Keieun Kronikel
22 Depit eri nda: “Iei met tehnpesen Siohwa Koht mehlelo oh ih pei sarawi wet me Israel pahn kin wia meirong isihs kan powe.”+
2 Depit eri ruwese ren kapokonepene mehn liki kan+ me kin kousoan nan sapwen Israel, oh e koasoanediong irail ren wia soun-par takai, pwe ren kin pwalang oh parada takai kan ong kokoudahn tehnpesen Koht mehlelo.+ 3 Depit pil kaunopada mete tohtohie, mehn wiahda nihl ong wenihmwen ewen kehl kan oh mehn kateng kan, oh prons tohtohie me sohte me kak teneki,+ 4 oh pil tuhke sidar kan+ me sohte kak wadawadedi, pwe mehn Saidon kan+ oh mehn Dair kan+ wadohng Depit tuhke sidar tohtohie. 5 Depit eri nda: “Nei pwutak Solomon me pwulopwul oh soakoahiek,*+ oh tehnpas me pahn kokouda ong Siohwa uhdahn pahn lingan,+ pwe aramas akan nan sahpw koaros pahn esehki+ ndandpe oh linganpe.+ Kahrehda, I pahn kaunopada ong ih.” Depit eri kaunopada dipwisou tohtohie mwohn eh mehla.
6 Oh e pil ekerodo nah pwutak Solomon oh padahkihong en kauwada tehnpas ehu ong Siohwa, Koht en Israel. 7 Depit eri ndaiong nah pwutak Solomon: “I kin inengieng nan ei mohngiong en kauwada tehnpas ehu ong mwaren Siohwa ei Koht.+ 8 Ahpw Siohwa ketin mahsanihong ie, ‘Ke kakeredier nta laud, oh ke wiahier mahwen tohto. Ke sohte pahn kauwada tehnpas ehu ong mwarei,+ pwe ke kakeredier nta laud nin sampah mwohn silangi. 9 Kilang! Ke pahn nainekihda pwutak emen+ me pahn wia ohlen popohl,* oh I pahn kihong ih kommoal sang eh imwintihti kan koaros me kapilpene ih.+ E pahn adaneki Solomon*+ oh I pahn kihong Israel popohl oh meleilei erein eh mwehi.+ 10 Ih me pahn kauwada tehnpas ehu ong mwareiet.+ E pahn wiahla nei pwutak, oh I pahn wiahla seme.+ I pahn kauwada teng mwoale nin duwen nanmwarki en Israel kohkohlahte.’+
11 “Eri, samwa, Siohwa en ketin ieiang uhk, oh ke en pweida oh kauwada tehnpesen Siohwa omw Koht, duwehte me e ketin mahsanihki me pid kowe.+ 12 Siohwa en ketikihong uhk loalokong oh koahiek en wehwehki+ ni eh ketikihong uhk manaman en kaunda Israel, pwe ken kapwaiada kosonned en Siohwa omw Koht.+ 13 Ke ahpw pahn pweida ma ke kapwaiada ni keneinei koasoandi kan+ oh kopwung kan me Siohwa ketin kehkehlingkihong Moses en kihong Israel.+ Kommwad oh kehlail. Ke dehr perki de masak mehkot.+ 14 I uhdahn nantihong kaunopadahng tehnpesen Siohwa kohl dalend* 100,000 oh silper dalend 1,000,000 oh uwen prons oh mete me inenen tohto+ me sohte kak tenekda, oh I kaunopada tuhke kan oh takai kan,+ ahpw ke nek kapatahiong mepwukat. 15 Tohndoadoahk tohtohie mi rehmw—soun-par takai, sounwia takai,+ deiksang oh soangsoangen tohndoadoahk koahiek kan koaros.+ 16 Mie kohl, silper, prons oh mete tohtohie me sohte kak tenekda.+ Eri uhda oh tepida doadoahk, oh Siohwa en ketin ieiang uhk.”+
17 Depit eri ruwese lapalap en Israel kan koaros ren sewese nah pwutako Solomon: 18 “Siohwa amwail Koht sou ketiket rehmwail oh e sou ketikihongkumwailehr popohl* wasa koaros? Pwe e ketikihong ie tohn sahpwet, oh sahpwet lohdier mwohn silangin Siohwa oh sapwellime aramas akan. 19 Eri kumwail koasoanehdi teng nan mohngiongimwail oh mour* unsek pwehn rapahki Siohwa amwail Koht,+ oh tepida kauwada tehnpas sarawi en Siohwa, Koht mehlelo,+ pwe kumwail en wahdo kohpwahn inou lap en Siohwa oh dipwisou sarawi kan en Koht mehlelo+ nan tehnpaso me kokouda ong mwaren Siohwa.”+