Sohp
1 Mie ohl emen nan sapwen Us me adaneki Sohp.*+ Ih ohl pwung oh loalopwoat men;*+ e kin lemmwiki Koht oh soikala dahme suwed.+ 2 Pwutak isimen oh serepein silimen ipwidiong ih. 3 Uwen tohtohn nah pelinmen kan iei sihpw 7,000, kamel 3,000, kou 1,000* oh dongki* 500, iangahki ladu tohtohie, kahrehda e wiahla aramas me keieu lapalap rehn aramas koaros ni Palimese.
4 Emenemen nah pwutak ko kin wiahda kamadipw ehu ni pein imwe ni rahn me e koasoanehdi.* Re kin luke riarail serepein silimen ko ren iang irail mwenge oh nim. 5 Mwurin ehuehu irekidien kamadipw eh kin imwisekla, Sohp kin ilekla ren kohdo pwe en kasarawihirailla. Eri e kin sangkenei pirida oh wiahda meirong isihs kan+ ong emenemen irail. Pwe Sohp kin nda: “Mwein nei seri ko dipada oh lahlahwe Koht nan ar mohngiong.” Ih met me Sohp kin wia ahnsou koaros.+
6 Eri rahno ahpw leledo me sapwellimen Koht mehlelo ohl akan*+ kohlongodo pwe ren uh mwohn silangin Siohwa,+ oh Sehdan+ pil iang kohlongodo nanpwungarail.+
7 Siohwa eri ketin mahsanihong Sehdan: “Ke kohsang ia?” Sehdan ahpw sapeng Siohwa, patohwan: “I kakahnseli nin sampah oh kohkohseli wasa kan.”+ 8 Siohwa eri ketin mahsanihong Sehdan: “Ke kasawiher Sohp, ei laduwo? Sohte emen nin sampah me duwehte ih. Ih ohl pwung oh loalopwoat men,*+ e kin lemmwiki Koht oh soikala dahme suwed.” 9 Sehdan ahpw sapeng Siohwa, patohwan: “Ia duwe, ma Sohp sohte ale mehkot, e pahn lemmwikihte Koht?+ 10 Komw sou ketikidahr mehn perehpe pwehn pere ih+ oh eh peneinei oh mehkoaros me e ahneki? Komw ketin kapaiadahr eh doadoahk kan koaros,+ oh nah pelinmen kan uhdahn tohtohla nan sahpwo. 11 Eri, komw ketin kapahwei limomwi oh kauwehla mehkoaros me e ahneki. E ahpw uhdahn pahn lahlahwei komwi mwohn silangomwi.” 12 Siohwa eri ketin mahsanihong Sehdan: “Kilang! Mehkoaros me e ahneki mi nan pehmw.* Ihte ke dehpa sair ohlo!” Sehdan eri kohkohieila sang mwohn silangin Siohwa.+
13 Eri ni rahn me nah pwutak ko oh serepein ko wie mwengemwenge oh niminim wain nan imwen riarail pwutak me keieu laudo,+ 14 meninkeder men ahpw kohdo rehn Sohp oh nda: “Kou ko wie deideipwel oh dongki ko wie mwengemwenge limwahrail 15 a ni ahnsowo mehn Sapea kan ahpw peiong kiht oh wahsang mahn ako, oh re kemehkihla ladu ko kedlahs. Ngehite me pitila, kahrehda I kodohng kairehkin komwi.”
16 Nindoken eh wie lokolokaia, a emen ahpw pil kohdo oh nda: “Kisiniei sang Koht* kohdihdo sang nanleng oh lulda nanpwungen sihpw ko oh ladu ko oh isikirailla! Ngehite me pitila, kahrehda I kodohng kairehkin komwi.”
17 Nindoken eh wie lokolokaia, a emen ahpw pil kohdo oh nda: “Mehn Kaldia kan+ wiahda pwihn siluh oh poarehng kamel ko oh wairailsang, oh re kemehkihla ladu ko kedlahs. Ngehite me pitila, kahrehda I kodohng kairehkin komwi.”
18 Nindoken eh wie lokolokaia, a pil emen tohrohr ahpw kohdo oh nda: “Noumw pwutak ko oh serepein ko wie mwengemwenge oh niminim wain nan imwen riarail pwutak me keieu laudo. 19 A kisinieng kehlail ehu pa ipido sang nan sapwtehn, oh e kauwehla keimw pahieu en ihmwo, ihmwo eri pwupwudiong pohn noumw seri ko oh irail mehla. Ngehite me pitila, kahrehda I kodohng kairehkin komwi.”
20 Sohp eri kesihnenda oh tehrpeseng eh likowo oh sehkasang pitenmoange kan; ih eri pwupwudiong nanpwelo oh poaridi 21 oh nda:
“I kilisou kohdo sang nan kapehden inei,
Oh I pahn kilisou pwurala.+
Siohwa me ketikidahr,+ oh Siohwa me ketikihsangehr.
Kaping en kin usehlahte kohwong mwaren Siohwa.”
22 Ni mehkoaros me wiawiher, Sohp sohte dipada de karaunehki Koht mehkot sapwung.*