Melkahka kan
Ong sounpihtih keseng en Niholod.* En Depit melkahka.
5 Maing Siohwa, komw ketin karonge ei pato kat;+
Komw ketin tetehk ei sengloal.
2 Komw ketin karonge ei likwer en peksawas,
Maing ei Nanmwarki oh ei Koht, pwehki I kin patohwan kapakapohng komwi.
3 Maing Siohwa, komw pahn ketin karonge ngileiet nimenseng;+
Nimenseng I pahn patohwan wehkadahng komwi ei pwunod+ oh kasikasik awiawih.
4 Pwe kaidehn komwi Koht emen me kin ketin kupwurperenki mehkot suwed;+
Sohte me suwed men kak mihmihte rehmwi.+
5 Sohte aramas aklapalap men kak uh mwohn silangomwi.
Komw kin ketin kalahdeki irail koaros me kin wia me suwed;+
6 Komw pahn ketin kamwomwala irail kan me kin koasoi likamw.+
Siohwa kin ketin kalahdeki aramas me kin tiahk lemei oh widing.*+
7 Ahpw I pahn patohdo nan tehnpasomwi+ pwehki sapwellimomwi limpoak loalopwoat laud;+
I pahn poaridiong omwi tehnpas sarawio* ni ei kin lemmwikin komwi.+
8 Maing Siohwa, komw ketin kahluwa ie nan sapwellimomwi ahl pwung kan pwehki ei imwintihti kan;
Komw ketin kamwakelehda alomwi pwe I en weid loale.+
9 I sohte kak likih mehkot me re kin nda;
Kailoktohr me kin mi loalarail;
Kepinwararail iei sousou ehu me sansara;
Re kin doadoahngki lowarail kan pwehn wia koasoi kapohl.+
10 Ahpw Koht pahn ketin kadeikirailda;
Ar pilahn mwersuwed kan pahn kahrehiong ren pwupwudi.+
Komw ketin kasareirailla pwehki ar kauwehla kosonned tohto kan,
Pwe re uhwongadahr komwi.
11 Ahpw irail koaros me kin diar wasahn ruk rehmwi pahn perenda;+
Ahnsou koaros re pahn weriwerki peren.
Komw pahn ketin pere irail,
Oh irail me kin poakohng mwaromwi pahn perenkin komwi.
12 Maing Siohwa, komw pahn ketin kapaia me pwung kan;
Komw pahn ketin kapilkinirailpene kupwuramwahu me rasehng mehn sansar laud ehu.+