Wiewia

5 Ahpw ohl emen me ede Ananaias, iangahki eh pwoud Sapaira, netin sahpw. 2 Ahpw e ekihla ekis pweine, me eh pwoud pil iang ese, e ahpw wahdo luhweo oh kihong wahnpoaron ko. 3 Piter ahpw nda: “Ananaias, dahme kahrehda Sehdan kamwakidkin uhk ken pitih sapwellimen Koht manaman* oh ekihla ekis pweinen sahpwo? 4 Erein sahpwo eh mihmihte rehmw, e sou wiahte sapwomw? Oh mwurin eh netila, mwohnio sou mihmihte rehmw? Dahme kahrehda ke lemehkihda soangen wiewia duwehte met nan omw mohngiong? Kaidehn aramas me ke pitih pwe Koht.” 5 Ni Ananaias eh rong koasoi pwukat, e ahpw pwupwudi oh mehla. Lemmwin kowahlap ahpw kipehdi aramas ako koaros me rong duwen met. 6 Mwahnakapw kei eri uhda, kidimkipene ih likou, wahieila liki oh sarepedi.

7 Eri eh pwoudo pedolong mpen awa siluh mwuri, ahpw e sehse dahme wiawihero. 8 Piter ahpw ndaiong: “Ndahdo mahs, ih uwen mwohni koaros me kumwa ale sang ni pweinen sahpw me kumwa netikilahro?” E ahpw nda: “Ei, ih uwe men.” 9 Piter eri ndaiong: “Dahme kahrehda kumwa pwungkipene kumwa en kasonge sapwellimen Siohwa* manaman?* Kilang! Nehn irail ko me sarepedier omw pwoud miher ni wenihmwo oh re pahn waiukala liki.” 10 Ni ahnsowohte, e pwupwudi ni nehn Piter ko oh mehla. Ni mwahnakapw ko ar pedolong, irail diarada me e melahr, irail ahpw wahieila ih liki oh sarepedi limwahn eh pwoudo. 11 Lemmwin kowahlap ahpw kipehdi mwomwohdiso pwon oh irail koaros me rong duwen mepwukat.

12 Patehng met, wahnpoaron ko kin doulahte wiahda kilel oh soahng kapwuriamwei tohto rehn aramas akan; oh irail koaros kin tuhpene ni Palangk en Solomon. 13 Ni mehlel, meteikan sohte eimahiong iangirailla; ahpw aramas akan kin uhdahn kapinga irail. 14 Laudsang met, me pwosonlahr Kauno kin wie tohtohla, irail me ngedehrie, ohl oh lih akan. 15 Irail pil kin wahieila me soumwahu kan ni ahllap akan oh pwilikihdiong irail pohn kisin peht kan oh lohs kan, pwe ni Piter eh pahn daulih wasao, mweteo en kak lel ekei irail. 16 Oh pil pokon en aramas akan sang kahnimw kan me mi limwahn Serusalem kin kohkohdo, weuwa me soumwahu kan oh pil irail me ngehn saut tiada pohrail, irail koaros ahpw mwahula.

17 Samworo lapalapo oh koaros me iang ih, me wia pwihn en Sadusi ahpw kesihnenda oh uhdahn peirinkihda. 18 Irail ahpw koledi* wahnpoaron ko oh kihlong nan imweteng. 19 Ahpw nipwongo, sapwellimen Siohwa* tohnleng men ahpw ritingada wenihmw kan en imwetengo, kahreirailiei oh nda: 20 “Kumwail kohwei, kesihnenda nan tehnpas sarawio, oh koasoiaiong aramas akan mehkoaros duwen mour wet.” 21 Mwurin arail rongehr met, irail ahpw pedolong nan tehnpas sarawio nimensehngie oh tepida padapadahk.

Eri ni ahnsou me samworo lapalapo oh ienge ko leledohr, irail ahpw ekerpene tohn Sanedrin* oh koaros me iang pwihn en ohl mah kan en tohnwehin Israel, re ahpw ileklahng imwetengo pwe wahnpoaron ko en wisikdo mwohrail. 22 Ahpw ni sounsilasil kan en tehnpas sarawio ar lella mwo, irail sohte diar wahnpoaron ko nan imwetengo. Irail eri pwurala oh kairehki irail, 23 nda: “Se diar imwetengo eh loakdi teng oh silepe ko ar kesikesihnen ni wenihmw ko, ahpw ni at ritingada, sohte emen me se diar loale.” 24 Eri, ni sounapwalih en tehnpas sarawio oh kaunen samworo ko ar rongada koasoi pwukat, irail ahpw pwonopwonkihda dahme pahn wiawi mwuhr. 25 Aramas emen ahpw kohdo oh kairehkin irail: “Kilang! Ohl ako me kumwail kihlong nan imweteng mi nan tehnpas sarawio, kesikesihnen oh padapadahkih aramas akan.” 26 Sounapwaliho ahpw kohieila iangahki nah sounsilasil ko oh wairaildo, ahpw kaidehn ni lemei pwehki ar masak aramas ako de kostakai irail.

27 Irail eri wairaildo oh kasihnenihrailda nan Sanedrino. Samworo lapalapo ahpw peidek rehrail 28 oh nda: “Se ruwese kumwail en dehr kin padahk ni ahd wet, ahpw kilang! kumwail kadirehkihla Serusalem amwail padahk oh kumwail koasoanedier en kapwukoahkin kiht eh mehla.”* 29 Piter oh wahnpoaron teiko ahpw nda: “Se anahne peikiong Koht nin duwen kaun emen, a kaidehn aramas. 30 Koht en samatail mehn mahs ako ketin kaiasada Sises, me kumwail kemelahr oh langahda nin tuhke pwoat. 31 Koht ketin kasapwilada memenet ni palimaune nin duwen Wiliepe Lapalap oh Sounkomour, pwe Israel en kak koluhla oh ale mahkpen diparail. 32 Oh kiht me sounkadehdepen ire pwukat oh se alehdi kadehdepen sapwellimen Koht manaman,* me Koht ketikihong irail kan me kin peikiong ih nin duwen kaun emen.”

33 Ni arail rongada met, irail ahpw lingeringerda kowahlap* oh men kemeirailla. 34 Parisi men* me ede Kamaliel ahpw uhda nan Sanedrin; ih sounpadahk en Kosonnedo men me aramas koaros kin wauneki, e ahpw ruwese me ohl ako en wisikieila liki erein ahnsou kis. 35 Ih eri ndaiong irail: “Mehn Israel kan, kumwail kanahieng dahme kumwail pahn wiahiong ohl pwukat. 36 Karasepe, ekei ahnsou samwalahr ako, Diudas pwarodo ndinda me pein ih aramas lapalap men, oh mpen ohl 400 me iangala eh pwihn. Ahpw aramas ekei kemehla ih, oh irail koaros me kin idawehn tangpeseng oh pwihno sohla mie. 37 Mwurin ohl menet, a Sudas mehn Kalili ahpw pwarodo ni ahnsoun ntingdien eden aramas oh aramas akan idawehnla ih. Ohl menet pil mehla, oh irail koaros me kin idawehn ih mwerpeseng. 38 Eri nan irair wet, I ndaiong kumwail, dehr kedirepwe ohl pwukat, ahpw piseksang irail. Pwe ma koasoandi wet de doadoahk wet tepisang rehn aramas, a e pahn sohrala; 39 ahpw ma e tepisang rehn Koht, kumwail sohte pahn kak kasohrirailla. Pwe ma kumwail kedirepwe irail, mwein kumwail pahn pelianda Koht.” 40 Irail alehda eh kaweid, re ahpw ekerodo wahnpoaron ko, wokih* irail oh ruwese irail en uhdihsang arail koasoi ni mwaren Sises oh kasaledekihirailla.

41 Irail eri pedoisang nan Sanedrin, pereperen pwehki arail ale pwais kaselel en mwamwahlla pwehki mware. 42 Oh rahn koaros nan tehnpas sarawio oh sang ihmw lel ihmw, irail kin usehlahte oh sohte uhdi padapadahk oh kalokalohki rongamwahu duwen Krais, Sises.