Melkahka kan
Koulen kasarawi en tehnpaso. En Depit melkahka.
30 Maing Siohwa, I pahn kawauwih komwi, pwe komw ketin pwekiedahr;
Komw sohte ketin mweidohng ei imwintihti kan ren kouruhrkin ie.+
2 Maing Siohwa ei Koht, I patohwan likweriong komwi peksawas, oh komwi ahpw ketin kamwahwihiehla.+
3 Maing Siohwa, komw ketin pwekiedahr sang nan Sousou.*+
Komw kin ketin mweidohng ie I en momour; komw ketin doareielahr sang ei pahn suhrla nan pwoahr.*+
4 Kumwail sapwellime aramas loalopwoat kan,+ kumwail koulki koulen kaping kan* ong Siohwa,
Kumwail kapingkalahngan ong mware sarawi;*+
5 Pwehki en mi pahn sapwellime engieng kin ahnsoutehkis,+
Ahpw en mi pahn sapwellime kupwuramwahu kin mihmi erein mour.+
Sengiseng kak wiawi nin soutik, ahpw weriwer en peren kin wiawi nimenseng.+
6 Ni ahnsou me sohte ei kahpwal, I kin nda:
“I sohte mwahn pahn rerada.”*
7 Maing Siohwa, ni omw kin ketin kupwuramwahwih ie, komw kin ketin wiahiong ie I en kehlail duwehte nahna ehu.+
Ahpw ni omw ketin karirihala silangomwi, I masepwehkada.+
8 Maing Siohwa, I kin patohwan liklikweriong komwi;+
Oh I kin patohwan pekipeki kupwuramwahu rehn Siohwa.
9 Ia katepen ei pahn mehla,* ei pahn kohdihla nan pwoahr?*+
Ia duwe, pwelpar pahn kapinga komwi?+ E pahn lohki sapwellimomwi lelepek?+
10 Maing Siohwa, komw ketin karonge ie, oh kupwuramwahwih ie.+
Maing Siohwa, komw ketin sewese ie.+
11 Komw ketin wekidalahr ei mwahiei ong ni kahlek;
Komw ketin kapwuhrasangehr ei likoun nsensuwed,* oh ketin kapwuhrohng ie nan peren,
12 Pwe I pahn koulkihong komwi kaping kan oh sohte wie nennenla.
Maing Siohwa ei Koht, I pahn kapinga komwi kohkohlahte.