Rongamwahu en Madiu
7 “Uhdihsang amwail kin kadeik meteikan+ pwe kumwail en dehr pakadeikda; 2 pwe kadeik me kumwail kin kadeingki meteikan, kumwail pahn pil pakadeingkihda,+ oh mehn sosohngohte me kumwail kin sohngki meteikan, irail pahn pil sohngkin kumwail.+ 3 Eri dahme ke kin kilangki diper me mi nan pwoaren mesen riomwo,* ke ahpw sohte kin tehk lepin tuhke me mi nan pwoaren mesomwen?+ 4 De ia duwen omw kak ndaiong riomwo, ‘Mweidohng ie I en kihsang diperen nan pwoaren mesomwen,’ a kilang! lepin tuhke pwoat mi nan pwoaren mesomwen? 5 Mwalaun ahmwen! Kihsang mahs lepin tuhkehn nan pwoaren mesomwen, ke ahpw pahn kilang mwahu duwen omw pahn kak kihsang diperen nan pwoaren mesen riomwo.
6 “Kumwail dehr kihong kidi kan mehkot sarawi de pil kesehdiong mwohn pwihk noumwail perl kan,+ pwe re de tiakpeseng oh sohpeiong kumwail oh tehrkumwailpeseng.
7 “Kumwail pousehlahte peki, kumwail ahpw pahn ale;+ kumwail pousehlahte rapahki, kumwail ahpw pahn diar; kumwail pousehlahte letelet, e ahpw pahn ritidahng kumwail;+ 8 pwe koaros me kin pekipeki pahn ale,+ oh koaros me kin raparapahki pahn diar, oh koaros me kin letelet, e pahn ritidahng irail. 9 Ni mehlel, ihs rehmwail me ma nah pwutak peki pilawa, a e pahn kihong ih takai? 10 De ma e peki mwahmw, e pahn kihong ih serpent? 11 Kahrehda, mehnda ma kumwail suwed ahpw kumwail kin ese kihong noumwail seri kan kisakis mwahu kan, Samamwail me ketiket nanleng uhdahn pahn ketikihong irail kan me kin peki reh+ soahng mwahu kan!+
12 “Ihme kahrehda, soahng koaros me kumwail men aramas en wiahiong kumwail, kumwail pil anahne wiahiong irail.+ Ni mehlel, met iei wehwehn Kosonnedo oh padahk en Soukohp ako.+
13 “Kumwail keid nan ewen kehl wetikitik,+ pwehki ewen kehl tehlap oh ahl tehlap kin kolahng kasohrala, oh me tohto kin keid ie; 14 ahpw ewen kehl wetikitik oh ahl tehtik kin kolahng mour, oh me malaulau kin diar.+
15 “Kumwail mwasahn soukohp likamw akan+ me kin kohdo rehmwail ni mwomwen sihpw,+ ahpw loalarail, irail kidien wel kei me uhdahn duhpek.+ 16 Kumwail pahn esehkin irail wahrail. Ia duwe, aramas kin dolung kreip sang dihpw tekatek de pik sang tuhke tekatek?+ 17 Pil duwehte, tuhke mwahu koaros kin wa mwahu, ahpw tuhke sakanakan koaros kin wa suwed.+ 18 Tuhke mwahu sohte kak wa suwed, oh pil tuhke sakanakan sohte kak wa mwahu.+ 19 Tuhke koaros me sohte kin wa mwahu kin paldi oh lekdekiong nan kisiniei.+ 20 Eri ni mehlel, kumwail pahn esehki aramas pwukat sang wahrail kan.+
21 “Kaidehn aramas koaros me kin ndaiong ie, ‘Maing Kaun, Maing Kaun,’ pahn pedolong nan Wehin nanleng, ahpw ihte me kin wia kupwuren Semei me kin ketiket nanleng.+ 22 Me tohto pahn ndaiong ie ni rahno: ‘Maing Kaun, Maing Kaun,+ se sou kohpadahr ni mwaromwi, oh kausasang ngehn suwed kan ni mwaromwi, oh wiahda manaman tohto ni mwaromwi?’+ 23 I ahpw pahn ndaiong irail: ‘I sohte mwahn esei kumwail! Kumwail kohkohweisang ie, kumwail me kin wia me suwed!’+
24 “Eri, koaros me kin rong ei mahsen oh kapwaiada pahn rasehng ohl loalokong men me kauwada imwe pohn paip.+ 25 Keteu eri mweredi oh lapakehda oh kisinieng kehlail ipidohng ihmwo, ahpw e sohte ohla, pwe e kokouda pohn paip. 26 Oh pil koaros me kin rong ei mahsen ahpw sohte kapwaiada pahn rasehng ohl pweipwei men me kauwada imwe pohn pihk.+ 27 Keteu eri mweredi oh lapakehda oh kisinieng kehlail ipidohng ihmwo,+ e ahpw pwupwudi oh ohla douluhl.”
28 Ni Sises eh ketin kaimwisekala mahsen pwukat, pokono ahpw pwuriamweikihla mwomwen eh kin ketikihwei sapwellime padahk,+ 29 pwe e kin ketin padahkih irail nin duwen aramas emen me ahneki manaman,+ a kaidehn duwehte arail sounkawehwehn Kosonnedo kan.