Sohp
5 “Menlau, likwer! Mie me pahn sapeng uhk?
Ihs rehn me sarawi kan me ke pahn sohpeilahng?
2 Pwe lingeringer pahn kemehla me pweipwei men,
Oh peirin pahn kemehla me kin mwadang kamehlele soahng koaros.
3 I kilangehr me pweipwei men eh pweida,
Ahpw ni soh kasikpe eh wasahn kousoan riahla.
4 Nah seri kan sohte pereparail,
Oh re lokolok ni ewen kelen kahnimwo,+ ni eh sohte me pahn doareirailla.
5 Me duhpek men kin kangala dahme e dolungada,
E pil kin ale mehnda ma e mi nanpwungen dihpw tekatek kan,
Oh ar kepwe kan kin kulsang.
6 Soahng kamedek kan sohte kin wosada sang nan pwelpar,
Oh kahpwal sohte kin keirda sang nanpwel.
7 Aramas kin ipwidiong nan apwal,
Duwehtehte diperen kisiniei kan ar kin pihrda.
8 Ahpw I pahn peki rehn Koht,
Oh I pahn patohwanohng Koht ei repenpwung,
9 Ong Ih me kin ketin wiewia soahng kan me laud oh soahng kan me sohte emen kak wehwehki,
Soahng kapwuriamwei kan me sohte kak wadawadedi.
10 E kin ketin kamwerehdi keteu pohn sampah
Oh ketin kadarodo pihl pohn mwaht akan.
11 E kin ketin kasapwilada me tikitik kan,
Oh doarehla me pahtoula men pwehn komourala.
12 E kin ketin kasapwungehla pilahn en me mwersuwed kan,
Pwe ar doadoahk kan en dehr pweida.
13 E kin ketin lidipihedi me loalokong kan nan ar widing kan,+
Pwe ar koasoandi kan en sapwungala.
14 Re kin tuhwongedi rotorot nin rahn,
Oh re kin dedehmseli wasa nin souwas likamwete e nipwong.
15 E kin ketin kapitala aramas sang ni kedlahs en awarail kan,
Oh kin ketin kapitala me semwehmwe kan sang nan pehn me kehlail,
16 Pwe en mie koapworopwor ong me tikitik kan,
Ahpw ewen me suwed kan kin tokedi.
17 Kilang! Meid peren aramas me Koht kin ketin panawih;
Eri dehr soikala kaweid en me Keieu Manamano!
18 Pwe e kin ketin kahrehda medek, ahpw e kin ketin kidimpene ohla;
E kin ketin kauwehla, ahpw e kin ketin kamwahwihala sang nin lime kan.
19 E pahn ketin kapituhkala sang kahpwal weneu kan,
Pil me keisuhwo sohte pahn kamedekeiukala.
20 Erein lehk lapalapo e pahn ketin kapituhkala* sang mehla,
Oh sang ni manaman en kedlahs pwoat erein mahwen.
21 Koht pahn ketin doareiukasang loh kamedek me duwehte mehn wowoki ehu,+
Oh ke sohte pahn masak kamwomwala ni eh pahn leledo.
22 Ke pahn kouruhrki kamwomwala oh duhpek,
Oh ke sohte pahn masak mahn lawalo en sampah kan.
23 Pwe takai en nan mwahto sohte pahn kamedekeiukala,*
Oh mahn lawalo kan en nan mwahto pahn ahneki popohl rehmw.
24 Ke pahn ese me omw impwalo sohte keper,*
Oh sohte mehkot pahn salongala ni omw dawih omw mohs.
25 Ke pahn naineki seri tohto,
Oh kadaudokomw kan pahn tohtohla duwehte dihpw en sampah.
26 Ke pahn kehlailte ni omw kohla nan sousou,
Duwehte kapakap en krein* kan ar rikirikpene ni ahnsawi.
27 Kilang! Se ropadahr met, oh e mehlel.
Rong oh pwungki.”