Rongamwahu en Luk
10 Mwurin mepwukat, Kauno ketin pilada tohnpadahk teikan, meh 70, oh poaroneirailpeseng mwowe wad riemen+ nan kahnimw oh wasa koaros me e pahn ketila ie. 2 Ih eri mahsanihong irail: “Ei, rahket me laud, ahpw tohndoadoahk kan me malaulau. Ihme kahrehda, kumwail peki rehn Soumas en rahket en ketin poaronehdo tohndoadoahk kan nan sapwellime rahk.+ 3 Kumwail kohla! Kilang! I pahn kadarkumwailwei rasehng sihmpwul kei me mi nanpwungen kidien wel kan.+ 4 Dehr wahda edin mwohni de edin mwenge de suht,+ oh pil dehr rahnmwahwih emen* nanial. 5 Sohte lipilipil wasa me kumwail pedolong nan ihmw ehu, kumwail pahn nda mahs: ‘Popohl ong ihmw wet.’+ 6 Oh ma aramas en popohl men mi mwo, amwail popohl pahn mihla reh. Ahpw ma sohte, e pahn pwurodohng kumwail. 7 Eri kumwail mihmi nan ihmwo,+ tungutungoale oh niminim mehkan me re kaunopada,+ pwe tohndoadoahk men kin warohng ale pweine.+ Kumwail dehr kin keseusang ehu ihmw keseulahng ehu ihmw.
8 “Eri, sohte lipilipil wasa me kumwail pedolong nan kahnimw ehu oh re kasamwo kumwail, kumwail tungoale dahme re kihdi mwohmwail 9 oh kamwahwihala me soumwahu kan me mi mwo oh ndaiong irail: ‘Wehin Koht kerendohngkumwailehr.’+ 10 Ahpw sohte lipilipil wasa me kumwail pedolong nan kahnimw ehu oh re sohte kasamwo kumwail, kumwail kohieila ni ahllap en kahnimwo oh nda: 11 ‘Se sipedowohng kumwail pwelpar en amwail kahnimw me pasehngehr ni neht kat.+ Ahpw, kumwail en ese met, Wehin Koht kerendohr.’ 12 I ndaiong kumwail me ni rahno,* kalokolok ong Sodom pahn marahra sang kalokolok ong kahnimwo.+
13 “Meid suwediong uhk, Korasin! Meid suwediong uhk, Pedsaida! pwe ma manaman kan me wiawihong kumwa wiawihong Dair oh Saidon, ira pahn koluhlahte mahsie ni ara pwuhriong nan likoun nsensuwed* oh mwohndi nan pehs.+ 14 Eri, kalokolok ong Dair oh Saidon pahn marahra sang kalokolok ong kumwa ni Rahnen Kadeik. 15 A kowe, Kapernaum, ke pahn sepwilida nanleng? Soh! Ke pahn sepwilidi nan Sousou!*
16 “Mehmen me kin rong kumwail kin rong ie.+ Oh mehmen me kin mwamwahlikin kumwail pil kin mwamwahlikin ie. Oh mehmen me kin mwamwahlikin ie pil kin mwamwahliki Ih me ketin poaroneiehdo.”+
17 Eri, meh 70 ko pwurodo ni peren, re ahpw patohwanohng: “Maing Kaun, ngehn suwed kan pil kin peikiong kiht ni at kin doadoahngki mwaromwi.”+ 18 Ih eri mahsanihong irail: “I kilang Sehdan eh pwupwudier sang nanleng+ duwehte lioal. 19 Kilang! I kihong kumwail manaman en tiakedi serpent kan, skorpion kan oh powehdi ahn imwintihtio manaman koaros,+ oh sohte mehkot pahn kauweikumwailla. 20 Ahpw, kumwail dehr perenkihda ngehn akan ar kin peikiong kumwail, ahpw kumwail perenkihda adamwail kan eh ntingdier nanleng.”+ 21 Ni ahnsowohte e ketin direkihla peren oh ngehn sarawi,* ih eri patohwan: “Maing Semei, Kaunen nanleng oh sampah, I kapinga komwi mwohn aramas koaros, pwehki omwi ketin ekihla mwahu mepwukat sang aramas koahiek oh loalokong kan+ ahpw ketin kasalehiong kisin seri kan. Ei Maing Semei, pwehki iei met me komw ketin kupwurki.+ 22 Mehkoaros kohiengieier sang rehn Semei, oh sohte me ese ihs Sapwellimeo pwe Sahmohte, oh sohte me ese ihs Sahmo pwe Sapwellimeo+ oh mehmen me Sapwellimeo kupwurki en kasalehiong.”+
23 Ih eri ketin sohpeiong tohnpadahk ko oh mahsanihong irail ni arail kelehpwla: “Meid peren irail me kilang mehkan me kumwail kilikilang.+ 24 Pwe I ndaiong kumwail, soukohp oh nanmwarki tohto kin inengieng kilang soahng kan me kumwail kin kilikilang ahpw re sohte kilang,+ oh kin inengieng rong soahng kan me kumwail kin rongorong ahpw re sohte rong.”
25 A kilang! ohl emen me samanih Kosonnedo ahpw uhda pwe en kasonge ih oh patohwan: “Maing Sounpadahk, dahme I anahne wia pwe I en sohsohki mour soutuk?”+ 26 E ahpw mahsanihong: “Dahme ntingdi nan Kosonnedo? Ia duwen omw kin wadek?” 27 E sapeng patohwan: “‘Ke anahne poakohng Siohwa* omw Koht ni omw mohngiong unsek oh omw mour* unsek oh omw kehl unsek oh omw lamalam unsek’+ oh ‘mehn mpomw duwehte omw kin poakohng pein uhk.’”+ 28 E ahpw mahsanihong: “Ke sapeng ni pwung; pousehlahte wia met oh ke ahpw pahn ale mour.”+
29 Ahpw ni ohlo eh men kadehdehda me ih me pwung,+ e patohwanohng Sises: “A ihs me uhdahn mehn mpei?” 30 Sises ketin sapeng mahsanih: “Ohl emen kohdihdo sang Serusalem kohdilahng Seriko oh lohdiong loallap suwed kan, me kulihasang eh likou, keme ih oh kohkohlahsang ni eh kereniong mehla. 31 Samworo men ahpw keididihla nanialohte, oh ni eh kilangada ih, e ahpw douluhllahsang keidla pali teio. 32 Pil duwehte, mehn Lipai men, ni eh keidido wasao oh kilangada ih, e ahpw douluhllahsang keidla pali teio. 33 Ahpw mehn Sameria men+ me seiseiloak nanialo ahpw kasaingedi, oh ni eh kilangada ih, e uhdahn poakehla. 34 Ih eri keiong mpe oh wudekihdiong leh oh wain pohn eh ohla ko oh kidimpene. E ahpw kidahng ih pohn nah mahno oh walahng wasahn pweidi ehu oh apwahpwalih ih. 35 Mandahn rahno, e kihong kaunen wasahn pweidio denari* riau oh nda: ‘Apwalih mahs ih, oh mehkot me ke doadoahngki likin met, I pahn kapwungohng uhk ni ei pwurodo.’ 36 Ihs me ke lemehiong rehn me silimen pwukat me wiahla mehn mpen ohl+ me lohdiong loallap suwed ko?” 37 E patohwan: “Ohl me kasalehiong kadek kalahngan.”+ Sises eri mahsanihong: “Kohwei oh wia duwehte.”+
38 Ni arail ketiket kohla, e ahpw ketilong nan kisin kahnimw ehu. Wasao, lih emen me ede Marda+ kasamwolong ih nan imwe. 39 Pil mie rie lih emen me ede Mery, me mwohndi ni aluweluwen Kauno oh wie rongorong dahme e mahmahsanih.* 40 Ahpw Marda kedirepwkihla wia doadoahk tohto. Ih eri patohdo reh oh patohwanohng: “Maing Kaun, komw sohte ketin nsenohki riei liho eh mweidala I en kelehpw wie doadoahk? Komw mahsanihong en sewese ie.” 41 Sises ahpw ketin sapeng, mahsanihong: “Marda, Marda, ke kin pwunodki oh kedirepwki soahng tohto. 42 Ahpw soahng malaulau keite me anahn de pil ehute. A Mery, e pilada mehkot mwahu,*+ oh sohte me pahn adihasang ih.”