Sohp
15 Elipas+ mehn Demano ahpw sapengki:
2 “Ia duwe, aramas loalokong men pahn sapengki lokaia soh audepe kan,*
De e pahn audehkihda nan kapehde kisinieng en palimese?
3 En peneuki lokaiahte sohte katepe,
Oh en koasoakoasoite sohte kamwahupe.
4 Pwe ke kin kaluwetehla lemmwin Koht,
Oh ke kin katikitikihala nsenohki Koht.
5 Pwehki omw sapwung, ke kin wia soangen koasoi wet,*
Oh ke kin pilada koasoi mwersuwed.
6 Ewomwen kin kadeik uhk, kaidehn ngehi;
Kilin ewomw kan kin kedipeiuk.+
7 Ia duwe, kowe me tepin aramas me ipwidi,
De ke ipwidi mwohn dohl kan ar miehla?
8 Ke kin rong duwen mahsen rir kan en Koht,
De kowe kelehpw me ahneki erpit?
9 Dahme ke ese me se sehse?+
Dahme ke wehwehki me se sohte wehwehki?
10 Me moangepwet oh me mah mi nanpwungat,+
Ohl ekei me mahsang douluhl semomwo.
11 Ia duwe, sapwellimen Koht kaloalamwahu kan,
De koasoi kadek kan me kohwong uhk sohte itar ong uhk?
12 Dahme kahrehda ke kin mweidohng omw pepehm kan en kaunkinuhkada,
Oh dahme kahrehda ke kangkakilkin kiht ni lingeringer?
13 Pwe mohngiongomw* kin uhwong Koht,
Oh ke kin mweidohng soangen koasoi pwukat en kohieisang nan ewomwen.
14 Dahkot aramas pwe en mwakelekel,
De mehmen me ipwidihsang lih emen pwe en pwung?+
15 Kilang! E sohte kin ketin likih sapwellime tohnleng kan,*
Oh pil nanleng sohte kin mwakelekel mwohn silangi.+
16 Eri, ia duwen eh pahn ketin likih aramas men me kasaut oh mwersuwed,+
Aramas me kin nim suwed duwehte eh kin nimpil?
17 I pahn padahkihong uhk; rong ie!
I pahn koasoia dahme I kilangehr,
18 Dahme aramas loalokong kan koasoia oh sohte ekihla,
Iei soahng kan me re alehsang arail pahpa ko.+
19 Sahpwo kohwong irail kelehpw,
Oh sohte mehn liki me keidla nanpwungarail.
20 Aramas suwed men kin lokolok erein rahn akan koaros me e momourki,
Erein sounpar kan koaros me katohrohrla ong kaun lemei men.
21 Ngihl kamasepwehk kan mi ni salenge kan;+
Ni ahnsoun popohl, aramas loallap kan kin peiong ih.
22 E sohte kamehlele me e pahn pitsang rotorot;+
Oh e katohrohrla pwehn mehkihla kedlahs pwoat.
23 E kin kohkohseli raparapahki mwenge*—a ia mwengehn?
E uhdahn ese me rahnen rotorot kerendohr.
24 Apwal oh pwunod kin kamasak ih;
Mepwukat powehdi ih rasehng nanmwarki men me onopadahngehr en mahwen.
25 Pwe e kin ngapadahng Koht
Oh kin song en uhwong* me Keieu Manamano;
26 E kin keptakaila oh tangahkilahng Ih,
Nah mehn sansar mosul kehlailo;
27 E mas mworourou,*
Oh kapehdeo welek;
28 E kin mi nan kahnimw kan me pahn kamwomwmwomwla,
Nan ihmw kan me sohte emen pahn kousoan loale,
Me pahn wiahla koasoakoasoak en takai kan.
29 E sohte pahn kepwehpwehla, oh sohte eh pai me pahn kohpene,
De pil soahng kan me e ahneki sohte pahn kohpeseng nan sahpwo.
30 E sohte pahn pitsang rotorot;
Kisiniei pahn kamangada eh kisin raho,*
Oh e pahn mehkihla angin doauesen Koht.+
31 E sohte pahn salongala oh likihala soahng soh katepe,
Pwe dahme e wiliankihda pahn sohte katepe;
32 Met pahn wiawi mwohn eh rahn,
Oh eh kisin rah kan sohte pahn keirda mwahu.+
33 E pahn duwehte tuhkehn kreip pwoat me kin itikasang eh kreip pwul kan,
Oh duwehte tuhkehn olip pwoat me kin kesehsang eh rohs kan.
34 Pwe pwihnen aramas kan me kin pohnsehse Koht* sohte kin mie kadaudokarail,+
Oh kisiniei pahn isikala impwal en irail me kin ale kisakis ni ahl sapwung.
35 Re kin liseiankihda kahpwal oh naitikihada me suwed,
Oh kapehdirail kan kin kapwarehda likamw.”