Sohp
6 Sohp eri sapengki:
2 “Ma ei pwunod+ kak uhdahn tenekda
Oh kohdahte pohn mehn tenek iangahki ei kahpwal!
3 Pwe met e toutousangehr pihk en nansed.
Ihme kahrehda ei lokaia kan lokaia mwahl kei.+
4 Pwe arep kan en me Keieu Manamano doakoaiehdier,
Oh I niminim ar pwoisin;+
Soahng kamasepwehk kan sang rehn Koht ireklahr pwehn uhwong ie.
5 Ia duwe, dongki lawalo men+ pahn weriwer ni eh mie kene dihpw,
De kouwol men pahn ingihng ni eh mie kene tahpw?
6 Ia duwe, ke kak tungoale mwenge nampil me sohte soahl,
De mie nemen meteitei en melou* pwoat?
7 I kahng sair soahng pwukat.
Re duwehte mwenge me ohla.
8 Ei pekipek en pweida
Oh Koht en ketin kapwaiada ei ineng!
9 Koht en ketin kupwurki kamwuteiepene,
Oh en ketin kapahla lime oh kasohreiehla!+
10 Pwe pil met pahn wadohng ie nsenamwahu;
I pahn lusuluski peren mendahki medek me sohte kin uhdi,
Pwe I sohte soikala mahsen kan en Koht Sarawi.+
11 Ia duwe, mie ei kehl pwe I en awiawihte?+
Oh imwila dah me awiawih ie, pwe I en momourte?*
12 Ei kehl duwehte takai?
De udukei wiawihkihda prons?
13 Mie mehkot me I kak sewesehki pein ngehi
Ni sawasepei koaros ar sohrasang ie?
14 Mehmen me koledihsang eh limpoak loalopwoat ong ienge men+
Sohla pahn lemmwiki me Keieu Manamano.+
15 Kompoakepahi* kan kin widing+ duwehte piletik en ahnsoun kopou,
Duwehte piletik kan en ahnsoun kopou me kin madada.
16 Piletik kan rotorotkihla aihs,
Oh sinoh me peipeseng ekiekla nan piletik kan.
17 Ahpw ni ahnsoun karakar e kin sohla pihl nan piletik oh sohrala;
Ni eh kin karakarada, piletik kan kin madada.
18 Alarail kan kin wetseli;
Re kin pwiliwei nan sapwtehn oh sohrala.
20 Re namenekla pwehki ar koapworopwor eh sapwungala;
Re kodohngete wasao pwe ren nsensuwedla.
21 Pwe ih mwomwen kumwail ong ie met;+
Kumwail kilangehr kamasepwehk en ei lokolok, oh kumwail masepwehkada.+
22 Dah, mie pak I nda, ‘Kidohng ie mehkot,’
De peki kumwail en wiahda kisakis ehu ong ie sang amwail kepwe kan?
23 Mie pak I peki I en poadoandoarla sang nan pehn imwintihti men
De pitila* sang sounkalokolok kan?
24 Kumwail padahkih ie, oh I pahn nennenla;+
Kumwail sewese ie pwe I en wehwehki ei sapwung.
25 Lokaia mehlel sohte kamedek!+
Ahpw kamwahu dah me kak dierek nan amwail peneu?+
26 Ia duwe, kumwail kin koasoakoasoane en panawih ei lokaia kan,
En ohl tihwohla men koasoi kan,+ me kisinieng kin ipirala?
28 Eri kumwail sohpeido oh kilang ie,
Pwe I sohte pahn lokaia likamw ong ni masamwail kan.
29 Menlau, kumwail pwurehng medewe—kumwail dehr kadeik ie ni sapwung—
Ei, kumwail pwurehng medewe, pwe ei pwung mihmihte rehi.
30 Ia duwe, loweiet kin koasoakoasoia mehkot me sohte pwung oh pahrek?
Pahn ngatangatei sohte kin ese me mie mehkot sapwung?