Sohp

 3 Pak eisek kumwail lipwoare* ie;

Kumwail sohte namenengki amwail kin lemei ong ie.+

 4 Oh ma mehlel I wiahda sapwung,

Eri ei sapwung mihmihte rehi.

 5 Ma kumwail kin ngihtehtehki en kilengdiong ie,

Oh kosekose me I warohng namenengkihla ei kahpwal kan,

 6 Eri, kumwail en ese me iei Koht me ketin keteweiehdi,

Oh e ketin koliehdi nan sapwellime uhko.

 7 Kilang! I kin weriwerki, ‘Tiahk lemei!’ ahpw sohte me sapeng;+

I kin likilikwer peki sawas, ahpw sohte pwung pahrek.+

 8 E ketin perehkilahr ei ahlo kehl takai kan, oh I sohte kak kotehla;

E ketin kipehkidier elei kan rotorot.+

 9 E ketin kapwuhrasangehr ei lingan

Oh ketikihsangehr nihno pohn moangeie.

10 E kin ketin kauweiehla ni pali koaros lao I sohrala;

E kin ketin usadahsang ei koapworopwor rasehng tuhke pwoat.

11 E kin ketin engieng kowahlap pahi,

Oh e kin ketin wiahkin ie sapwellime imwintihti.+

12 Sapwellime pwihnen sounpei kan kohpene oh kapiliepene,

Oh re kauwada imwarail impwal kan kapil ei impwalo.

13 E ketin kasarehla riei kan dohsang ie,

Oh irail kan me kin ese ie sohpeisangieier.+

14 Kompoakepahi keren kan* keseielahr,

Oh irail kan me I kin uhdahn ese manokeielahr.+

15 Irail kan me lukodohng nan imwei+ oh nei lidu serepein kan kin wiahkin ie mehn keiru men;

Ong ni masarail kan, ngehi mehn liki men.

16 I kin likwerih nei laduwo, ahpw e sohte kin sapeng;

Eweiet kin pekipeki reh en poakeiehla.

17 Ei pwoudo sautkihla angin eweiet,+

Oh I pwohsuwedla ong riei kan.*

18 Pil kisin seri kan kin mwamwahlikin ie;

Ni ei kin uhda, re kin tepida kapailoke ie.

19 Kompoakepahi keren kan koaros kin sautkin ie,+

Oh irail kan me I kin poakohng pelianiedahr.+

20 Tih kat pasehngehr kiliet oh udukeiet,+

Oh kereniong I en sohte pitsang mehla.

21 Kompoakepahi kan, kumwail kasalehiong ie kadek kalahngan, kasalehiong ie kadek kalahngan,

Pwe nin limen Koht pohriedier.+

22 Dahme kumwail kalokalokehkin ie duwehte me Koht ketin wiewia,+

Oh sohte uhdihsang uhwong ie?*+

23 Ma ei lokaia kan ntingdihte,

Ma lokaia pwukat kak ntingdihte nan ehu pwuhken!

24 I mentehno lokaia pwukat en perperkihda mehn nting mete oh leht pwoat

Pohn takai kohkohlahte!

25 Pwe I uhdahn ese me sounkomourpei*+ ketin ieias;

E pahn ketido mwuhr oh ketidahla pohnangin sampah.*

26 Mwurin kiliet eh ohla ni mwohmw wet,

Erein ei momour, I pahn kilang Koht,

27 Pein ngehi pahn kilang ih,

Mesei kat pahn kilang ih, a kaidehn mesen emen tohrohr.+

29 Kumwail en masak kedlahso,+

Pwe kedlahso kin wahdo kalokepen sapwung kan;

Kumwail anahne ese me mie sounkopwung men.”+