Keriaun Samuel
1 Mwurin Sohl eh mehla, ni Depit eh pwurodo sang eh kalowehdi* mehn Amalek ko, Depit mihmi Siklak+ erein rahn riau. 2 Ni rahn kesiluhwo, ohl emen leledo sang nan kahnimpwal en Sohl, me eh likou teipeseng oh pwehl mi pohn moange. Ni eh kohla rehn Depit, e ahpw pwupwudiong nanpwelo oh poaridi.
3 Depit ahpw idek reh: “Ke kohsang ia?” E sapengki: “I tangasang nan kahnimpwal en Israel.” 4 Depit eri idek reh: “Dahme wiawi? Menlau ndahdo.” E ahpw sapengki: “Aramas ako tangasangehr mahweno oh me tohto pwupwudi oh mehla. Sohl oh nah pwutak Sonadan pil iang mehla.”+ 5 Depit eri idek rehn mwahnakapw me wadohng ih rohngo: “Ia duwen omw ese me Sohl oh nah pwutak Sonadan melahr?” 6 Mwahnakapwo sapengki: “I sasairki ei lelehr Nahna Kilpoa,+ a iet Sohl wie utuhtungki pein ih nah ketieuwo, oh kuruma ko oh soundak oahs ko kerendohr reh.+ 7 Ni eh sohpeido oh kilangiehda, e eker ie, I ahpw sapengki, ‘Iet ngehi, maing!’ 8 E idek rehi, ‘Ihs kowe?’ I sapengki, ‘Ngehi mehn Amalek men.’+ 9 E ahpw nda, ‘Keido mahs oh kemeiehla, pwe I mi nan weirek laud, ahpw momourte.’ 10 Ngehi eri keila mpe oh kemehla ih,+ pwe I ese me e sohte kak pitila mwurin e ohlahr oh pwupwudier. Ngehi eri ale nihn* me mi pohn moangeo oh luwou me mi ni peho, I ahpw wahdo rehn ei kaun.”
11 Depit eri kidahng peh ko ni eh likou ko oh tehrpeseng, oh ohl ako koaros reh pil iang wia met. 12 Re ahpw mwahiei oh sengiseng oh kaisihsol+ lao lel nin soutik ong Sohl, ong nah pwutak Sonadan, ong sapwellimen Siohwa aramas akan, oh ong wehin Israel,+ pwehki ar mehkihla kedlahs.
13 Depit ahpw idek rehn mwahnakapw me wadohng ih rohngo: “Mehnia men kowe?” E nda: “Ngehi nein mehn Amalek men, mehn liki men.” 14 Depit eri ndaiong ih: “Dahme kahrehda ke sohte masak en kauwada pehmwen pwehn kemehla sapwellimen Siohwa me keidio?”+ 15 Depit eri ekerodo emen mwahnakapw ko oh ndaiong: “Keido oh kemehla ih.” Manakapwo eri kemehla ih.+ 16 Depit ndaiong ih: “Kowe me pein pwukoahki omw mehla,* pwehki pein ewomwen me kedipaiukada ni omw nda, ‘Pein ngehi me kemehla sapwellimen Siohwa keidio.’”+
17 Depit eri koulki koulen kedepwidepw pwoatet* en Sohl oh nah pwutako Sonadan+ 18 oh nda me aramas en Suda kan en esehla koulen kedepwidepw me adaneki “Kesik Ketieu,” me ntingdier nan pwuhken Sasar:+
19 “Omw lingan Israel, kamakamalahr oh wonohn pohn omw wasa ile kan.+
Ia uwen laud pwupwudi en me kehlail kan!
20 Dehr lohkiseli nan Kahd;+
Dehr pakairki nanial en Askelon,
Pwe nein mehn Pilisdia kan serepein kan de perenkihda,
Pwe nein me sohte sirkumsaisla kan serepein kan de ngisingiski ar peren.
21 Kumwail nahna kan en Kilpoa,+
Pwoaiken pahnlahng de keteu en dehr mwerediong pohmwail,
Mwaht akan en pil dehr kapwarehda kisakis sarawi kan,+
Pwehki mehn sansar en me kehlail kan saminlahr,
Mehn sansar en Sohl solahr keikihdi leh.
22 Sang ntahn me kamakamalahr kan, oh sang kirihs en me kehlail kan,
Nein Sonadan kesik ketieu sohte pwurasang,+
Oh nein Sohl kedlahs sohte pahn pwurodo ni eh sohte kana.+
24 Kumwail serepein en Israel, kumwail mwahieiki Sohl,
Me kalikawihekin kumwail likou weitahta oh kaselel,
Me kihdiong mehn kapwat kohl pohn amwail likou kan.
25 Ia uwen laud pwupwudi en me kehlail kan nan mahwen!
Sonadan kamakamalahr oh wonohn pohn omw wasa ile kan!+
26 I pahtoukinuhkalahr, riei Sonadan;
Ke uhdahn kesempwal ong ie.+
Omw limpoak ong ie kaselel sang limpoak en lih.+
27 Ia uwen laud pwupwudi en me kehlail kan
Oh tehtehn mahwen kan ar sohralahr!”