Rongamwahu en Madiu
5 Ni eh mahsanihada pokono, e ahpw ketidahla pohn nahna ehu; oh mwurin eh ketidi, sapwellime tohnpadahk ko ahpw keiong mpe. 2 Ih eri ketin tepida padahkih irail, mahsanih:
3 “Meid peren irail me kin pohnese me irail anahne kaweid en Koht,+ pwe arail wehi iei Wehin nanleng.
4 “Meid peren irail me kin mwahiei, pwe re pahn nsenamwahula.+
5 “Meid peren irail me mpahi,*+ pwe re pahn sohsohki sampah.+
6 “Meid peren irail me uhdahn inengieng*+ me pwung, pwe arail ineng pahn kaitarala.+
7 “Meid peren irail me kin kadek kalahngan,+ pwe re pahn alehdi kadek kalahngan.
8 “Meid peren irail me mohngiong mwakelekel,+ pwe re pahn kilang Koht.
9 “Meid peren irail me kin wiahda popohl,+ pwe re pahn adaneki sapwellimen Koht seri kan.*
10 “Meid peren irail me kin kalokolok pwehki ar wia dahme pwung,+ pwe arail wehi iei Wehin nanleng.
11 “Meid peren kumwail ni aramas ar kin kauwei kumwail+ oh kalokei kumwail+ oh kinehda soangen suwed koaros duwen kumwail pwehki ngehi.+ 12 Kumwail perenda oh nsenamwahula mehlel,+ pwe ketingpamwail+ me laud nanleng, pwe ih pil duwen arail kin kaloke soukohp ako mwohmwail.+
13 “Kumwail me soahlepen+ sampah, ahpw ma nemenemen soahl pahn sarasang, ia duwen nemen soahlo eh pahn pwurehng miehla? E solahr katepe, ihte en lekdekla liki+ pwe aramas akan en tiakpeseng.
14 “Kumwail me marain en sampah.+ Kahnimw ehu sohte kak rirla ni eh mi pohn nahna ehu. 15 Aramas kin isikada lamp oh kihdi pohn dewen lamp, re sohte kin kihdi pahn kopwou* oh lampo kin kamarainihada irail koaros me mi nan ihmwo.+ 16 Pil duwehte kumwail, amwail marain en sansal mwohn aramas akan+ pwe ren kilang amwail doadoahk mwahu+ oh kalinganahda Samamwail me ketiket nanleng.+
17 “Dehr medewe me I kodohng kauwehla Kosonnedo de padahk en Soukohp ako. I sohte kodohng kauwehla, ahpw I kodohng kapwaiada.+ 18 I ndaiong kumwail ni mehlel me mehnda ma lahng oh sampah pahn sohrala, sohte ehu mesen nting me keieu tikitik de ehu lain en mesen nting pahn sohrasang Kosonnedo lao soahng koaros pahn pweida.+ 19 Eri, mehmen me kauwehla ehu kisin kehkehlik pwukat oh padahkihong meteikan en iang wia met, sohte pahn warohng pedolong nan Wehin nanleng.* Ahpw mehmen me kin kapwaiada oh padahngki kehkehlik pwukat pahn warohng pedolong nan Wehin nanleng.* 20 Pwe I ndaiong kumwail me ma amwail wiewia pwung sohte kin mwahusang ahn sounkawehwehn Kosonnedo kan oh Parisi kan,+ kumwail sohte mwahn pahn pedolong nan Wehin nanleng.+
21 “Kumwail rongehr dahme kohieng mehn mahs ako: ‘Ke dehr kemehla aramas,+ ahpw mehmen me kemehla aramas pahn wisikiong nan mwoalen kopwung.’+ 22 A ngehi, I ndaiong kumwail me mehmen me doulahte lingeringer+ pahn rie* pahn wisikiong nan mwoalen kopwung; oh mehmen me kin mwamwahliki rie ni lokaiahn kepit pahn wisikiong nan Mwoalen Kopwung Lapalap; a mehmen me nda, ‘Kowe pweipwei soh katepe!’ pahn kakete ale kadeikpen kisiniei en Kiehna.*+
23 “Eri, ma ke pahn wahla omw meirong pohn pei sarawi ehu+ oh ke ahpw tamanda wasao me riomw men nsensuwed pahmw, 24 pwilikihdi omw meirong mwohn pei sarawio, oh kohwei. Keieu wiahda popohl rehn riomwo oh mwuri pwurodo oh wia omw meirong.+
25 “Mwadang kapwungala nanpwungen kowe oh emen me men lelekin uhk mwoalen kopwung ni amwa kohkohla wasao, pwe e dehr panguhkala rehn sounkopwung, oh sounkopwungo uhd panguhkala rehn sounpapah en mwoalen kopwungo, ke ahpw selidiong nan imweteng.+ 26 Ni mehlel, I ndaiong uhk, ke sohte pahn pedoisang mwo lao ke pwainkihla noumw mwohni koaros.*
27 “Kumwail rongehr: ‘Ke dehr kamwahl.’+ 28 Ahpw I ndaiong kumwail me mehmen me kin kangkakil lih emen+ oh inangihada, e wiadahr dipen kamwahl nan eh mohngiong.+ 29 Eri ma palimaun en pwoaren mesomwen kin kahrehiong uhk ken dipekelekel, pwadikasang oh kesehweisang uhk.+ Pwe e mwahuwong uhk eh sohla ehu kisehn paliweromw sang eh pwonte lekdekla nan Kiehna.*+ 30 Oh ma palimaun en pehmwen kahrehiong uhk ken dipekelekel, lupukasang oh kesehweisang uhk.+ Pwe e mwahuwong uhk eh sohla ehu kisehn paliweromw sang eh pwonte pwupw nan Kiehna.*+
31 “Kumwail pil rongehr: ‘Mehmen me mweisang eh pwoud, a en kihong liho kisinlikoun kamweid.’+ 32 A ngehi, I ndaiong kumwail me mehmen me mweisang eh pwoud lih me sohte wiahda tiahk samin me pid wia nsenen pwopwoud,* ohlo kahrehiongehr eh pwoud en kakete wiahda dipen kamwahl. Oh mehmen me pwoudikihda lih emen me mweisangehr eh pwoud, e kamwahl.+
33 “Kumwail pil rongehr dahme kohieng mehn mahs ako: ‘Ke dehr kahula oh sohte kapwaiada,+ ahpw ke anahne kapwaiada inou kan me ke kahukihong Siohwa.’*+ 34 A ngehi, I ndaiong kumwail: Kumwail dehpa mwahn kahula,+ pil dehr kahukihla nanleng pwe iei mwoalen Koht; 35 de pil sampah, pwe iei utupen aluweluwe kan;+ de pil Serusalem, pwe iei kahnimw en Nanmwarki lapalapo.+ 36 Dehr kahukihla moangomw, pwe ke sohte kak wiahiong apwoat pitenmoangomw en pwetepwetala de toantoalla. 37 Ihte amwail ‘Ei’ en wehwehki ei, oh amwail ‘Soh’ en wehwehki soh,+ pwe me daulihala met kin kohsang rehn me suwedo.+
38 “Kumwail rongehr: ‘Pwoaren mas ong pwoaren mas oh ngih pwoat ong ngih pwoat.’+ 39 A ngehi, I ndaiong kumwail: Dehr uhwong emen me suwed, ahpw mehmen me pohr uhk ni palimaun en likinsepomw, a pil kihong pali teio.+ 40 Oh ma aramas emen men lelekin uhk ni mwoalen kopwung pwe en ahnekihla omw likou reirei, mweidohng en pil ahnekihla omw likou puhp;+ 41 oh ma emen me ahneki manaman itonehng uhk ken sewese wahda mehkot mwail ehu,* iangala ih mwail riau. 42 Kihong emen me peki rehmw mehkot, oh dehr sohpeisang emen me men peki rehmw mehkot+ me e pahn kapwurehwei mwuhr.*
43 “Kumwail rongehr: ‘Ke anahne poakohng mehn mpomw+ ahpw kailongki omw imwintihti.’ 44 Ahpw I pahn ndaiong kumwail: Pousehlahte poakohng amwail imwintihti kan+ oh kapakapki irail me kin kalokei kumwail,+ 45 pwe kumwail en kak kadehdehda me kumwail sapwellimen Samamwail me ketiket nanleng,+ pwe e kin ketin dakerki sapwellime ketipin pohn me suwed oh me mwahu kan oh kin ketin kamwerehdi keteu pohn irail kan me kin wia dahme pwung oh irail kan me kin wia dahme suwed.+ 46 Eri, keting dahieu me kumwail pahn ale ma kumwail kin poakohngete irail me kin poakohng kumwail?+ Pwe sounrik daksis kan sou pil kin wia soahngohte? 47 Oh ma kumwail kin rahnmwahwih riamwail kante, soahng mwahu dah me kumwail wia me siksang meteikan? Mehn liki kan sou pil kin wia soahngohte? 48 Kumwail anahne unsek duwehte Samamwail nanleng me ketin unsek.+