Rongamwahu en Sohn
10 “I ndaiong kumwail ni mehlel, mehmen me sohte pedolong nan wenihmw en kelen sihpw, ahpw doulong ni ehu ahl tohrohr, ih lipirap emen oh sounkul men.+ 2 Ahpw mehmen me pedolong nan wenihmwo iei ih me silepen sihpw.+ 3 Silepen wenihmwo kin ritingadahng memenet+ oh sihpw kan kin rong ngile.+ E kin ekerki nah sihpw ko adarail oh kin kahluwairailla liki. 4 Ni eh kahreiei nah ko koaros, e kin tiengla mwohrail oh sihpw ko kin idawehn pwehki ar ese ngile. 5 Re sohte mwahn pahn idawehn aramas emen me re sehse, ahpw re pahn tangasang pwehki ar sehse ngilen aramaso.” 6 Sises mahsanihong irail karasaras pwoatet, ahpw re sohte wehwehki dahme e mahmahsanihong irail.
7 Sises eri pwurehng mahsanih: “I ndaiong kumwail ni mehlel, ngehi me wenihmw ong sihpw kan.+ 8 Irail koaros me pwarodo me dene irail ngehi, iei lipirap kei oh sounkul kei; ahpw sihpw kan sohte kin rong irail. 9 Ngehi me wenihmwo; mehmen me kohdo rehi pwehn pedolong nan kelen sihpw pahn komourla, oh mehmeno pahn pedolong oh pedoi oh diar mohs me diren dihpw.+ 10 Lipirapo kin kohdohte pwe en pirapa, kemehla oh kauwehla.+ A ngehi, I kohdo pwe irail en kak ahneki mour oh mour werei. 11 Ngehi me silepen sihpw mwahu;+ silepen sihpw mwahu kin tounmeteikihla moure* pwehki sihpw kan.+ 12 Tohndoadoahk men me kaidehn silepen sihpw oh pil kaidehn nah sihpw ko, kin kesehla sihpw ko oh tangdoaui ni eh kin kilangada kidien wel eh kohkohdo—kidien welo ahpw kin poar pohrail oh pwakihirailpeseng— 13 pwehki ih tohndoadoahk men oh e sohte kin nsenohki sihpw kan. 14 Ngehi silepen sihpw mwahu. I kin ese nei sihpw kan oh nei sihpw kan ese ie,+ 15 duwehte Sahmo eh ketin mwahngih ie oh I ese Sahmo;+ oh I tounmeteikihla ei mour* pwehki sihpw kan.+
16 “Pil mie nei sihpw teikan me sohte iang mi nan kelen sihpw wet;+ I anahne pil weiraildo oh re pahn rong ngilei, oh re pahn wiahla pelin sihpw tehieu oh sileparail pahn mehtehmen.+ 17 Ih kahrepen Sahmo eh ketin poakohng ie,+ pwehki ei tounmeteikihla ei mour*+ pwe I en kak pwurehng ale. 18 Sohte me pahn kihsang ei mour, ahpw I tounmeteikihla ni pein nsenei. I ahneki manaman en tounmeteikihla oh I pil ahneki manaman en pwurehng ale.+ I alehdier kehkehlik wet sang rehn Semei.”
19 Liaktohrohr eri pwurehng wiawi nanpwungen mehn Suhs ako+ pwehki mahsen pwukat. 20 Me tohto nanpwungarail ahpw nda: “Ngehn suwed kin mi reh oh e sahliella. Dahme kumwail rongki ih?” 21 Meteikan nda: “Mepwukat kaidehn koasoi en aramas me ngehn suwed mi reh. Ia duwe, ngehn suwed kak kapehdpeseng pwoaren mesen aramas maskun?”
22 Ni ahnsowo, Kasarawien Onohnsapahl* wiawi nan Serusalem. Ahnsowo iei ahnsoun kopou, 23 oh Sises ketiketseli nan tehnpas sarawio nan palangk en Solomon.+ 24 Mehn Suhs ako eri kapilpene oh tepida ndaiong: “Ia erein omw pahn kahrehiong kiht sen peikasal? Ma kowe me Krais, ndaiong kiht ni sansal.” 25 Sises ketin sapeng irail, mahsanih: “I ndaiongkumwailehr, a kumwail sohte kamehlele. Doadoahk kan me I kin wiewia ni mwaren Semei, mepwukat kin kadehdehda duwen ngehi.+ 26 Ahpw kumwail sohte kamehlele, pwehki kaidehn kumwail nei sihpw.+ 27 Nei sihpw kan kin rong ngilei oh I ese irail, oh re kin idawehn ie.+ 28 I kihong irail mour soutuk,+ oh re sohte mwahn pahn mwomwla, oh sohte emen pahn adihirailsang nan pehi kat.+ 29 Dahme Semeio ketikihong ie iei mehkot me kesempwal sang soahng teikan koaros, oh sohte emen kak adihirailsang nin limen Sahmo.+ 30 Ngehi oh Sahmo ketin wia ehu.”*+
31 Mehn Suhs ako pil pwurehng rik takai pwe ren katehki. 32 Sises ahpw ketin sapeng irail mahsanih: “I kasalehiong kumwail doadoahk mwahu tohto sang rehn Sahmo. Eri, mehnia doadoahk rehn doadoahk pwukat me kumwail pahn katehkin ie?” 33 Mehn Suhs ako ahpw sapengki: “Kaidehn doadoahk mwahu me se katehkin uhk, ahpw pwehki omw kin lahlahwe,+ pwe mendahki kowe aramas emen, ke ahpw kin wiahkin uhk koht emen.” 34 Sises eri ketin sapeng irail, mahsanih: “E sou ntingdier nan amwail Kosonnedo, ‘I ahpw nda: “Kumwail koht ekei”’?*+ 35 Ma e ketin kahdanekin irail ‘koht ekei,’+ eri irail me mahsen en Koht kadeikada—oh nting sarawio sohte kak wekila— 36 ia duwe, kumwail kin ndaiong ie, ‘Ke lahlahwe,’ pwehki ei nda, ‘Ngehi Sapwellimen Koht,’+ mendahki Sahmo ketin kasarawihiehla oh poaroneiehdo nin sampah? 37 Ma I sohte kin wia sapwellimen Semeio doadoahk, kumwail dehr kamehlele ie. 38 Ahpw ma I kin wiewia doadoahk pwukat, mehnda ma kumwail sohte kin kamehlele ie, kumwail kamehlele doadoahk ko,+ pwe kumwail en ese oh doulahte esehla me Sahmo kin ketin miniminiong ie oh I pil kin miniminiong Sahmo.”+ 39 Irail eri pwurehng song pwe ren koledi, ahpw e ketin pitsang irail.
40 Oh e pwurehng ketieila oh kotehla Sordan ong wasa me Sohn kin wia papidais ie mahso,+ e ahpw ketiket wasao. 41 Oh aramas tohto patohdo reh oh tepida nda: “Sohte manaman ehu* me Sohn wiahda, ahpw mehkoaros me Sohn nda duwen ohl menet me mehlel.”+ 42 Oh aramas tohto ahpw pwosonla ih wasao.