Rongamwahu en Madiu
15 Parisi kan oh sounkawehwehn Kosonnedo kan+ sang Serusalem eri pwarodo rehn Sises oh patohwanohng: 2 “Dahme sapwellimomwi tohnpadahk kan kin kauwehkihla tiahk en mehn mahs ako? Karasepe, re sohte kin omwiomw* mwohn ar pahn mwenge.”+
3 E ketin sapeng irail mahsanih: “A dahme kumwail kin kauwehkihla sapwellimen Koht kehkehlik pwehki amwail tiahk kan?+ 4 Karasepe, Koht ketin mahsanih, ‘Kahkahki semomw oh inomw,’+ oh ‘Mehmen me kin lokaia lemeiong seme de ine pahn kamakamala.’+ 5 Ahpw kumwail kin nda, ‘Mehmen me ndaiong seme de ine: “Sohte lipilipil dahme I ahneki me kak seweseiuk iei kisakis ehu me koasoandier ong Koht,”+ 6 e solahr anahne wauneki seme.’ Eri kumwail kin wiahki mahsen en Koht mehkot sohte katepe pwehki amwail tiahk.+ 7 Mwalaun amwailen, mehlelete Aiseia eh kohpada duwen kumwail ni eh nda:+ 8 ‘Aramas pwukat kin waunekin ie sang ni kilin awarail, ahpw arail mohngiong inenen dohsang ie. 9 Sohte katepen arail kin pousehlahte kaudokiong ie, pwe arail padahk kan wiahte kehkehlik en aramas kei.’”+ 10 Ih eri malipehdo pokono oh mahsanihong irail: “Kumwail rong oh wehwehkihla met:+ 11 Kaidehkin dahme kin kohieng nan ewen aramas me kin kasaminehla ih, ahpw dahme kin kohsang nan ewe me kin kasaminehla.”+
12 Tohnpadahk ko eri patohla reh oh patohwanohng: “Komw mwahngih me Parisi ko dipekelekelki ar rong dahme komw mahsaniho?”+ 13 E ketin sapeng mahsanih: “Tuhke koaros me Semei nanleng sohte ketin padokedi pahn usuhsdahsang. 14 Kumwail pohnsehse irail. Sounkaweid maskun kei irail. Eri ma me maskun men kin kahre me maskun men, ira koaros pahn pwupwudiong nan pwoahr.”+ 15 Piter ahpw patohwan: “Komw ketin kawehwehiong kiht karasaras pwoaten.” 16 Ih eri mahsanih: “Ia duwe, kumwail pil saikinte wehwehki?+ 17 Kumwail sehse me dahme kin kohlong nan ewen aramas kin kohdihla nan kapehde oh kohieisang nan paliwere? 18 Ahpw dahme kin kohieisang nan ewe kin kohsang nan eh mohngiong, oh soahng pwukat kin kasaminehla ih.+ 19 Karasepe, lamalam suwed kin kohsang nan mohngiong:+ kamaramas, kamwahl, tiahk samin me pid wia nsenen pwopwoud,* pirap, kadehde likamw, oh lahlahwe. 20 Mepwukat me kin kasaminehla aramas; a mwenge ahpw sohte omwiomw* sohte kin kasaminehla aramas.”
21 Sises eri ketisang wasao oh ketila nan sapwen Dair oh Saidon.+ 22 A kilang! lihen Penisia men sang wasao kohdo oh ngihl laudida patohwan: “Maing Kaun, Nein Depit, komw kupwure ie. Nei serepeino lokolongki ngehn suwed men me tiadahr powe.”+ 23 Ahpw sohte lepin mahsen ehu me e ketin sapengki liho. Sapwellime tohnpadahk ko eri keiong mpe oh peki reh: “Komw ketin kausala liho pwe e wie weriwer kohdo mwuritail.” 24 E ketin sapeng mahsanih: “I sohte pekederdohng emen tohrohr ahpw ongete sihpw salongala kan en wehin Israel.”+ 25 Ahpw liho kohdo oh poaridi mwowe oh patohwanohng: “Maing Kaun, komw ketin sewese ie!” 26 E ketin sapeng mahsanih: “E sohte pwung en kihsang kenen seri kan pilawa oh kesehiong kisin kidi kan.” 27 Liho ahpw patohwan: “Ei Maing Kaun, ahpw kisin kidi kan pil kin kang mweremweren pilawa me kin pwupwudihsang en arail soumas akan tehpel.”+ 28 Sises eri ketin sapeng ih mahsanih: “Lih, omw pwoson me laud mehlel, dahme ke mwahuki en pweida.” Nah serepeino eri mwahula ni awaohte.
29 Mwurin Sises eh ketila sang wasao, e ketila peianla Sehden Kalili,+ oh mwurin eh ketidahla pohn nahnao, e ahpw ketidiong wasao. 30 Lapalahn pokon ehu eri kohdo oh wadohng reh aramas akan me dangepel, me kisehn paliwararail kan ohla, me maskun, me lohteng, oh pil soumwahu tohto teikan oh pwilikihdiong mwohn aluweluwe kan, e ahpw ketin kamwahwihirailla.+ 31 Pokono eri pwuriamweikihla ar kilangada me lohteng kan ar lokolokaia, me kisehn paliwararail kan ohla ar mwahula, me dangepel kan ar alialu mwahu oh me maskun kan ar kilangada wasa, re ahpw kalinganahda Koht en Israel.+
32 Sises eri malipepene sapwellime tohnpadahk ko oh mahsanih: “I poakehla pokon wet+ pwe re mihmier rehi rahn siluh oh sohte mehkot re tungoale. I sohte men kadarirailla ni ar sohte mwenge,* pwe re kakete lipwongmasala nanialo.”+ 33 Ahpw tohnpadahk ko patohwanohng ih: “Ia wasa nan sahpw doh wet me se pahn ale ie pilawa me pahn itarohng pokon ehu me uwehte met?”+ 34 Sises eri mahsanihong irail: “Lopwon en pilawa depe mi rehmwail?” Re ahpw patohwan: “Meh isuh oh kisin mwahmw kei.” 35 Eri, mwurin eh mahsanihong pokono en mwohndiong nanpwelo, 36 e ketikihda lopwon en pilawa isuhwo oh mwahmw ko, oh mwurin eh ketin kalahngankihong Koht, e ketin pilitikihpeseng oh tepida ketikihong sapwellime tohnpadahk ko, tohnpadahk ko ahpw uhd kihong pokono.+ 37 Oh irail koaros eri mwenge oh medla oh re deukada luhwe ko oh kadirehla kopwou laud* isuh.+ 38 Eri ohl 4,000 oh pil lih oh kisin seri kan iang mwenge. 39 Mwurin eh ketin kadarpeseng pokono, e ahpw ketidahng pohn pwohto oh ketila nan sapwen Makadan.+