Sohp
4 Elipas+ mehn Demano eri sapengki:
2 “Ma emen kin song en lokaiaiong uhk, ke pahn sohla kak kanengamah?
Pwe ihs me kak uhdihsang lokaia?
3 Mehlel, ke kapwungalahr me tohto,
Oh ke kin kakehlakahda me luwet akan.
4 Omw lokaia kan kin pwekada emen me dipekelekel,
Oh ke kin kakehlakahda irail me pwukiarail kan kospene.
5 Ahpw met e lelohnguhkehr, oh ke pwuriamweikihla;*
E sair uhk, oh ke pwunodada.
6 Omw lemmwiki Koht sou kin kahrehiong uhk en likih ih?
Omw elen loalopwoat+ sou kin kihong uhk koapworopwor?
7 Menlau tamataman: Mie aramas soh dipe men me sohrala?
Iahd me aramas pwung men mwomwla?
8 Nin duwen me I kilangehr me irail me deipwelihada* dahme kamedek
Oh irail me kamwarak kahpwal, pahn dolung soahngtehieu.
9 Sang ni angin doauesen Koht re kin sohrala,
Oh sang ni angin sapwellime engieng re kin imwisekla.
10 Laion kin wer, oh laion pwulopwul kin ngiringir,
Ahpw pil ngihn laion kehlail kan* kin ohla.
11 Laion men kin sohrala pwehki sohte seike,
Oh wahn laion kan kin mwarahkpeseng.
12 Mahsen pwoat ahpw lelohng ie ni rir,
Oh ngilen mwenginingin en mahseno ahpw peidohng ni salengeiet.
13 Nipwong, ni ahnsou me aramas akan meirkelikla,
I ahnekihda kaudiahl kan me kapwunodehda ei madamadau,
14 Rerrer ni masak laud ahpw kipeiehdi,
Me audehkihda tih kat koaros masak.
15 Mehkot ehu* ahpw kote mwohn meseiet;
Ndin kiliet ahpw uhkihda.
16 Apeo ahpw uhdi,
Ahpw I sohte kasawihada mwomweo.
Mwomwen mehkot mi mwohn mesei kat;
Wasao meleileidi, oh I ahpw rongada ngihl ehu:
17 ‘Ia duwe, aramas kak pwungsang Koht?
Aramas emen kak mwakelekelsang Sounwiepeo?’
18 Kilang! E sohte kin ketin likih sapwellime ladu kan,
Oh e kin ketin diarada sapwung rehn sapwellime tohnleng kan.*
19 Ia uwen eh pil pahn ketin wia soahngohte ong irail kan me kin kousoan nan ihmw pwehl,
Me ar poahsoan kin mi nan pwelpar,+
Me mengei en mwutpene duwehte kariskahn!*
20 Re kin mwutpene douluhl sang nimenseng lel nin soutik;
Re kin sohrala kohkohlahte, oh sohte me kin nsenohki.
21 Re sou kin duwehte impwal ehu me sahl kan weweikdahsang?
Re kin mehla ni ar sohte ahneki erpit.