Opadaia
1 Kaudiahl en Opadaia:*
Iet me Kaun Wasa Lapalahpie Siohwa ketin mahsaniheki duwen Edom:+
“Kitail rongehr rohng ehu sang Siohwa,
Wiliepe men pekederla nan wehi kan:
‘Uhda, kitail onopadahng mahweniong Edom.’”+
2 “Kilang! I wiahkinuhkala me soh wede men nan wehi kan;
Ke uhdahn mwamwahlla.+
3 Aklapalap* en mohngiongomw pitihiukedier,+
Kowe me kin kousoan nan wasahn ruk en paipalap,
Me kin koukousoan wasa ile, oh ndinda nan mohngiongomw,
‘Ihs me pahn waiehdihla nin sampah?’
4 Mehnda ma ke wiahda omw wasahn kousoan en ile* duwehte ikel,
De ma ke kihdi omw pahs nanpwungen usu kan,
I pahn waiukedihsang wasao,” Siohwa me ketin mahmahsen.
Re sou pahn pirapahsangte dahme re mwahuki?
De ma sounrik kreip kan me kohdo rehmw,
Re sou pahn luhwehkihdi ekei ong meteikan ren rikada?+
6 Re rapahki Esau ni keneinei!
Re rapahki douluhl eh dipwisou kesempwal kan me ekiekla!
7 Re kasareiukala ni irepen wehio.
Iengomw kan koaros* pitihiukedier.
Aramas akan me ahneki popohl rehmw kaloweiukedier.
Irail me kin iang uhk kang pilawa pahn kihdi uhk pwoat pahmw,
Ahpw ke pahn sehse.”
8 Siohwa ketin mahsanih: “Rahno,
I sou pahn kasohrehla me loalokong kan sang Edom+
Oh me koahiek en dehdehki ire kan sang wasa nahnahn kan en Esau?
9 Deman,+ noumw sounpei kan pahn masepwehkada,+
Pwehki emenemen nan wasa nahnahn kan en Esau pahn kamakamala.+
10 Pwehki tiahk lemei me ke wiahiong riomwo Seikop,+
Namenek pahn kipeiukedi,+
Oh ke pahn sohrala kohkohlahte.+
11 Rahn me ke kesikesihnente kilikilengwei,
Rahn me mehn keiru kan salihedi nah karis en sounpei kan,+
Ahnsou me mehn liki kan pedolong ni ewen kehlo oh usuhski+ Serusalem,
Ke kin mwekid duwehte emen irail.
12 Ke sohte pahn perenkihda kilikilang dahme wiawihong riomwo ni rahnen eh paisuwed,+
Ke sohte pahn perenkihda aramas en Suda kan ni rahnen ar sohrala,+
Oh ke sohte pahn koasoi aklapalap ni rahnen ar apwal.
13 Ke sohte pahn pedolong nan en nei aramas akan ar kahnimw* ni rahnen ar apwal,+
Ke sohte pahn perenkihda kilikilang eh kahpwal ni rahnen eh apwal,
Oh ke sohte pahn kulihasang eh kepwe ni rahnen eh apwal.+
14 Ke sohte pahn kesihnen wasa me ahl akan kasangpeseng ie pwehn kemehla nah me pitila kan,+
Oh ke sohte pahn pangala nah me pitila kan ni rahnen apwal.+
15 Pwe rahnen Siohwa kerendohr, ni ahnsou me e pahn ketin mahweniong wehi koaros.+
Duwehte dahme ke wiahdao, eri e pahn pil wiawihong uhk.+
Duwehte dahme ke wiahiong meteikan, ih pil duwen me pahn wiawihong uhk.
16 Pwe duwehte omw niminim pohn ei nahna sarawio,
Ih pil duwen wehi kan koaros ar pahn kin usehlahte niminim.+
Re pahn nim oh kadallehla douluhl,
Oh e pahn duwehte ma re sohte mie.
17 Ahpw irail me pitila pahn mi pohn Nahna Saion,+
Oh wasao pahn sarawi;+
Oh kadaudok en Seikop kan* pahn pwurehng ahnekihla soahng kan me arail.+
18 Kadaudok en Seikop kan pahn wiahla kisiniei ehu,
Kadaudok en Sosep kan pahn wiahla mpwul ehu,
Oh kadaudok en Esau kan pahn duwehla diperen dihpw;*
Re pahn isikirailda oh kamwasikeirailla,
Oh sohte emen kadaudok en Esau pahn pitila,+
Pwe Siohwa me ketin mahmahsen.
19 Re pahn sapwenikihla Nekep oh wasa nahnahn kan en Esau,+
Oh pil Sepihla oh sapwen mehn Pilisdia kan.+
Re pahn sapwenikihla mwaht en Epraim oh mwaht en Sameria,+
Oh Pensamin pahn sapwenikihla Kilead.
20 Irail me kalipilipala kan en koasoakoasoak wet,*+
Aramas en Israel kan pahn sapwenikihla sapwen mehn Kenan kan lella Sarepad.+
Oh mehn Serusalem kan me kalipilipala, me mi nan Separad, pahn ahnekihla kahnimw kan en Nekep.+