Rongamwahu en Sohn
2 Oh ni kesiluhwen rahn, kamadipw en kapwopwoud ehu ahpw wiawi Kena nan Kalili, oh inen Sises iang mi wasao. 2 Sises oh sapwellime tohnpadahk ko pil iang lukohng ni kamadipw en kapwopwoudo.
3 Ni eh kereniongehr nek nimarail waino, inen Siseso ahpw patohwanohng: “Solahr nimarail wain.” 4 Sises ahpw mahsanihong: “Lih, ia kahrepen met en kapwunodei ie de kowe?* Ei awa saikinte leledo.” 5 Ineo ahpw ndaiong sounpapah ko: “Kumwail wiahda soahng koaros me e mahsanihong kumwail.” 6 Eri sah takai en pihl weneu mi wasao nin duwen koasoandien kamwakel en mehn Suhs,+ oh mehn sosohng pihl* riau de siluh kak audehda ehuehu sah ko. 7 Sises eri mahsanihong irail: “Kumwail audehkihda pihl sah ko.” Irail eri audehda lel ni ewen sah ko. 8 Ih eri mahsanihong irail: “Kumwail koadiahdi ekis oh wahla rehn kaunen kamadipwo.” Irail eri wahla. 9 Ni kaunen kamadipwo eh song pihl me wialahr waino, e sohte ese wasa me e kohsang ie (ahpw sounpapah ko me koadiahdi pihlo ese), kaunen kamadipwo ahpw ekerodo ohl kamwohdo 10 oh ndaiong: “Meteikan koaros kin kihda wain mwahu mahs, oh ni ahnsou me aramas akan sakaulahr, re kin kihda me sohte nohn mwahwo. A ke nekinekidte wain mwahu lao lel ahnsou wet.” 11 Sises ketin wiahda met nan Kena nan Kalili, me iei tepin sapwellime manaman akan.* Ih duwen eh ketin kasansalehda sapwellime lingan+ oh sapwellime tohnpadahk ko ahpw pwosonla ih.
12 Mwurin met, ih oh ineo oh rie pwutak ko+ oh sapwellime tohnpadahk ko ketidihla Kapernaum,+ ahpw re sohte ketiket wasao erein rahn tohto.
13 Ni Pahsohpa+ en mehn Suhs ako eh kerendohr, Sises eri ketidahla Serusalem. 14 Nan tehnpas sarawio, e ketin diarada irail ko me netinetki kou, sihpw oh mwuroi kan+ oh me kin kawiliali mwohni ko nan dewerail. 15 Ih eri ketin wiahkihda mehn wowoki sahl ekei, e ahpw ketin kasarehieisang irail koaros iangahki sihpw oh kou ko nan tehnpas sarawio, oh e ketin wudekihdi nein sounkawilian mwohni ko sent ko oh ketin wekidedi arail tehpel ko.+ 16 Oh e mahsanihong irail ako me netinetki mwuroi: “Kumwail wahsang mepwukat wasaht! Uhdihsang amwail kin wiahki tehnpesen Semei imwen netinet ehu!”+ 17 Sapwellime tohnpadahk ko ahpw tamanda me ntingdiero: “Ei ngoangki loalenohng tehnpasomwi pahn kadireiehla douluhl.”+
18 Ihme kahrehda mehn Suhs ako ndaiong: “Kilel dah me ke kak kasalehiong kiht,+ pwehki omw wiewia soahng pwukat?” 19 Sises ketin sapeng mahsanihong irail: “Kumwail kauwehla tehnpas sarawi wet oh I pahn kauwada erein rahn siluh.”+ 20 Mehn Suhs ako ahpw nda: “Tehnpas sarawi wet wie kokou erein sounpar 46, a ke pahn kauwada nan erein rahn siluh?” 21 Ahpw tehnpas sarawi me e mahmahsanih kin wehwehki kahlepe.+ 22 Eri ni ahnsou me e ketin iasada sang rehn me melahr akan, sapwellime tohnpadahk ko eri tamanda me e kin mahsanih met,+ re ahpw kamehlelehla nting sarawi ko oh dahme Sises mahsaniher.
23 Ahpw, ni eh ketiket Serusalem ni ahnsoun kasarawien Pahsohpa, aramas tohto pwosonla mware ni ar kilang manaman kan me e ketin wiahda. 24 Ahpw Sises sohte ketin likihong irail pein ih, pwehki e mwahngih irail koaros 25 oh pwehki e sohte ketin anahne emen en padahkihong ih duwen aramas, pwe e mwahngih dahme mi nan mohngiong en aramas.+