14 E ahpw nda: ‘Koht en samatail mehn mahs ako ketin piluhkada pwe ken esehla kupwure oh kilang me pwungo oh rong kapitien doauese, 15 pwehki ke pahn wia sounkadehde men ong ih pwe en kalohkihong aramas koaros duwen soahng kan me ke kilangehr oh rongehr. 16 Eri, dahme ke pwapwandki? Uhda, papidaisla oh widensang dipomw kan sang ni omw pahn likweriong mware.’
17 “Ahpw ni ei pwuralahng Serusalem oh wie kapakap nan tehnpas sarawio, I ahpw kilangada kaudiahl ehu 18 oh kilang eh mahsanihong ie: ‘Kanahng oh mwadangewei sang Serusalem pwe re sohte pahn pwungki omw kadehde ie.’ 19 A I patohwan: ‘Maing Kaun, irail inenen ese me I kin kohla nan ehuehu sinakoke kan oh kin kihlong nan imweteng oh wokih irail ko me kin kamehlelei komwi; 20 oh ni ahnsou me ntahn sapwellimomwi sounkadehde Stipen kakerekerdi, pein ngehi kesikesihnen mwo oh pil pwungki oh apwahpwalih en irail ko me kemehla ih ar likou puhp kan.’ 21 E ahpw mahsanihong ie: ‘Kohwei, pwe I pahn kadaruhkalahng wasa doh, rehn mehn liki kan.’”
22 Eri irail wie rongorong ih lao lel ahnsowo. Irail ahpw ngihl laudida nda: “Kihsang soangen aramaset nin sampah, pwe e sohte konehng en momour!” 23 Pwehki arail kin wie weriwer, kesekeseseli arail likou puhp ko oh kesekesedahng pwelpar nan wehwe, 24 kaunen karis en sounpeio ahpw ruwese Pohl en wisiklahng nan ahn sounpei ko wasahn kousoan oh nda me e anahne kapeidek oh wowoki pwe en kak uhdahn wehwehki kahrepen arail weriwer uhwong Pohl ni mwohmw wet. 25 Ahpw ni arail pirepene ih pwe en wokih, Pohl ahpw ndaiong kaunen sounpei me kesikesihnen wasao: “Mie amwail pwuhng en wokih mehn Rom men* me saikinte pakadeikda?”* 26 Eri, ni ahnsou me kaunen sounpeio rongada met, e ahpw kohla rehn kaunen karis en sounpeio oh kairehki, oh nda: “Eri, dahme ke pahn wia? Pwe ohl menet mehn Rom men.” 27 Kaunen karis en sounpeio eri kohla oh ndaiong ih: “Ndaiong ie mahs, kowe mehn Rom men?” E ahpw nda: “Ei.” 28 Kaunen karis en sounpeio ahpw sapengki: “I pwainkihda uwen mwohni laud ehu pwungen wiahla towe mehlel men.” Pohl ahpw nda: “Ahpw I ahneki pwuhng pwukat sang ni ei ipwidi.”
29 Eri, ni ahnsowohte, ohl ako me pahn kapeidakih oh kaloke ahpw pweieklahsang ih; oh kaunen karis en sounpeio ahpw masepwehkada ni eh esedahr me ih mehn Rom men oh me e salihekihdi selmete.
30 Eri mandahn rahno, pwehki eh men ese ni mehlel kahrepen mehn Suhs ako ar kedipa, e lapwahda ih oh ruwese kaunen samworo ko oh tohn Sanedrin* koaros ren pokonpene. Ih eri wahdihla Pohl oh kasihnenihada nanpwungarail.