Rongamwahu en Sohn
15 “Ngehi me tuhkehn kreip mehlel, oh Semei iei soumweto. 2 E kin ketikihsang rah koaros rehi me sohte kin wa, oh e kin ketin kamwakele rah koaros me kin wa, pwe en kak tohtohla wah.+ 3 Kumwail mwakelekelkidahr mahsen me I padahkihongkumwailehr.+ 4 Kumwail tengediong amwail kin miniminiong ie oh I pahn tengediong ei kin miniminiong kumwail. Duwehte rah pwoat me sohte kak pein wa ma e sohte poadohng tuhkehn kreipo, kumwail pil sohte kak wa ma kumwail sohte tengediong amwail kin miniminiong ie.+ 5 Ngehi me tuhkehn kreipo; kumwail iei rah kan. Mehmen me kin tengediong eh miniminiong ie oh I kin miniminiong ih, memenet kin wa tohto;+ pwe kumwail sohte mwahn kak wia mehkot ni amwail tohrohr sang ie. 6 Ma mehmen sohte kin tengediong eh miniminiong ie, e kin lekdekla rasehng rah pwoat oh kin mengila. Aramas akan ahpw kin kihpene rah ko oh keselahng nan kisiniei oh re kin isihsla. 7 Ma kumwail kin tengediong amwail kin miniminiong ie oh ei mahsen kan kin mihmi loalamwail, eri, kumwail peki soahng sohte lipilipil me kumwail mwahuki oh e pahn pweiong kumwail.+ 8 Semei kin ketin linganla ni amwail kin kapwarehda wah tohto oh kadehdehda me kumwail nei tohnpadahk.+ 9 Duwehte Sahmo eh kin ketin poakohng ie,+ I kin poakohng kumwail; kumwail tengediong ei limpoak. 10 Ma kumwail kin kapwaiada ei kehkehlik kan, kumwail pahn tengediong ei limpoak, duwehte ei kin kapwaiada sapwellimen Sahmo kehkehlik kan oh tengediong sapwellime limpoak.
11 “I ndaiong kumwail mepwukat, pwe kumwail en direkihla peren me I ahneki.+ 12 Iet ei kehkehliken, kumwail poakohng emenemen duwehte ei kin poakohng kumwail.+ 13 Sohte emen me ahneki limpoak laudsang met, me emen en tounmeteikihla eh mour* pwehki kompoakepah kan.+ 14 Kumwail iei kompoakepahi ma kumwail kin wia dahme I kehkehlingkihong kumwail.+ 15 I solahr pahn ekerkin kumwail ladu pwehki ladu men sohte kin ese dahme eh soumas kin wia. Ahpw I pahn ekerkin kumwail kompoakepahi pwehki ei kasalehiongkumwailehr soahng koaros me I rongasangehr rehn Semei. 16 Kumwail sohte piliehda, ahpw ngehi me pilkumwailda oh idihkumwailda pwe kumwail en kohwei oh pousehlahte kapwarehda wah oh wahmwail en mihmihte, pwe sohte lipilipil dahme kumwail peki rehn Sahmo ni edei, e pahn ketikihong kumwail.+
17 “I kehkehlingkihong kumwail mepwukat pwe kumwail en limpoakpene.+ 18 Ma sampah kin kailongkin kumwail, kumwail en ese me e kailongkin ie mwohn eh kailongkin kumwail.+ 19 Ma kumwail kisehn sampah, sampah pahn poakohng kumwail pwehki nah kumwail. Eri pwehki kaidehn kumwail kisehn sampah,+ ahpw I pilkumwailda sang sampah, ih kahrepe wet me sampah kin kailongkin kumwail.+ 20 Kumwail tamataman mahsen me I ndaiong kumwail: Ladu men sohte kin lapalapasang eh soumas. Ma irail kalokeieier, re pil pahn kalokei kumwail;+ ma irail kapwaiada ei mahsen, re pil pahn kapwaiada amwail padahk. 21 Ahpw re pahn wia mepwukat koaros pwe ren uhwong kumwail pwehki mwarei, pwe re sohte ese Ih me ketin poaroneiehdo.+ 22 Ma I sohte kohdo oh koasoiong irail, e pahn sohte diparail.+ Ahpw met, irail sohte kak kahmahmki diparail.+ 23 Mehmen me kin kailongkin ie pil kin kailongki Semei.+ 24 Ma I sohte wiahda rehrail doadoahk kan me sohte emen kin wia, e pahn sohte diparail;+ ahpw met re kilangieier oh kailongkin ie oh pil Semei. 25 Ahpw met wiawi pwe en kapwaiada mahsen me ntingdier nan arail Kosonned: ‘Re kailongkin ie ni soh kahrepe.’+ 26 I pahn kadarowohng kumwail sang rehn Sahmo sounsawaso me iei ngehn sarawi* me pid mehlel+ oh ni eh pahn leledo sang rehn Sahmo, e pahn kadehdehda duwen ngehi;+ 27 a kumwail pahn uhd kadehdehda duwen ngehi+ pwehki amwail kin ieiang ie sang nin tapio.