Rongamwahu en Madiu
4 Mwurin mwo, ngehn sarawi* ahpw kahluwalahng Sises nan sapwtehn pwe Tepil+ en kasonge ih.+ 2 Mwurin eh ketin kaisihsolki rahn 40 oh pwohng 40, e ahpw pwungitikla. 3 Sounkasongosongo+ eri keiong mpe oh patohwanohng: “Ma sapwellimen Kohto komwi, eri ndaiong takai pwukat en wiahla lopwon en pilawa.” 4 Ahpw e ketin sapeng mahsanih: “E ntingdier: ‘Kaidehn pilawahte me aramas kin mourki, pwe mahsen koaros me pwilsang ni doauesen Siohwa.’”*+
5 Tepil eri kahluwalahng ih nan kahnimw sarawio,+ oh kihdiong pohn kengkeng en tehnpas sarawio+ 6 oh patohwanohng ih: “Ma sapwellimen Kohto komwi, lusdihsang men, pwe e ntingdier: ‘E pahn ketin ruwesehki sapwellime tohnleng kan duwen kowe,’ oh ‘Re pahn kolkinuhkada pehrail kan, pwe nehmw kan en dehr lel takai.’”+ 7 Sises eri mahsanihong: “E pil ntingdier: ‘Ke dehr kasonge+ Siohwa* omw Koht.’”
8 Tepil pil kahluwadahla ih pohn nahna ehu me inenen ileile oh kasalehiong wehi koaros en sampah oh ar lingan.+ 9 E pil patohwanohng ih: “Mepwukat koaros I pahn kihong komwi ma komw pahn poaridi oh kaudokiong ie pak ehute.” 10 Sises eri mahsanihong: “Sehdan, kohkohweisang ie! Pwe e ntingdier: ‘Siohwa* omw Koht me ke anahne kaudokiong,+ oh ih kelehpw me ke anahne papah.’”+ 11 Tepil eri kohkohsang ih,+ a kilang! tohnleng kan ahpw pwarodo oh tepida sewese ih.+
12 Eri, ni ahnsou me e karongehda me Sohn selidier,+ e ahpw ketila Kalili.+ 13 Patehng met, mwurin eh ketisang Nasaret, e ketila oh kousoanla nan Kapernaum+ ni oaroahr en sehden wehin Sepulon oh Napdali, 14 pwe en ketin kapwaiada dahme soukohp Aiseia koasoia, me nda: 15 “Sapwen Sepulon oh sapwen Napdali, ni ahl me kolahng sehd, palio Sordan, Kalili sapwen mehn liki kan! 16 Aramas akan me mi nan rotorot kilangada marain laud ehu, a ong irail me mwomwohd nan wasa rotorot me kin kahrehda mehla, marain+ dakerada irail.”+ 17 Sang ahnsowo kohla, Sises ketin tepida kalohkseli oh mahsanih: “Kumwail koluhla, pwe Wehin nanleng kerendohr.”+
18 Ni eh ketin alialu limwahn Sehden* Kalili, e ahpw mahsanihada pirien ehu, Saimon me pil adaneki Piter+ oh rie pwutak Andru me wie kesekesehdi ara uhk nansedo, pwe ira soused kei.+ 19 Ih eri mahsanihong ira: “Kumwa idawehniehdo, oh I pahn wiahkinkumwahla sounlaidih aramas.”+ 20 Ni ahnsowohte, ira pwilikihdi ara uhk ko oh idawehnla.+ 21 Ni eh ketisang wasao, e mahsanihada pil ehu pirien, nein Sepedi pwutak ko, Seims oh Sohn.+ Ira iang ara pahpa Sepedi onohne arail uhk ko nan pwohto, oh Sises malipe ira.+ 22 Ni ahnsowohte ira pwilikihdi pwohto oh ara pahpao oh idawehnla ih.
23 Ih eri ketiketseli nan Kalili pwon,+ padapadahk nan arail sinakoke kan+ oh kalokalohki rongamwahu en Wehio oh pil kamwakamwahwihala soangsoangen soumwahu koaros rehn aramas akan.+ 24 Ronge ahpw kohpeseng wasa koaros nan Siria, oh aramas akan kin wahdo reh koaros me lokolongki soangsoangen soumwahu oh medek,+ irail me ngehn suwed tiada powe+ oh me soumwahu rerrer+ oh me mwoator kan, e ahpw ketin kamwahwihirailla. 25 Kahrehda, lapalahn pokon ehu kin idawehn ih sang Kalili, Dekapolis,* Serusalem, Sudia oh sang palio Sordan.